Klei Aê Diê Blŭ: II Klei Yăl Dliê 9:22-28
Êlan kliăng: “Djă pioh bĕ leh anăn ngă tui hlue klei anăn; kyuadah klei anăn srăng jing klei thâo mĭn leh anăn klei thâo săng diih ti anăp ală phung ƀuôn sang, tơdah diñu hmư̆ jih jang klei bhiăn anei leh anăn lač, ‘Sĭt nik phung găp djuê prŏng anei jing sa phung ƀuôn sang thâo mĭn leh anăn thâo săng” (Klei Mtô Mñă Klei Bhiăn 4:6)
Klei êmuh ksiêm mĭn: Mơ̆ng ya klei Mtao Y‑Salômôn mâo klei thâo mĭn? Ya ngă phung mtao nao bi tuôm hŏng ñu? Mơ̆ng ya mta Mtao Y‑Salômôn mâo lăn ala prŏng snăk? Ya klei drei ngă čiăng mâo klei thâo mĭn?
Klei thâo mĭn Mtao Y‑Salômôn êdah kdlưn hĭn kơ phung mtao ti lăn ala. Kyua anăn diñu čiăng dưi bi tuôm čiăng hmư̆ kơ klei thâo mĭn Aê Diê mdưm hlăm ai tiê ñu (êlan 22-23). Klei thâo mĭn Aê Diê bi êdah hlăm klei blŭ, bruă ngă, hdră ñu kriê dlăng bruă knuă iêô jak phung mtao ala tač êngao tui duah ñu. Ñu jing mtao jing mnuih Aê Diê anăn digơ̆ tui duah ñu jing čiăng tui duah klei thâo mĭn Aê Diê. Digơ̆ čang hmăng snăk dưi bi tuôm hŏng Mtao Y‑Salômôn, hmư̆ leh anăn tui hriăm klei thâo mĭn mơ̆ng mtao anăn grăp thŭn nao myơr lu mnơ̆ng dhơ̆ng yuôm snăk.
Hjăn kơ kơhưm hŏng dŭm ala čar, dưi lač Mtao Y‑Salômôn kriê dlăng jih jang phung mtao hlăm krĭng lăn prŏng mơ̆ng êa krông Ơprat truh kơ čar Philistin, leh anăn truh kơ knông lăn čar Êjip. Anei ăt jing klei Aê Diê bi sĭt klei Ñu ƀuăn leh hŏng Y‑Abraham: “Kâo srăng brei čar anei kơ phung anak čô ih, dơ̆ng mơ̆ng êa krông čar Êjip truh ti êa krông prŏng, êa krông Ơprat” (Klei Mphŭn Dơ̆ng 15:18). Mtao Y‑Salômôn kriê dlăng krĭng lăn prŏng snăn amâo djŏ kyua mơ̆ng klei blah ngă čiăng plah mmiă lăn ala ôh kyuadah ñu jing mtao mơ̆ng klei êđăp ênang. Phung mtao ala tač êngao čŏng nao kơ ñu leh anăn myơr dŭm mta mnơ̆ng yuôm bhăn diñu mâo kơ Mtao Y‑Salômôn. Digơ̆ mpŭ kơ Ñu kyua klei thâo mĭn Aê Diê brei.
Đưm dih, Y‑Môis ăt bi hriăm phung ƀuôn sang Aê Diê brei thâo ksiêm răng djă pioh klei bhiăn leh anăn Klei Aê Dê Blŭ čiăng dưi mâo klei thâo mĭn, thâo săng leh anăn klei anăn phung ƀuôn sang tač êngao srăng thâo kral, diñu ăt srăng dưi iêô jing “găp djuê prŏng” leh anăn “ala čar prŏng”. Diñu mdrŏng sah amâo djŏ jing lăn prŏng, mnuih ƀuôn sang êngŭm, lĭng kahan jhŏng ktang ôh, ƀiădah kyua mâo Aê Diê kiă kriê, mâo Ñu “dôk giăm” sĭt wah lač hŏng Ñu (Klei Mtô Mñă Klei Bhiăn 4:6-8).
Jing phung ƀuôn sang Aê Diê, brei drei bi êdah klei thâo mĭn Aê Diê hlăm klei blŭ, bruă mă čiăng iêô jak pô mkăn nao kơ Khua Yang Yêsu, hmư̆ klei Ñu mtô, kkuh mpŭ kơ Ñu leh anăn myơr kơ Ñu mnơ̆ng jăk hĭn. Čiăng dưi ngă snăn brei drei djă pioh klei bhiăn leh anăn Klei Aê Diê mtă. Čiăng dưi djă pioh Klei Aê Diê Blŭ snăn brei drei răk, hriăm Klei Aê Diê Blŭ leh anăn “dôk giăm” hŏng Ñu hlăm klei hdĭp thâo “wah lač hŏng Ñu”, năng jing “sa phung găp djuê doh jăk, phung ƀuôn sang Aê Diê pô” čiăng “hưn bruă yuôm bhăn Pô iêô leh diih kbiă mơ̆ng klei mmăt truh kơ klei mngač yuôm bhăn Ñu” (I Y‑Pêtrôs 2:9-10).
Drei mâo mơ̆ ya mta hlăm klei hdĭp drei iêô jak phung mkăn hriê hŏng Krist?
Wah lač: Ơ Khua Yang, kâo bi mni lač jăk kơ Ih brei leh kơ kâo klei thâo mĭn. Akâo kơ Ih brei klei hdĭp kâo dưi bi êdah klei thâo mĭn Ih brei čiăng mơ̆ng anăn kâo dưi iêô jak leh anăn hưn kơ Khua Yang Yêsu kơ phung mkăn ka thâo Khua Yang.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Klei Yăl Dliê 34:1-28
Kênh Youtube BHKTHN:
