II-Xwmntxeej Vajntxwv 9:22-28
Nqe cim:
“Nej yuav tsum muab siab npuab thiab ua raws li tej kevcai no, luag lwm haivneeg thiaj pom hais tias nej muaj tswvyim. Thaum luag hnov txog tej kevcai no, luag yuav hais ncha ntws hais tias, haivneeg no muaj tswvyim thiab txawj ntse kawg li!” (II-Kevcai 4:6).
Cov lus nug rau sawvdaws xav:
- Yog ua cas Xalumoos thiaj muaj kev txawj ntse?
- Tej vajntxwv tuaj cuag Xalumoos ua dab tsi?
- Lub tebchaws dav rhawv uas vajntxwv Xalumoos kav yog muaj qhov twg los?
- Peb yuav ua li cas thiaj muaj kev txawj ntse?
Vajntxwv Xalumoos muaj kev txawj ntse tshaj txhua tus vajntxwv uas kav ntiajteb. Yog li ntawd, tej vajntxwv thiaj xav tuaj cuag vajntxwv Xalumoos kom tau mloog tej kev txawj ntse uas tus Tswv pub rau nws (nqe 22-23). Vajntxwv Xalumoos tej kev txawj ntse uas tus Tswv pub tau muaj tshwm los ntawm lus hais, ua haujlwm thiab kev tswj haujlwm, ua rau tej vajntxwv ib ncig xav tuaj cuag nws. Xalumoos yog tus vajntxwv uas yog tus Tswv tug, yog li ntawd tej vajntxwv tuaj cuag nws yog lawv tuaj nrhiav kev txawj ntse ntawm tus Tswv. Tej vajntxwv ntshaw tuaj cuag vajntxwv Xalumoos, kom tau mloog thiab kawm kev txawj ntse ntawm nws, lawv thiaj niaj xyoo coj tej khoom muaj nqis tuaj pub rau nws.
Los ntawm lub meej mom kav ntsigtxog tej tebchaws ib ncig, vajntxwv Xalumoos yog tus uas kav tas nrho tej vajntxwv ib ncig ntawm ib cheebtsam txij ntua tus dej Efalates los txog rau tebchaws Filitees thiab mus ti nkaus Iziv tus ciam teb. Qhov ntawd kuj yog muaj tiav li Vajtswv tau coglus rau Anplahas uas hais tias: “Kuv yuav muab tagnrho lub tebchaws no pub rau koj cov xeebntxwv, txij ntua ntawm Iziv tus ciamteb los mus txog ntua rau ntawm tus Dej Efalates” (Chivkeeb 15:18). Vajntxwv Xalumoos kav ib cheebtsam tebchaws dav li ntawd los ntawm ntaus yeej tsov rog vim nws yog ib tug vajntxwv muaj kev thajyeeb. Tej vajntxwv ib ncig xwb tim zoo siab tuaj cuag vajntxwv Xalumoos thiab fij tej khoom muaj nqis pub rau nws. Vajntxwv Xalumoos muab tau tej vajntxwv ib ncig lub siab yog los ntawm kev txawj ntse uas tus Tswv pub.
Hnub thaud Mauxes kuj qhia rau Vajtswv haiv neeg yuav tsum ua tib zoo coj thiab ua raws li tus Tswv tej kevcai kom muaj kev txawj ntse, kev totaub thiab tej ntawd yuav ua rau lwm haiv neeg lees paub hais tias: “haiv neeg coob” thiab “lub tebchaws loj”. Vajtswv haiv neeg lub tebchaws dav, pejxeem coob tsis yog los ntawm tub rog muaj zog thawj rog ua tau, tiamsis yog los ntawm muaj Vajtswv nyob nrog, thiab thaum lawv tsa ncauj thov tus Tswv, tau tus Tswv pab lawv (II-Kevcai 4:6-8).
Yog tus Tswv haiv neeg ntawm sab ntsujplig, peb yuav tsum ua qhia tshwm kev txawj ntse los ntawm tej lus hais, kev ua haujlwm kom rub tau lwm tus los cuag Tswv Yexus, mloog Yexus tej lus qhia, pehawm Vajtswv thiab fij yam khoom zoo rau Nws. Yog yuav ua tau li ntawd, peb yuav tsum coj raws li Vajtswv tej kevcai thiab Nws tej lus samfwm tseg. Kom ua tau raws li tus Tswv tej lus samfwm yog peb yuav tau nyeem, kawm xyaum Vajtswv Txojlus thiab muaj lub neej “nyob nrog” tus Tswv ntawm kev los thov tus Tswv pab uas phim yog: “haivneeg uas Vajtswv twb xaiv cia lawm, nej yog cov povthawj uas ua Vajtswv txoj haujlwm, nej yog haivneeg uas dawbhuv. Thiab nej yog Vajtswv haivneeg uas Vajtswv yuav txib mus qhia tej haujlwm tseemceb uas Vajtswv tau ua los lawm rau sawvdaws paub. Vajtswv yog tus uas hu nej tawm hauv qhov tsaus ntuj los nyob hauv qhov pom kev” (I-Petus 2:9-10).
Peb lub neej puas muaj yam dab tsi rub lwm tus los cuag Yexus Khetos?
Thov Vajtswv,
Tus Tswv, ua Koj tsaug uas Koj pub rau nyuam yaus txawj ntse. Thov Koj pab nyuam yaus lub neej qhia tshwm Koj kev txawj ntse kom rub tau lwm tus tsis tau ntseeg los cuag Tswv Yexus. Amees.
Nyeem Vajluskub hauv peb lub xyoo: II.Xwmtxheej Vajntxwv 34:1-28
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
