Klei Aê Diê Blŭ: Êphêsô 5:25-33
Êlan kliăng: “Ơ phung êkei mâo mô̆, brei diih khăp kơ mô̆ diih, msĕ si Krist khăp leh kơ Phung Sang Aê Diê leh anăn săn asei mlei Ñu pô kyua gơ̆” (Êphêsô 5:25)
Klei êmuh ksiêm mĭn: Hŏng ya mta klei khăp, Klei Aê Diê Blŭ bi msĕ kơ klei khăp ung mô̆? Ya klei bi knăl kơ klei khăp hlăm gŏ sang phung đăo kơ Krist? Ya klei brei drei ngă čiăng kơ gŏ sang dôk hdĭp hlăm klei khăp tui si Klei Aê Diê Blŭ mtô?
Khua ƀĭng kna Y-Pôl bi msĕ klei khăp ung mô̆ hŏng klei khăp Khua Yang kơ Phung Sang Aê Diê. Klei khăp anăn amâo djŏ jing klei khăp plah mă amâodah mgô̆ ôh; kăn djŏ jing klei djhưng ai, khăp čiăng bhiâo, amâo lŏ čiăng ôh lui hĕ! Klei khăp hlăm gŏ sang phung đăo kơ Krist jing sa klei ƀuăn rơ̆ng leh anăn săn asei ya mta klei jăk hĭn pioh kơ pô drei khăp mâo klei jăk mơak sĭt (êlan 25). Klei khăp tui si Klei Aê Diê Blŭ mtô jing rup yuôm bhăn bi ktlă klei khăp Yang Krist hŏng Phung Sang Aê Diê. Ung mô̆ srăng bi khăp hdơ̆ng diñu hŏng jih ai tiê msĕ si Khua Yang Yêsu khăp leh kơ drei.
Klei khăp hlăm gŏ sang phung đăo kơ Krist hmăng hmưi leh anăn bi đru hdơ̆ng pô čiăng mâo sa klei hdĭp jing ung mô̆ doh jăk, kpă ênô (êlan 26-27). Klei jing ung mô̆ jing doh jăk tui si Klei Aê Diê Blŭ mtô: “Brei jih jang mnuih mpŭ kơ klei bi dôk ung mô̆, đăm bi čhŏ jhưng pĭt diih ôh, kyuadah Aê Diê srăng phat kđi phung knhông leh anăn phung tlĕ piu.” (Hêbrơ 13:4). Mô̆ leh anăn ung jing dua čô mnuih mdê mdê, sĭt nik mâo lu klei kƀah čiăng bi đru rŭ, bi thâo săng brei, bi kiă kriê hdơ̆ng pô. Hnơ̆ng klei khăp, klei čiêm rông dlăng ba hlăm gŏ sang phung đăo kơ Krist, brei “khăp… msĕ si kơ asei mlei diñu pô” (êlan 28-29). Mblang jing brei yap mô̆ msĕ si sa kdrêč asei mlei pô, jing sa kdrêč klei hdĭp pô: klei ruă mô̆ ăt jing klei ruă ung, klei mơak leh anăn klei ênguôt mô̆ ăt jing klei mơak, klei ênguôt ung msĕ mơh (êlan 30). Tĭng nah mkăn, brei mô̆ khăp mpŭ kơ ung. Grăp čô srăng jing sa mkrah kơ hdơ̆ng pô leh anăn ti anăp Khua Yang diñu srăng jing “sa kđeh” (êlan 31, 33). Tơdah dlăng kơ ung kơ mô̆ pô jing msĕ si kơ drei pô, drei srăng bi khăp hdơ̆ng pô msĕ si Khua Yang khăp kơ drei.
Klei khăp năng ai kčưm dơ̆ng hŏng klei bi djhưng ai, ƀiădah srăng bi êdah leh anăn djă pioh hŏng klei săn asei mlei: “msĕ si Krist khăp leh kơ Phung Sang Aê Diê leh anăn săn asei mlei Ñu pô kyua gơ̆” (êlan 25). Boh klei sĭt, klei khăp ung mô̆ jing bruă myang yuôm bhăn msĕ si klei khăp Khua Yang hŏng Phung Sang Aê Diê (êlan 32). Khua Yang Yêsu pô ăt lač mơh: “Kâo brei klei mtă mrâo kơ diih: brei diih bi khăp hdơ̆ng diih pô; msĕ si Kâo khăp leh kơ diih, brei diih bi khăp hdơ̆ng diih pô msĕ mơh.” (Y-Yôhan 13:34). Khua Yang brei kơ drei sa hnơ̆ng čuăn bi hmô čiăng kơ ung mô̆ bi khăp msĕ si Khua Yang khăp leh kơ drei. Čiăng kơ gŏ sang phung đăo kơ Krist hdĭp thâo bi khăp msĕ si Klei Aê Diê Blŭ mtô, ung mô̆ brei dưm Khua Yang jing phŭn, hrăm mbĭt hriăm Klei Aê Diê Blŭ, hrăm mbĭt wah lač, leh anăn hrăm mbĭt sa ai hlăm klei mă bruă kơ Khua Yang. Akâo Khua Yang brei gŏ sang drei hdĭp bi êdah knhuah hdĭp thâo bi khăp, kpă ênô, čiăng kơ hŏng klei anăn drei dưi hưn bi sĭt Khua Yang kơ ƀuôn sang êpul êya.
Si arăng srăng wĭt lač tơdah mâo pô êmuh phung riêng gah drei, si knhuah hdĭp gŏ sang drei?
Wah lač: Ơ Ama kâo khăp! Gŏ sang kâo thâo kral klei jing ung mô̆ hmei kyua mơ̆ng Khua Yang pô mkŏ mjing leh anăn pô brei. Akâo Khua Yang mtô kâo hdĭp hlăm klei khăp Khua Yang čiăng hŏng klei khăp anăn, klei hdĭp ung mô̆ gŏ sang kâo mâo klei jăk mơak, bi guh kơang kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Sakari 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
