Pajlug 20:7-8
Nqe cim:
“Cov menyuam uas tau koob hmoov twb yog leej txiv ua ncaj thiab ua zoo” (Pajlug 20:7).
Lus nug rau sawvdaws xav:
– Koob hmoov sab ntsujplig los qhov twg los?
– Yuav ua li cas kom peb tseg tau koob hmoov rau tej menyuam?
– Yam dabtsi tseemceeb peb xav khaws tseg qhia rau yus tej menyuam?
Koob hmoov lossis tej qubtxeeg qubteg sab ntsujplig muag tsis tau, yuav tsis tau lossis tsis poob mus li. Koob hmoov sab ntsujplig yog Vajtswv pub rau cov neeg ncaj ncees thiab lawv tej xeebntxwv. Tus neeg ua ncaj hauv nqe 7 yog tus neeg hwm tus Tswv, ua raws li tus Tswv tej kevcai qhia. Tus neeg ua ncaj, txawm yog nws tas sim neej lawm los nws paub hais tias nws tseg tau qhov zoo thiab tej qubtxeeg qubteg zoo rau tsevneeg tom qab. Tseeb tiag tiam neeg ua ntej ua qauv rau tiam tomqab. Cov neeg ua phem cajces kuj zoo li ntawd, Vajtswv yuav rau txim rau lawv tej xeebntxwv peb mus txog plaub tiam neeg. Ua neeg siab ncaj, tus Tswv foom koob hmoov rau cov neeg hwm Nws (Khiavdim 20:5-6; Pajlug 14:26).
Hauv kev ua neej peb pom hais tias yus ua neeg ncaj zoo li yog tus swb. Ua ncaj ncees zoo yam li yuav pluag. Tiamsis tus Tswv Txojlus hais tias: “Tus neeg txomnyem, tiamsis ncaj ncees zoo dua li tus npluanuj, tiamsis tsis ncaj ncees” (Pajlug 28:6). Txawm yog pluag txhua yam, los ua neeg ncaj ncees yuav tau tej koob hmoov tsis yog nws tiam xwb tiamsis tej xeebntxwv tiam tau koob hmoov nrho. Dua li ntawd, nqe 8 qhia paub: “Vajntxwv zaum ntawm lub rooj txiav txim nws pom thiab paub txhua tus tej kev phem”. Ntau leej xav yuam kev hais tias lawv tseg tau nyiaj kub, txhua yam rau tej menyuam los ntawm qhov lawv yuav nyiaj xiab, dag ntxias, ntxo lwm tus… tiamsis nqi zog ntawm tej kev txhaum lawv ua yog kev txiav txim ntawm tej nomtswv, vajntxwv, thiab txaus ntshai dua yog txojkev tuag mus ibtxhis ntawm sab ntsujplig (Loos 6:23).
Cov niamtxiv txomnyem tiamsis ua neeg zoo muaj nuj nqis dua cov niamtxiv muaj nyiaj tiamsis ho ua neeg phem. Tej laus ntsib tej no tas lawm, yog li thiaj sau tej nqe lus qhia cov ntxhais mus ua neej li no: “Nrhiav tus niamtxiv ua zoo; sawv ntxov pw lig tsis ntshaw nyiaj xiab”. Nyiaj txiag tsis yog qhov phem, thiab npluanuj kuj yog Vajtswv foom koob hmoov. Tiamsis yog vim nyiaj txiag, meejmom ua neeg tsis ncaj ncees ces yog ua txhaum rau tus Tswv thiab rau neeg. Niamtxiv tseg rau tej menyuam lub koob npe, kev ua zoo muaj nqis dua tseg tej khoom, tiamsis qhov uas tseemceeb tshaj yog qhia cov menyuam paub hwm tus Tswv kom tau txais txojsia ntev mus ibtxhis.
Thov Vajtswv pab rau cov niamtxiv paub ua tib zoo saib tus kheej kom yus ua tau tus neeg ncaj, hais tseeb, ncaj ncees rau tus Tswv, cov menyuam, siv yus lub neej ua qauv rau tej menyuam xyaum. Qhov no yog tej koob hmoov muaj nuj nqis tshaj plaws uas niamtxiv tseg rau cov menyuam. Cov menyuam kuj yuav tsum paub hwm tus Tswv, hais tseeb rau niamtxiv thiab ua lub neej ncaj ncees.
Thov Vajtswv,
Vajtswv, thov zam txim rau nyuam yaus vim ntshaw nyiaj txiag, meejmom nyuam yaus tau ua lub neej tsis ncaj ncees rau neeg, ua txhaum rau tus Tswv. Thov Koj pab kom nyuam yaus paub ua neeg ncaj ncees raws li Vajtswv Txojlus qhia, ua qauv zoo thiab tseg tej koob hmoov zoo rau cov menyuam tom qab. Amees.
Peb cheemtsum hloov kev xav, kev ua haujlwm li cas kom tseg tau tej koob hmoov zoo rau tej menyuam?
Nyeem Vajluskub hauv peb lub xyoo: Lukas 3:21-4:13
Kênh Youtube BHKTHN:
