Efexus 5:25-33
Nqe cim zaj kawm:
“Nej cov uas yog txiv, nej yuav tsum hlub nej tej pojniam ib yam li Yexus Khetos hlub cov ntseeg thiab nws muab nws lub cev los txhiv cov ntseeg.” (Efexus 5:25)
Lus nug xav:
– Vajluskub muab txojkev hlub ntawm txij nkawm piv rau txojkev hlub twg?
– Txojkev hlub hauv tsevneeg ntseeg muaj tus yamntxwv zoo li cas?
– Peb yuav tsum ua li cas kom tsevneeg ua neej sib hlub raws li Vajtswv Txojlus qhia?
Timthawj Paulus muab txojkev hlub ntawm txij nkawm piv rau txojkev hlub uas Tswv Yexus muaj rau Pawg Ntseeg. Txojkev hlub ntawd tsis yog kev txeeb lossis raug yuam; kuj tsis yog txojkev xav ib ntus, nyiam ces hlub, tsis nyiam lawm ces sib ncaim! Txojkev hlub hauv tsevneeg ntseeg yog kev coglus ruaj khov thiab yeem poob yam zoo tshaj plaws los txhiv kom tus uas peb hlub tau txais kev kaj siab thiab kev zoo siab puv npo (nqe 25). Txojkev hlub raws li Vajtswv Txojlus qhia yog daim duab zoo nkauj uas qhia tshwm Tswv Yexus Khetos txojkev hlub rau Pawg Ntseeg. Txij nkawm yuav sib hlub kawg siab kawg ntsws thaum nkawd sib hlub ib yam li Tswv Yexus tau hlub peb.
Txojkev hlub hauv tsevneeg ntseeg xav kom ib leeg pab ib leeg muaj lub neej txij nkawm dawbhuv thiab ncajncees (nqe 26-27). Kev txij nkawm yog dawbhuv raws li Vajtswv Txojlus hais tias: “Txojkev sib yuav yog ib qho uas tseemceeb, tsimnyog nej txhua tus yuav tsum saib taus qhov ntawd. Tus txiv thiab tus niam, ib tug yuav tsum ncaj ncees rau ib tug, rau qhov Vajtswv yuav rau txim rau cov neeg uas ua txhaum kev nkauj kev nraug thiab rau cov neeg uas deev luag pojniam luag txiv” (Henplais 13:4). Tus txiv thiab tus pojniam yog ob tug neeg sib txawv; yeej yuav muaj tej yam tsis tau txaus uas ib leeg yuav tsum txhawb nqa, totaub thiab saib xyuas ib leeg. Kev hlub thiab kev saib xyuas hauv tsevneeg ntseeg yuav tsum zoo ib yam li “hlub yus lub cev” (nqe 28-29). Txhais tau hais tias yuav tsum saib tus pojniam zoo li yog ib feem ntawm nws lub cev, ib feem ntawm nws lub neej: tus pojniam mob ces tus txiv kuj mob, tus pojniam zoo siab lossis tu siab ces tus txiv kuj zoo siab thiab tu siab ib yam (nqe 30). Tsis tas li ntawd xwb, tus pojniam yuav tsum hlub thiab hwm tus txiv. Ib leeg yuav yog ib nrab ntawm ib leeg, thiab ntawm Vajtswv xubntiag nkawd yuav yog “ib lub cev” (nqe 31, 33). Thaum peb saib tus txij nkawm zoo li yog peb tus kheej, peb yuav sib hlub ib yam li tus Tswv hlub peb.
Txojkev hlub tej zaum yuav pib ntawm txojkev xav, tiamsis yuav qhia tshwm thiab ceev txuag kom nyob ruaj khov los ntawm kev yeem poob txhua yam los txhiv: “ib yam li Yexus Khetos hlub cov ntseeg thiab nws muab nws lub cev los txhiv cov ntseeg” (nqe 25). Qhov tseeb tiag, kev txij nkawm yog ib yam dawbhuv thiab tob kawg nkaus, ib yam li Tswv Yexus txojkev hlub rau Pawg Ntseeg (nqe 32). Tswv Yexus kuj hais tias: “Nimno kuv yuav muab ib txoj kevcai tshiab rau nej: Nej ib leeg yuav tsum hlub ib leeg ib yam li kuv hlub nej. Nej ib leeg yuav tsum hlub ib leeg” (Yauhas 13:34). Tus Tswv twb ua qauv zoo rau peb, kom txij nkawm sib hlub ib yam li Nws tau hlub peb. Yuav kom tsevneeg ntseeg ua neej sib hlub raws li Vajtswv Txojlus qhia, txij nkawm yuav tsum tsa tus Tswv ua lub hauvpaus, sib kawm Vajtswv Txojlus, sib thov Vajtswv, thiab muaj tib lub siab ua Vajtswv tes haujlwm. Thov Vajtswv pab kom peb tsevneeg qhia tshwm lub neej muaj kev hlub thiab kev ncajncees, kom dhau ntawm tej ntawd peb thiaj ua tau timkhawv txog tus Tswv rau zejzog.
Thov Vajtswv,
Leej Txiv uas muaj kev hlub! Nyuam yaus tsevneeg zeem paub hais tias nyuam yaus txojkev txij nkawm yog Koj ua tus txis thiab muab pub. Thov qhia nyuam yaus ua neej nyob hauv Koj txojkev hlub, kom dhau ntawm txojkev hlub ntawd, nyuam yaus tsevneeg muaj kev kaj siab thiab ua rau Koj tau koob meej. Nyuam yaus tuav Tswv Yexus Khetos lub npe thov, Amees.
Yog peb nug cov neeg ib ncig txog peb tsevneeg txojkev ua neej, lawv yuav hais li cas?
Nyeem Vajluskub hauv peb lub xyoos: Xakhaliyas 5
Kênh Youtube BHKTHN:
