Daniyees 1:8-21
Nqe cim:
“Nej tsis txhob ua nej lub neej zoo li tej neeg ntiajteb ua, tiamsis nej yuav tsum cia Vajtswv hloov nej lub siab kom nej muaj lub siab tshiab. Nej thiaj yuav paub ua raws li Vajtswv lub siab nyiam. Yog nej ua li ntawd, nej thiaj paub ua qhov zoo, ua haum Vajtswv siab thiab paub ua zoo kawg nkaus” (Loos 12:2)
Lus nug rau sawvdaws xav:
– Tus tub hluas Daniyees thiab peb tug phoojywg ntsib tej kev sim siab twg?
– Lawv tau tiv dhau kev sim siab licas?
– Yuav uacas peb thiaj tsis raug txuam nrog lub ntiajteb?
Tebchaws Yixalayees raug poob mus rau cov Npanpiloos txhais tes. Cov Yixalayees raug ntes mus ua cev qhev. Nyob hauv cov neeg ntawd muaj plaub tug tub hluas muaj cev ntaj ntsug zoo tau xaiv tshwjxeeb mus kawm xyaum tej txujci kom tau ua haujlwm rau vajntxwv. Ib tug nyob hauv cov tub hluas ntawd yog Daniyees. Nws zeem paub hais tias tej zaub mov, dej haus uas vajntxwv muab pub twb raug fij rau dab lawm, raws li cov Yixalayees txojcai yog noj yuav ua rau lawv tsis huv. Plaub tug tub hluas no tabtom ntsib ib txojkev sim siab loj heev vim lawv tsuas yog cov tubqhe uas tseem hluas heev. Tiamsis, los ntawm kev txiavtxim siab tsis cia lubcev raug qias, Daniyees tau ua siab tawv thov tus thawjcoj saibxyuas pub rau Daniyees thiab nws peb tug phoojywg sim noj zaub mov, haus dej mus txog kaum hnub. Tus Tswv ua rau tus thawjcoj ntawd nyiam thiab hlub lawv heev, nws thiaj pom zoo ua li ntawd. Thaum txog sijhawm, plaub tug tub hluas Yixalayees puv thiab muaj zog tshaj cov tub hluas uas noj vajntxwv tej zaub mov. Vim li ntawd, lawv thiaj tau cai tsis noj tej zaub mov tsis huv uas vajntxwv pub ntxiv lawm. Tsis yog Vajtswv tsuas pub rau lawv muaj zog sab nqaij tawv xwb, tiamsis tseem pub lawv muaj tswvyim kev txawjntse, kawm ntawv tau zoo thiab paub ntau yam txujci. Tshwjxeeb, tseem pub rau Daniyees txawj txhais tej yogtoog thiab tej npau suav.
Los ntawm kev txiav txim siab tsis txuam nrog lwm haivneeg, tsis cia luag tej kevcai ua rau lawv raug qias sab ntsujplig, Daniyees thiab peb tug phoojywg thiaj tau tus Tswv foom koobhmoov ntau npaug ntxiv. Thaum tau coj mus cuag vajntxwv, plaub tug tub hluas ntseeg Vajtswv no ntse tshaj lwm tus. Lawv teb tau zoo dua cov neeg uas txawj saib tes lossis txawj ua yees siv uas nyob hauv vajntxwv lub tebchaws kaum npaug.
Txawm yog Daniyees ua neej nrog lwm haivneeg pe dab pe mlom, los nws yeej tsis txuam nrog lawv. Nyeem tshab phau Daniyees peb pom hais tias nws yeej ua neej muab siab npuab tus Tswv. Twb yog vim muaj kev ntseeg ruaj khov rau tus Tswv, tomqab ntawd Daniyees thiaj ua rau Vajntxwv Dali-us zeem paub tus Tswv thiab tawm lus kom thoob plaws nws lub tebchaws yuav tsum hwm thiab saib taus Vajtswv (Daniyees 6:25-27). Daniyees thiab peb tug phoojywg tau ua tiav lubneej ntseeg nrog neeg ntiajteb lawm tiag.
Niaj hnub nimno, nyob nrog cov neeg tsis hwm tus Tswv, tus ntseeg Yexus yoojyim raug txuam nrog neeg ntiajteb yog tias peb tsis xyuamxim ua raws Vajtswv Txojlus thiab cia Nws pauv hloov peb tej kev xav txhua hnub. Tus Tswv cov menyuam tsis ua neej twm zeej nkaum nkoos, tiamsis Nws xav kom peb ua neej nyob hauv ntiajteb, nrog neeg ntiajteb thiaj yuav ua tau “cov ntsev uas las neeg ntiajteb”, ua tau “lub teeb uas ci rau neeg ntiajteb pom kev”. Thov tus Tswv pab peb “tsis txhob ua… lub neej zoo li tej neeg ntiajteb ua” tiamsis txiav txim siab ua raws Vajtswv Txojlus qhia kom xwv lwm tus pom tus Tswv dhau ntawm peb lubneej uas hloov dua tshiab lawm.
Thov Vajtswv,
Tus Tswv, thov pauv hloov nyuam yaus txojkev xav, cia nyuam yaus tig los rau Koj thiab nrhiav ua raws Koj lub siabnyiam hauv lubneej txhua hnub kom xwv nyuam yaus thiaj tsis raug txuam nrog lub ntiajteb tiamsis txiavtxim siab ua raws Koj tej lus qhia. Nyuam yaus tuav Yexus Khetos lub npe thov, Amees.
Tig rov saib peb lubneej txhua hnub, peb puas muaj yam dabtsi tabtom txuam nrog lub ntiajteb?
Nyeem Vajluskub hauv peb lub xyoos: II Kevcai 12
Kênh Youtube BHKTHN:
