Klei Aê Diê Blŭ: II Y-Timôthê 2:22-26
Êlan kliăng: “…ƀiădah jing êmhač hŏng jih jang, sa čô thâo mtô jăk, leh anăn thâo gĭr, mkra phung bi kdơ̆ng hŏng pô hŏng klei êdu. Năng ai Aê Diê srăng brei diñu kmhal kơ klei soh leh anăn truh kơ klei thâo săng klei sĭt nik, leh anăn diñu lŏ hdơr leh anăn đuĕ mơ̆ng kđông yang jhat, pô mă čăp leh diñu brei ngă klei ñu čiăng” (II Y-Timôthê 2:24-26)
Klei êmuh ksiêm mĭn: Tui si klei mtă hlăm êlan 22-26, ya jing “klei kđeh tluh phung hlăk ai?” Ya knuih brei Y-Timôthê mâo hŏng phung mâo klei mĭn thâo săng soh kơ Aê Diê? Ya drei srăng ngă čiăng lŏ atăt wĭt phung ayŏng adei drei klah đuĕ leh?
Ênuk hlăk ai bŏ hŏng klei mơai, mâo lu klei čiăng, jhŏng, jhŏng ngă, thâo dôk hmư̆ leh anăn djăl mă tŭ, khăp tui duah klei mrâo, … ƀiădah lĕ, ênuk hlăk ai ăt jing ênuk djăl bi kdjhưng ai, khăp čiăng dưi hĭn mơh. Kyuanăn, hlăm hră čih mơĭt tal sa, Khua ƀĭng kna Y-Pôl mtă kơ anak ñu hlăm mngăt snei: “Đăm brei ôh arăng bi êmut kơ ih kyua ih jing hlăk ai”, leh anăn tinei, hlăm êlan 22, sa blư̆ ñu lŏ mtă kơ anak anăn, “brei ih hngah kơ klei kđeh tluh phung hlăk ai”. Klei kđeh tluh phung hlăk ai čiăng lač hlăm êlan 22-26 anăn jing klei khăp kơ klei bi tăng “mluk leh anăn amâo yuôm ôh” hŏng phung mâo klei mĭn soh (êlan 23). Khua ƀĭng kna Y‑Pôl amâo bi kdơ̆ng ôh hŏng jih jang klei bi tăng djŏ hnơ̆ng, klei bi tăng yuôm, kăn bi kdơ̆ng rei hŏng klei blŭ mgang kơ klei đăo djŏ. Klei ñu bi kdơ̆ng tinei jing klei mĭn khăp kơ klei “bi msao” (êlan 24), čiăng lač jing “kreh mneh msao”.
Hlăm I Y-Timôthê kdrêč 1, Khua ƀĭng kna Y-Pôl mtă kơ Khua pô mtô Y-Timôthê brei gơ̆ mtô bi mđĭ ai hrô kơ klei bi tăng, đru khua pô mtô hlăk ai thâo săng mnơ̆ng mtrŭt kơ klei mtô bi mđĭ ai anăn jing klei khăp. Hlăm II Y-Timôthê 2:14-21, ñu blŭ kñăm hrô kơ klei bi tăng, brei “hŏng jih ai tiê…thâo mtô bi djŏ klei blŭ sĭt nik Aê Diê”. Leh anăn tinei, ñu lač thiăm mnơ̆ng mtrŭt brei mâo hĕ tơdah “mkra” phung tui hlue leh klei mtô soh jing “năng ai Aê Diê srăng brei diñu kmhal kơ klei soh leh anăn truh kơ klei thâo săng klei sĭt nik, leh anăn diñu lŏ hdơr leh anăn đuĕ mơ̆ng kđông yang jhat, pô mă čăp leh diñu brei ngă klei ñu čiăng” (êlan 25-26).
Êngao kơ mâo mnơ̆ng mtrŭt djŏ snăn brei drei mâo knuih djŏ mơh. Hrô kơ klei bi tăng čiăng bi hrăp klei čiăng mâo klei dưi hĭn phung hlăk ai, hrô kơ klei ksŭng drŭng kơ klei bi tăng mluk, brei drei “jing êmhač hŏng jih jang, sa čô thâo mtô jăk, leh anăn thâo gĭr, mkra phung bi kdơ̆ng hŏng pô hŏng klei êdu” (êlan 24-25). Hŏng klei êmhač, mkra mjuăt hŏng klei thâo mtô jăk, thâo gĭr, êdu êun nao mbĭt hŏng klei čiăng đru diñu kmhal kơ klei soh, thâo kral klei sĭt nik, srăng đru phung soh leh “lŏ hdơr”. Bi tăng hŏng klei krêñ kơ atur klei đăo sĭt nik drei srăng đru drei mâo klei dưi, ƀiădah wăt tơdah drei dưi hlăm klei bi tăng msĕ snăn dưn, drei ăt kăn dưi rei hlăm klei đru ayŏng adei drei kmhal kơ klei soh. Knuih, mnơ̆ng mtrŭt djŏ yơh jing mnơ̆ng bi blah mâo boh tŭ dưn hĭn čiăng lŏ atăt wĭt phung ayŏng adei drei klah đuĕ leh hŏng klei mĭn thâo săng soh kơ klei đăo lŏ wĭt kơ Khua Yang. Tơdah êlâo dih drei ăt khăp kơ klei bi tăng čiăng kơ dưi, akâo Khua Yang bi mlih drei tui si Klei Ñu Blŭ, akâo Yang Mngăt Jăk mtrang mngač đru drei thâo ya srăng ngă čiăng ba klei jăk hĭn kơ phung ayŏng adei drei.
Hŏng ya êlan drei dôk bi mđĭ knuih êmhač, thâo gĭr leh anăn êdu êun hŏng jih jang mnuih?
Wah lač: Ơ Khua Yang, đru kâo ksiêm ya jing mnơ̆ng mtrŭt klei kâo dôk dơ̆ng hŏng mnuih mkăn. Đru kâo tui knuih Ih thâo dôk dơ̆ng hŏng klei êmhač, thâo gĭr, êdu êun čiăng đru phung ayŏng amai adei klah đuĕ leh lŏ wĭt kơ êlan klei sĭt nik. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 142-143
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
































