Klei Aê Diê Blŭ: Y-Nêhêmi 1:1-11
Êlan kliăng: “Brei knga Ih mđing, leh anăn brei ală Ih mblang, čiăng hmư̆ klei dĭng buăl Ih wah lač, klei kâo wah lač ti anăp Ih hruê leh anăn mlam kyua phung ƀuôn sang Israel, phung dĭng buăl Ih. Kâo hưn klei soh phung ƀuôn sang Israel, klei soh hmei ngă leh hŏng Ih. Sĭt nik, kâo leh anăn djuê ana kâo ngă soh leh.” (Y-Nêhêmi 1:6)
Klei êmuh ksiêm mĭn: Ya klei Y-Nêhêmi ngă, leh ñu hmư̆ klei hưn mơ̆ng Y Hanani? Si klei Y-Nêhêmi wah lač brei kơ phung ƀuôn sang ñu? Ya bruă brei drei ngă, čiăng kơ ƀuôn sang drei mâo lu mnuih dưi mâo klei bi mtlaih?
Tơdah phung ƀuôn sang dưi lŏ wĭt leh mơ̆ng klei jing mnă, Y-Nêhêmi ăt dôk hlăm sang mtao mơh, ñu jing pô djă kčŏk kơ mtao Persơ. Wăt tơdah mtao knang leh anăn khăp kơ ñu, ƀiădah ai tiê ñu hruê mlam mđing mĭn phă phung ƀuôn sang ñu pô leh anăn kơ ƀuôn Yêrusalem. Kyuanăn, ñu čŏng tui duah êmuh klei mrâo mrang ti ƀuôn sang ñu tơdah mâo mnuih mơ̆ng ƀuôn nao kơ ƀuôn prŏng Persơ, leh anăn thâo kơ boh klei jing ti ƀuôn sang “mâo klei rŭng răng leh anăn klei hêñ prŏng. Mnư̆ ƀuôn Yêrusalem klưh leh , …” (êlan 3). Jih klei ñu hmư̆ mơ̆ng phung wĭt hưn ngă kơ Y-Nêhêmi hnĭng ênguôt tơl “dôk gŭ hia, kơŭ kyăm êjai lu hruê; …“ kăm ƀơ̆ng huă, wah lač ti anăp Aê Diê hlăm adiê” (êlan 4).
Wăt tơdah hlăk dôk hlăm anôk kdrưh kơang mdrŏng sah, ƀiădah Y-Nêhêmi amâo wơr bĭt ôh phŭn agha pô, ñu ăt hdơr nanao ñu jing djuê ana Israel, ƀuôn sang Aê Diê. Ñu kčưm dơ̆ng wah lač brei kơ phung ƀuôn sang hŏng klei mpŭ mni “Ơ Yêhôwa, Aê Diê kơ jih adiê, Aê Diê prŏng hĭn leh anăn năng huĭ, Pô djă pioh klei bi mguôp leh anăn klei khăp sĭt suôr kơ phung khăp kơ Ñu leh anăn djă pioh klei Ñu mtă!” (êlan 5). Êdei anăn ñu bi êdah klei bi ti gŭ ñu pô, thâo kral klei soh phung ƀuôn sang, hlăm anăn mâo wăt ñu pô, čiăng kwưh akâo kơ Aê Diê pap brei hŏng klei hưn klei soh ñu pô, djuê ana ñu leh anăn phung ƀuôn sang ñu (êlan 6). Hlăm klei wah lač, Y-Nêhêmi thâo kral kơ ñu pô leh anăn phung ƀuôn sang ñu “Hmei ngă leh klei soh jhat snăk hŏng Ih, leh anăn amâo gưt ôh klei mtă, klei bhiăn, leh anăn klei mtrŭn Ih brei leh kơ dĭng buăl Ih Y-Môis.” (êlan 7) Kyuanăn tŭ klei jing mnă, bi phung ƀuôn sang adôk ară anei hlăk dôk hdĭp hlăm klei arăng ktư̆ juă, arưp aram bi huĭ kyua ka mâo mnư̆ mgang. Y-Nêhêmi akâo kơ Khua Yang lŏ hdơr wĭt kơ klei blŭ Ñu mtă leh kơ Y-Môis: “ƀiădah tơdah diih lŏ wĭt kơ Kâo, djă pioh leh anăn gưt klei Kâo mtă, wăt tơdah phung diih bra đuĕ leh truh ti gŭ adiê anôk kbưi hĭn dưn, Kâo srăng hrui bi kƀĭn diih mơ̆ng anôk anăn leh anăn srăng atăt ba diih kơ anôk Kâo ruah leh čiăng brei Anăn Kâo dôk tinăn.” (êlan 9). Klei Khua Yang ƀuăn đru bi ktang ñu kwưh akâo kơ Khua Yang hơêč hmưi kơ hdră bruă ñu wĭt đru mkra mnư̆ ƀuôn Yêrusalem.
Pô đăo kơ Krist hruê anei amâo knŏng wah lač leh anăn kwưh akâo hjăn kơ pô ôh ƀiădah brei hdơr wah lač brei kơ lăn čar, kơ phung ƀuôn sang pô msĕ mơh. Drei akâo kơ Khua Yang pap brei klei soh, mtrŭt ai tiê phung ƀuôn sang Aê Diê jhŏng hlăm bruă hiu hưn Klei Mrâo Mrang Jăk, akâo Khua Yang brei lu mnuih dưi mâo klei bi mtlaih, hŏng klei drei wah lač brei leh anăn klei drei hưn bi sĭt.
Si drei dôk wah lač brei kơ phung ƀuôn sang drei?
Wah lač: Ơ Khua Yang, akâo Khua Yang pap brei klei soh kâo, kyua kâo ka jih ai tiê wah lač brei leh anăn hưn bi sĭt kơ phung ƀuôn sang kâo ôh. Akâo Khua Yang mtrŭt ai tiê kâo leh anăn lu mnuih hur har wah lač leh anăn hiu hưn Klei Mrâo Mrang Jăk kơ phung ƀuôn sang, čiăng lu mnuih dưi mâo klei bi mtlaih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Hriêng 28
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
