Klei Aê Diê Blŭ: Y-Mathiơ 16:27-28
Êlan kliăng: “Kyuadah Anak Mnuih srăng hriê mbĭt hŏng phung dĭng buăl jăk Ñu hlăm klei guh kơang Ama Ñu, leh anăn hlăk anăn Ñu srăng mưn grăp čô tui si bruă gơ̆ mă leh” (Y-Mathiơ 16:27)
Klei êmuh ksiêm mĭn: Khua Yang Yêsu lač si ngă Ñu srăng lŏ hriê? Ya klei Ñu srăng ba kơ phung sĭt suôr tui hlue Khua Yang? Ya klei mñă kơ drei mơ̆ng trăn Klei Aê Diê Blŭ anei?
Khua Yang Yêsu mjưh klei mtô kơ phung khua ƀĭng kna kơ klei hriăm “Tui Hlue Khua Yang” hŏng klei mđĭ ai prŏng snăk Ñu brei kơ digơ̆. Khua Yang lač êlâo kơ Ñu srăng hơô klei guh kơang kluôm ênŭm hlăk Ñu lŏ hriê ti lăn ala anei. Tơdah arăng kkiêng kơ Khua Yang Yêsu, Ñu jing sa čô mnuih leh anăn tŭ klei čuăn jing anak mnuih, hdĭp bi ti gŭ pô, arăng mưč mač. Khua pô hưn êlâo Y-Êsai lač êlâo leh kơ klei anei hlăm Y-Êsai 53:2-3, “Kyuadah Ñu hriê kơ prŏng leh ti Yêhôwa msĕ si sa mnơ̆ng mda arăng pla, msĕ si agha kbiă leh mơ̆ng lăn thu.
Ñu amâo mâo klei kƀăt amâodah klei kdrăm ôh tơl brei drei čiăng dlăng kơ Ñu,leh anăn amâo mâo klei siam ôh tơl drei khăp kơ Ñu. Ñu jing pô arăng bi êmut leh anăn hngah leh, sa čô mnuih bŏ hŏng klei ênguôt leh anăn thâo kral klei ruă. Msĕ si sa čô arăng mdăp ƀô̆ mta kơ Ñu, arăng bi êmut kơ Ñu, leh anăn drei amâo mpŭ kơ Ñu ôh”. Ƀiădah tơdah Khua Yang Yêsu lŏ hriê, Ñu srăng hriê mbĭt hŏng phung dĭng buăl jăk Ñu hlăm klei guh kơang Ama Ñu.
Khua Yang Yêsu amâo lač ôh kơ klei hdĭp phung amâo sĭt suôr tui hlue Khua Yang ƀiădah Ñu mñă kơ klei jăk mơak phung sĭt suôr tui hlue Khua Yang truh knhal tuč, “Ñu srăng mưn grăp čô tui si bruă gơ̆ mă leh” (êlan 27), jing Khua Yang thâo jih klei săn asei, ruă knap phung tui hlue Khua Yang klam leh, leh anăn klei Ñu pah mni srăng năng hŏng digơ̆. Khua Yang ăt ƀuăn hŏng phung ƀĭng kna hlăm êlan 28 “Sĭt nik kâo lač kơ diih, mâo đa đa dôk tinei amâo srăng djiê ôh êlâo kơ diñu ƀuh Anak Mnuih hriê hlăm ƀuôn ala mtao Ñu.” Klei ƀuăn anei jing dŭm čô hlăm phung diñu amâo guôn tơl tơdah Khua Yang lŏ hriê ôh srăng ƀuh klei guh kơang Ñu ƀiădah klă sĭt diñu srăng ƀuh asei mlei Khua Yang Yêsu mâo klei bi mlih ti dlông čŏng čư̆ (Y-Mathiơ 17:1-8).
Grăp čô drei dôk tui hlue Khua Yang ƀiădah dôk čang guôn Khua Yang Yêsu lŏ hriê mơ̆? Khua Yang Yêsu lač leh klă sĭt hlăm Klei Bi Êdah 22:12, “Nĕ anei, kâo hriê djăl djă ba mnơ̆ng kâo mưn, čiăng mưn grăp čô tui si bruă ñu ngă leh”. Khua Yang čiăng kơ knuih drei tơdah dôk čang guôn Khua Yang lŏ hriê jing brei jih ai tiê mă bruă kơ Khua Yang, srăng săn asei, myơr jih kơ Ñu kyua thâo Khua Yang ƀuh jih djăp mta klei hlăm lam drei leh anăn drei srăng hưn jih jang klei pô ngă leh ti anăp Khua Yang, “Leh anăn ti anăp Ñu amâo mâo sa mnơ̆ng hrih leh dưi dôk hgăm, ƀiădah jih jang mnơ̆ng pŏk leh anăn bi êdah leh ti anăp ală Pô drei srăng hưn bruă drei ngă”(Hêbrơ 4:13). Čang hmăng Khua Yang lŏ hriê, drei amâo dưi lŏ dơ̆ng hdĭp mgưt ôh, tui hlue Khua Yang mơ̆ng kbưi amâodah êbat ting ring dua nah tĭng, kyua hruê Khua Yang Yêsu lŏ hriê giăm snăk. Brei klam kyâo bi kal pô grăp hruê tui hlue Khua Yang, srăng săn asei, lui jih čiăng tui hlue Ñu, brei hdơr kơ Khua Yang pah mni dôk guôn mđup brei kơ grăp čô drei.
Si drei dôk tui hlue Khua Yang?
Wah lač: Ơ Khua Yang, akâo kơ Ih đru kâo dôk sĭt suôr tui hlue Ih wăt tơdah klam lu klei dleh dlan, lông dlăng, kyua thâo Ih srăng thâo ya klei dleh dlan kâo klam leh anăn kâo srăng mâo Ih pah mni tơdah Ih lŏ hriê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Yap 20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
