Mathais 12:1-8
Nqe cim:
“Vajtswv Txojlus hais tias: ‘Qhov uas kuv xav tau, yog kom nej muaj lub siab hlub, tsis yog tus tsiaj uas muab tua theej txhoj.’ Yog nej totaub zaj no lawm, nej yuav tsis rau txim rau cov uas tsis tau ua txhaum.” (Mathais 12:7)
Lus nug xav:
– Cov Falixais teem txim rau cov thwjtim vim dabtsi?
– Tswv Yexus teb lawv li cas?
– Peb kawm tau dabtsi txog kev ua neej muaj siab hlub dhau ntawm zaj no?
Cov Falixais yog cov neeg nto npe txog kev coj raws Vajtswv Txoj Kevcai nruj heev, tshwjxeeb yog kev hwm Hnub Xanpataus. Lawv tsim ntau txoj kevcai nruj thiab tsis muaj kev hlub, xws li hnub Xanpataus tsis pub de nplej lossis xuas tes tev nplej, rau qhov lawv suav hais tias yog zom nplej, ua txhaum txoj kevcai uas txwv tsis pub ua haujlwm rau hnub Xanpataus! Lawv thiaj siv tej kev cai uas lawv ntxiv ntawd los teem txim rau Tswv Yexus cov thwjtim, txawm yog cov thwjtim yeej tsis tau ua txhaum (II Kevcai 23:25).
Thaum hais lus teb thiab kuj yog lus qhia cov Falixais, qhov xubthawj, Tswv Yexus siv ib zaj keebkwm hauv Phau Qub los qhia: Thaum Vajntxwv Daviv thiab nws cov neeg tshaib plab, vim tsis muaj mov noj lawm, cov povthawj thiaj muab cov mov dawbhuv yog cov ncuav uas hloov tshiab hauv hnub Xanpataus pub rau lawv noj. Raws li txoj kevcai, cov mov ntawd tsuas pub cov povthawj noj xwb, tiamsis lawv tsis raug rau txim li (I Xamuyees 21:1-6). Zaj ob yog hais txog cov povthawj uas hnub Xanpataus tseem yuav tsum ua haujlwm fij khoom rau Vajtswv, los lawv kuj tsis raug suav hais tias ua txhaum (Teev Npe 28:9-10). Cov Falixais nyeem Vajluskub tiamsis lawv tsis totaub lub ntsiab uas Vajtswv Txojlus qhia, uas yog tibneeg tseem ceeb dua tej kevcai.
Thaum kawg, Tswv Yexus hais tias: “Vajtswv Txojlus hais tias, ‘Qhov uas kuv xav tau, yog kom nej muaj lub siab hlub, tsis yog tus tsiaj uas muab tua theej txhoj.’ Yog nej totaub zaj no lawm, nej yuav tsis rau txim rau cov uas tsis tau ua txhaum; rau qhov Neeg Leej Tub yog tus Tswv Hnub Xanpataus” (nqe 7-8). Vajtswv muab Txoj Kevcai los kom tibneeg paub lawv txojkev txhaum, khiav los cuag Tswv Yexus Khetos kom tau txojsia thiab tau suav hais tias yog neeg ncaj ncees (Loos 3:20; Kalatias 3:24), tsis yog muab los txiav txim rau tibneeg. Thaum peb siv Txoj Kevcai thiab tej kab ke nruj dhau lawm, ces txoj kevcai yuav dhau los ua cuabyeej rau txim rau tibneeg. Thaum ntawd tibneeg yuav tsis muaj kev sib hlub thiab tsis muaj lub siab hlub tshua, ntawd yog lubneej tsis haum Vajtswv siab. Txoj Kevcai lossis tej lus samhwm tsis yog tsim los khi tibneeg lossis yuam Vajtswv haivneeg ua qhev rau tej kab ke lossis tej khoom fij. Lub siab hlub tshua tseemceeb dua tej kab ke, ib yam li Tswv Yexus yog tus uas “tseemceeb dua lub Tuamtsev.” Cov Falixais coj raws txoj kevcai Hnub Xanpataus nruj thiab meej kawg, tiamsis lawv rov tso tseg yam tseemceeb tshaj hauv Txoj Kevcai, uas yog ua neej ncaj ncees, muaj kev hlub thiab muaj lub siab hlub tshua.
Lub neej ntseeg Tswv Yexus tsis yog tsuas coj raws tej lus samhwm xws li pehawm Vajtswv, fij nyiaj thiab lwm yam xwb, tiamsis kuj yuav tsum tsis txhob tso tseg lub siab hlub thiab kev hlub tshua. Timthawj Paulus qhia hais tias kev hlub yog qhov uas ua tiav Txoj Kevcai (Loos 13:10). Vajtswv saib tibneeg tseem ceeb dua tej kab ke thiab tej qauv sab nraud. Yog peb coj raws tej kevcai tiamsis tsis muaj lub siab hlub, ces peb txojkev pehawm Vajtswv yuav tsis muaj nqis li. Peb pehawm Vajtswv raws li tej kab ke, tiamsis kuj yuav tsum ua zoo thiab hlub lwm tus raws li Vajtswv Txojlus qhia. Thaum peb yuav tsum xaiv ntawm txoj kevcai thiab txojkev hlub, thov Vajtswv pab kom peb nco ntsoov Tswv Yexus tej lus hais tias: “Qhov uas kuv xav tau, yog kom nej muaj lub siab hlub!”
Thov Vajtswv,
Tus Tswv uas ncaj ncees thiab muaj lub siab hlub, thov Koj qhia nyuam yaus ua neej ncaj ncees thiab muaj kev hlub, kom ua tiav Koj tej lus qhia, thiab ua rau Leej Txiv tus uas nyob saum ntuj ceebtsheej lub npe tau koob meej. Nyuam yaus tuav Tswv Yexus Khetos lub npe thov, Amees.
Peb yuav tsum ua li cas kom peb lub neej qhia tshwm tau tus Tswv txojkev hlub tshua?
Nyeem Vajluskub hauv peb lub xyoos: Luv 1
Kênh Youtube BHKTHN:
