Lukas 14:25-27
Nqe cim:
“Yog leejtwg yuav los cuag kuv, tus ntawd yuav tsum hlub kuv heev dua li nws hlub nws niam nws txiv, nws pojniam menyuam, nws kwv nws tij, nws nkauj nws muam thiab heev dua li nws hlub nws lub cev, nws thiaj li ua tau kuv tus thwjtim” (Lukas 14:26)
Lus nug rau sawvdaws xav:
– Tswv Yexus kom tus uas raws Nws qab tso tseg yam dab tsi?
– Qhov ntawd muaj lub ntsiab li cas?
– Zaj kawm no pab tau koj coglus dab tsi rau Vajtswv?
Ib yam sim siab rau tus uas raws Tswv Yexus qab yog “kwv nws tus ntoo khaublig” nrog tus Tswv mus, qhov ntawd txhais hais tias tso txhua yam ntsigtxog yus tus kheej tseg. Yog li tus uas raws Tswv Yexus qab yuavtsum tso dab tsi tseg tiag?
“Yog leejtwg yuav los cuag kuv, tus ntawd yuav tsum hlub kuv heev dua li nws hlub nws niam nws txiv, nws pojniam menyuam, nws kwv nws tij, nws nkauj nws muam…, nws thiaj li ua tau kuv tus thwjtim” (nqe 26). Txojkev coj noj coj ua ntawm haivneeg hnub thaud hauv lo lus “ntxub” thiab “hlub” nws tsis yog ob lo lus sib tawm tsam tiamsis yog qhia hais tias yuav ua yam twg ua ntej xwb. Zoo ib yam li hauv Chivkeeb 29, Yakhauj yeej tsis “ntxub” Le-as li peb totaub vim nws nrog Le-as ua neej muaj txog xya tus menyuam. “ntxub” lossis “hlub” yog hais txog kev xaiv hlub tus no heev dua tus tom xwb. Yog li ntawd, Tswv Yexus yeej tsis qhia kom Nws cov thwjtim muaj lub siab ntxub leejtwg tiamsis Nws hu lawv los kom lawv yuav tau xaiv kom meej thiab muab Tswv Yexus saib hlob dua yus tsevneeg. Yog li ntawd, “ntxub” yus lub tsevneeg txhais hais tias hlub Tswv Yexus dua hlub yus tsevneeg xwb, yog leejtwg xav xaiv Tswv Yexus yuavtsum ua tau li Nws hais.
“Yog leejtwg yuav los cuag kuv, tus ntawd yuav tsum hlub kuv… heev dua li nws hlub nws lub cev, nws thiaj li ua tau kuv tus thwjtim” (nqe 26) – “yus lub cev” lossis “yus txoj sia” yog yam uas muaj nqis kawg nkaus ntawm ib tus tibneeg. Tus uas nrog tus Tswv mus yuavtsum hlub tus Tswv tshaj yus txoj sia. Tswv Yexus cov thwjtim tsis yog hlub Tswv Yexus tshaj lawv tsevneeg xwb tiamsis yuavtsum hlub Tswv Yexus heev dua li lawv hlub lawv lub cev thiab.
Txojkev sim siab uas cov neeg nrog tus Tswv mus ntsib yog yuavtsum tso tej yam uas yus ntshaw tseg thiab txaus siab hlo ua raws li Vajtswv lub siab nyiam. Qhov uas ua raws li Vajtswv lub siab nyiam, tsis yog kev quab yuam zoo li tus qhev thiab tus tswv, tiamsis yog mloog lus los ntawm kev hlub xwb. Muaj ib zaug yawm Abraham Lincoln pom luag muag ib tus qhev ntawm chaw muas qhev, yawm Lincoln pom hais tias nws muaj txim rau cov neeg ua qhev, nws thiaj muas tus qhev ntawd los thiab hais rau tus qhev hais tias: “thaum no koj tau ywj pheej”. Tus qhev saib yawm Lincoln thiab tsis ntseeg tej lus ntawd, nws nug hais tias: “Puas muaj tseeb tiag? Kuv puas tau mus ywj pheej rau txhua qhov uas kuv xav mus?” Yawm Lincoln teb hais tias: “muaj tseeb tiag”. Tus qhev hais tias: “yog li ntawd, tus tswv, kuv yuav ua koj tus qhev mus tas tiam neej”.
Tswv Yexus cov ntshav tau ntws los cawm peb dim ntawm“peb ntshaw kev phem kev qias thiab peb ua raws li peb lub cev thiab peb lub siab ibtxwm nyiam ua; yog li ntawd, Vajtswv yeej yuav rau txim rau peb…Vim peb nrog Yexus koom ib txojsia, Vajtswv thiaj tsa peb nrog Yexus Khetos sawv rov qab los. Vajtswv ua li ntawd kom peb tau nrog Yexus Khetos kav saum ntuj ceebtsheej” (Efexus 2:3, 6). Thov Vajtswv pab kom peb pom txog Vajtswv txojkev hlub tsis paub kawg uas Nws pub rau peb lawm, kom peb cog lus rau Vajtswv hais tias yuav tsis cia ib tus neeg twg lossis ib yam dab tsi twg hloov Tswv Yexus chaw hauv peb lub neej.
Thov Vajtswv
Tswv Yexus thov pab kom nyuam yaus nco ntsoov txog Koj txojkev hlub thiab tej koob hmoov uas Koj tau pub rau nyuam yaus lawm, kom nyuam yaus saib Koj yog txhua yam hauv nyuam yaus lub neej thiab cia Koj ua tus Tswv tshwjxeeb rau nyuam yaus lub neej xwb. Nyuam yaus tuav Tswv Yexus Khetos lub npe thov, Amees.
Peb puas cog lus yuav cia Tswv Yexus yog txhua yam rau peb lub neej?
Nyeem Vajluskub hauv peb lub xyoos: Chivkeeb 3
Kênh Youtube BHKTHN:
