Klei Aê Diê Blŭ: Y-Yêrêmi 44:15-19
Êlan kliăng:“Jăk mơak yơh phung êpa leh anăn mhao kơ klei kpă ênô, kyuadah Aê Diê srăng bi hrăp diñu” (Y-Mathiơ 5:6).
Klei êmuh ksiêm mĭn: Jih jang phung Yuđa bi kƀĭn ti ƀuôn Pathrôs hlăm čar Êjip ya čiăng ngă? Ya knuih bi êdah klă mơ̆ng jih jang klei diñu blŭ? Si drei ngă čiăng dưi mă tŭ klei jăk jĭn myang mơ̆ng adiê?
Wĭt lač kơ klei Yêhôwa blŭ djŏ kơ klei jhat ƀai phung Yuđa ngă leh (Y-Yêrêmi 44:11-14), “snăn jih jang phung êkei thâo leh mô̆ diñu myơr mnơ̆ng ƀâo mngưi kơ phung yang mkăn, leh anăn jih jang phung mniê dôk giăm, sa phung bi kƀĭn lu” (êlan 15). Diñu bi kƀĭn ti ƀuôn Pathrôs hlăm čar Êjip čiăng bi kdơ̆ng hŏng Khua pô hưn êlâo Y-Yêrêmi leh anăn mñă kơ klei diñu amâo gưt asăp, lač diñu amâo srăng dôk hmư̆ ôh klei gơ̆ blŭ kơ diñu hlăm anăn Yêhôwa (êlan 16). Leh anăn diñu bi êdah klei diñu ktưn ngă hŏng klei wĭt lač diñu ăt srăng ngă msĕ si phung aê, phung mtao leh anăn phung khua diñu hlăm ƀuôn prŏng čar Yuđa leh anăn hlăm êlan prŏng ƀuôn Yêrusalem, anăn jing čuh mnơ̆ng ƀâo mngưi leh anăn myơr mnơ̆ng mnăm kơ mtao mniê hlăm adiê. Diñu lŏ lač kyua ngă klei kkuh mpŭ snăn kyuanăn diñu “mâo mnơ̆ng ƀơ̆ng huă êbeh dlai, leh anăn mâo klei čăt đĭ, amâo mâo klei jhat truh ôh” (êlan 17). Diñu čŏng čiăng thâo săng soh kơ ya klei diñu dôk bi tlă anăp tơdah lač: “Ƀiădah dơ̆ng mơ̆ng hmei lui klei čuh mnơ̆ng ƀâo mngưi kơ mtao mniê hlăm adiê leh anăn tuh mnơ̆ng myơr mnăm kơ ñu, hmei kƀah djăp mta mnơ̆ng leh anăn đao gưm leh anăn klei ư̆ êpa bi rai hmei leh” (êlan 18). Leh anăn ti knhal tuč, klei phung mniê bi klă ung diñu thâo sơăi, amâo ghă ôh kơ klei diñu kkuh mpŭ anăn (êlan 19). Klei phung ƀuôn sang Aê Diê awăt hlăm klei đăo huĭ êdimima. Mơ̆ng sa boh čar mâo klei êngiê, ară anei nao jing tue hlăm čar Êjip, ƀiădah kăn diñu thâo kral leh anăn kmhal lei kơ klei soh.
Tơdah phung Yuđa ruah tui hlue êlan ală diñu čiăng, lŏ wĭt dôk hlăm čar Êjip anôk diñu jing hlŭn mphŭn dô, snăn klei đăo diñu bi mlih mơh, diñu kkuh mpŭ kơ rup yang hơăi mang hrô kơ Aê Diê Hdĭp. Knuih ai ngăm, amâo thâo hdơr knga leh anăn khăng kŏ mơ̆ng phung ƀuôn sang Aê Diê dơ̆ng bi êdah klă. Diñu trei hŏng mnơ̆ng ƀơ̆ng huă hlăm čar jing hlŭn mĭndah diñu mâo klei jăk jĭn myang. Diñu hdĭp tui si ală diñu ƀuh amâo djŏ hdĭp hŏng klei đăo kơ Klei Aê Diê Blŭ ôh ƀiădah diñu ăt mgang nanao kơ klei soh diñu ngă leh.
Khua ƀĭng kna Y-Pôl lač leh kơ phung đăo ti ƀuôn Kôrantô snei, “kyuadah drei êbat hŏng klei đăo, amâo djŏ ôh hŏng klei ƀuh” (II Kôrantô 5:7). Hruê anei, yang jhat ăt khăng brei mơh ngăn dŏ, klei mdrŏng sah lăn ala anei kơ phung tui hlue ñu. Tơdah mâo djăp mnơ̆ng ƀơ̆ng huă anak mnuih kkuh mpŭ kơ rup yang lu hĭn leh anăn čang hmăng ƀrư̆ hruê ƀrư̆ mdrŏng hĭn. Diñu amâo thâo săng ôh mnơ̆ng ƀơ̆ng huă knŏng čiêm asei mlei kđeh sui êdi sa êtuh thŭn ƀiădah bi mngăt ư̆ êpa srăng tŭ klei knap nanao hlŏng lar hlăm war pui. Êbat bĕ hŏng klei đăo čiăng dưi mă tŭ klei jăk jĭn myang mơ̆ng adiê.
Drei duah êlâo hĭn klei trei hŏng mnơ̆ng ƀơ̆ng huă hĕ amâodah klei trei mngăt?
Wah lač: Ơ Khua Yang, đru kâo djă păn kjăp Klei Ih Blŭ jing klei sĭt nik čiăng đăm kâo klah đuĕ hlăm klei mĭn soh kâo pô. Đru kâo tui duah klei jăk jĭn myang hĭn kơ mnơ̆ng lăn ala.
Dlăng Klei Aê Diê Blŭ hlăm tlâo thŭn: Y-Luk 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
