Kaulauxais 3:18-25
Nqe cim zaj kawm:
“Txhua yam uas nej ua, nej yuav tsum rau siab ntso ua ib yam li nej ua rau Vajtswv, tsis yog nej ua rau neeg” (Kaulauxais 3:23).
Lus nug xav:
– Vajtswv Txojlus qhia txojcai ua neej ncajncees hauv tsevneeg ntseeg li cas?
– Lub hauvpaus ntawm kev ua neej ncajncees hauv tsevneeg, txij thaum ub los txog niaj hnub nimno, yog dabtsi?
Tsevneeg yog txojcai uas Vajtswv teem tseg. Txhua tus yuav tsum ua neej raws li Vajtswv txojcai ncajncees, sib hwm vim paub ntshai tus Tswv, thiaj tau txais txojkev kaj siab uas Vajtswv pub. Thaum tus Tswv yog tus Tswv tiag ntawm ib tsevneeg lawm, ces txhua tus mam ua tau lub neej ncajncees, muaj kev sib hwm raws qib raws theem, thiab nyob ruaj khov ntev mus. Raws li qhov ntawd, tus pojniam yuav tsum mloog nws tus txiv, txawm yog tus txiv tsis muaj peevxwm txaus sab nrhiav nyiajtxiag, lossis kev kawm qis dua tus pojniam los xij. Kev mloog lus tsis txhais hais tias tus txiv ua yog txhua yam, tsis pub tus pojniam pab tswv yim, lossis yuav tsum mloog thaum tus txiv ua txhaum Vajtswv Txojlus, lossis yuav tsum raug tsimtxom… Tiamsis txhais hais tias hwm tus txiv yog tus sawv cev sab ntsujplig thiab yog tus thawj coj hauv tsevneeg. Hais raws lwm seem, tus txiv muaj feemxyuam coj tsevneeg hauv txojkev ntseeg, thiab yuav tsum hlub tus pojniam, “tsis txhob ua limhiam rau nws” (nqe 19). Kev txij nkawm yog lus cogtseg mus ib txhis, tsis yog kev hlub raws li lub siab xav uas hloov tau raws sijhawm. “Ua lim hiam” yog kev coj tsis muaj kev hlub, ua rau lwm tus mob siab los ntawm lus hais, kev xav lossis siv hwjchim. Timthawj Petus kuj ntuas cov txiv hais tias: “Nej cov uas ua txiv, nej yuav tsum niaj hnub nco ntsoov hais tias pojniam tsis muaj zog li nej. Yog li ntawd, nej yuav tsum saib taus nej tej pojniam, rau qhov Vajtswv yeej yuav pub txojsia rau lawv thiab rau nej ib yam nkaus. Yog nej ua li ntawd, thaum nej thov Vajtswv thiaj tsis muaj ib yam dabtsi los tab kaum nej” (I Petus 3:7).
Hais txog cov menyuam, yuav tsum mloog lus thiab hwm niamtxiv, tiamsis hauv kev ua Vajtswv haujlwm, tus Tswv yuav tsum yog tus nyob ntawm thawj (Lukas 14:26). Niamtxiv kuj yuav tsum tsis txhob hais lossis ua tej yam tsis tsimnyog ua rau menyuam npau taws lossis qaug zog. “Lam tau lam ua rau cov menyuam chim” yog kev xaiv ntsej xaiv muag, saib tsis taus, ua rau menyuam tu siab, muab menyuam mus piv rau lwm tus, cem thuam kom poob ntsejmuag, thiab qhuas tsawg dua cem.
Tej uas cov tub txib thiab cov tswv ib leeg ua rau ib leeg kuj yuav tsum ua los ntawm kev hwm Vajtswv thiab ua siab ncaj, txawm yog ntsib tus tswv uas coj nyuaj los xij (I Petus 2:18). Peb tau qhuab ntuas kom ua li ntawd, rau qhov Vajtswv Txojlus qhia hais tias: “…Nej yuav tsum nco ntsoov hais tias nej yeej yuav tau tej nqi zog uas Vajtswv khaws cia rau Vajtswv haivneeg lawm” thiab “Tus uas ua txhaum yeej yuav tau sau tej uas nws tau ua los lawm, rau qhov Vajtswv yeej tsis xaiv leej twg ntsejmuag hlo li” (nqe 24-25). Kev ua neej, tsis hais hauv tsevneeg lossis sab nraud, puavleej yuav tsum raws tib txojcai, uas yog UA RAU TUS TSWV, thiab tus Tswv yuav pub nqi zog lossis qhuab ntuas cov uas mloog lossis tsis mloog Nws lus.
Txojcai ua neej ncajncees hauv tsevneeg ntseeg, txij thaum ub los txog niaj hnub nimno, yuav tsum tsim tsa rau saum Vajtswv Txojlus hauv nqe 23 hais tias: “Txhua yam uas nej ua, nej yuav tsum rau siab ntso ua ib yam li nej ua rau Vajtswv, tsis yog nej ua rau neeg.” Thaum txhua tsevneeg ua neej ncajncees thiab sib hlub, ces lawv yuav ci qhia Vajtswv lub hwjchim rau ntau leej pom, tsevneeg yuav tau txais kev kaj siab, thiab zejzog yuav nyob ruaj khov.
Thov Vajtswv,
Leej Txiv uas hlub tshua! thov Koj pab kom nyuam yaus ua neej ncajncees, sib hlub thiab muaj feemxyuam rau txhua tus hauv nyuam yaus tsevneeg vim yog ua rau Koj. Thov cia nyuam yaus tsevneeg ci qhia Koj lub npe rau ntau leej pom. Nyuam yaus tuav Tswv Yexus Khetos lub npe thov, Amees
Peb yuav hloov yam dabtsi hauv kev ua neej nrog peb tsevneeg, thaum paub hais tias peb yuav tsum ua neej ncajncees?
Nyeem Vajluskub hauv peb lub xyoos: Xakhaliyas 4
Kênh Youtube BHKTHN:
