Galati 5:2-12
“Bơngai bu gơnang kơ akâu sư kơdih wă pơm kiơ̆ tơdrong juăt Môis, khan ‘Bok Kei-Dei jô̆ sư bơngai ‘lơ̆ng tơpăt hăm Sư, bơngai mă tơchĕng thoi noh, sư wă achăng lê̆ Kră Yang Yêsu Krist boih păng ‘Bok Kei-Dei ưh kơ jô̆ kơ sư bơngai ‘lơ̆ng tơpăt hăm Sư ôh.” (Galati 5:4)
Nơ̆r jet tơchĕng pơwao:
– Lu bơngai lui tơ Galati chu kăt tơdra akar lei lăi hăm tơdrong kiơ?
– Lăm trong 6 ‘bok Pôl tơ’blŏk tơbăt hơđăl tơdrong gĭt kăl lăm tơdrong dŏng pơklaih noh kiơ?
– Bơ̆n kăl kơ arih thoi yơ kơplah iŏk bơih tơdrong mơnat dŏng pơklaih yua kơ đon lui?
Lăm nơ̆r ‘Bok Kei-Dei ‘nâu, ‘bok Pôl wă pơma gom pơđĭ lu nơ̆r sư đei chih hơpong kơ bơngai Galati adrol kơ wă pơma kơ tơdrong nai. Mă mônh, trong 2-4, sư tơ’blŏk ming tơdrong đơ̆ng bơngai Galati, khan dah lu sư lui kơ nơ̆r đơ̆ng lu bơngai pơlung iĕm kăt tơdra akar, lei na tơdrong ‘noh wă khan lu sư achăng lê̆ Kră Yang Yêsu Krist păng hiong tơdrong ‘mêm. Kăl tơdra akar lăm tơdrong ‘nâu ưh pă yua bơih lăm Kră Yang Yêsu Krist đei pơm kơ lu sư (trong 2). Bơngai Galati tơchĕng khan pơm thim tơdrong juăt kăt tơdra akar lăm đon lui gô jô̆ ‘lơ̆ng tơpăt rai hloh. Mă khan lei ră, trong tơdrong dŏng pơklaih, thim tơdrong pơm ‘lơ̆ng kiơ̆ kơdih ‘noh sơngah lê̆ kơ tơmam mă ăn đĕch kơ bơ̆n.
Mă ‘bar, trong 5-6, ‘bok Pôl tơ’blŏk ming kơ bơngai Galati wă kơ ‘blŏk lu sư gơh jô̆ ‘lơ̆ng tơpăt noh “yua kơ đon lui” păng “đơ̆ng Yang Bơhngol ‘Lơ̆ng”. Sư hơlen mă hơđăl dơ̆ng tơdrong gĭt kăl lăm tơdrong dŏng pơklaih noh bơih đon lui pơm tơ’bôh hăm tơdrong ‘mêm (trong 6).
Hăm đei tơdrong ưh kơ hiôk ưh kơplah ‘bok Pôl jơ̆ng ‘bang khan: “Bu kiơ̆ Kră Yang Yêsu Krist, tơdrong kăt tơdra akar ưh kơ đei kăl kiơ ôh. Minh tơdrong lui kơ Kră Yang Yêsu Krist păng ‘mêm mơnat kơ đe, noh kăl.” (trong 6), wă khan kăt tơdra akar kư̆m bưh, ưh kơ kăt tơdra akar kư̆m huay mơ̆n, na lăm trong 2, sư khan “dah iĕm chu kơ lu sư wă pơm kơ iĕm tơdrong noh, lei iĕm ưh pă gơnang kơ Yêsu Krist bơih”. Mă tơpă, ưh kơ đei tơdrong kiơ ưh kơ hiôk lăm âu. Lăm trong 6, sư đei pơma tơdrong tơm kăl lei lăi, kăt tơdra akar ưh pă gĭt hăm lu bơngai lui dơ̆ng, mălei lăm trong 2, lăm tơdrong bơngai Galati lăng tơdrong kăt tơdra akar noh gĭt dêh, thoi noh kơplah chu kăt tơdra akar hăm đon lui thoi noh, lu sư tơbăt tơdrong Kră Yang Yêsu pơm noh ưh kơ tôm kơ tơdrong dŏng pơklaih.
Mă pêng, trong 7-12, ‘bok Pôl lơ wơ̆t khan hơđăl dôm lu tơdrong bơtho tơ kơpal ưh kơ lĕch đơ̆ng Kră Yang, bơngai mă bơtho thoi noh trŏ kơ iŏk tơdrong phak trăp tơpă. Lăm kơthơ Galati ưh kơ đei pơma hơđăl lu bơngai mă bơtho thoi noh ‘noh đơ̆ng lăm khul bơngai lui dah mă đơ̆ng nai. Bơ̆n băt thoi âu lu sư đei măt tơ khul bơngai lui Galati, đei “bơtho” (Galati 1:8-9), đei “pơtuah” (Galati 3:1), “pơhlŭ”, “pơhlŭ pơlung” “pơtuah”, “juăt kơ pơlung” bơngai lui tơ Galati (Galati 5:7-12).
Rim ‘nu kơ bơ̆n đei iŏk bơih tơdrong Kră Yang Yêsu ăn đĕch yua kơ đon lui đĕch, bơ̆n kư̆m kăl kơ “Arih” hăm đon lui hơnơ̆ng dơ̆ng. Jing bơngai chông tơ’bôh păng bơtho nơ̆r Kră Yang, bơ̆n kư̆m kăl kơ ba ăn kơ kon pơlei Kră Yang Tơdrong ‘Nao ‘Lơ̆ng mă ưh kơ đơ̆ng Kră Yang. Athei pơ’lơ̆ng yua kơ “bơngai mă pơtuah iĕm noh, mă lu sư bơngai pơm tih, pơm iĕ, ‘Bok Kei-Dei wă phak tơpă lu sư ning mônh (trong 10).
Kơkuh kơ Ih Kră Yang, apinh Ih ăn kơ inh pơgơ̆p hăm Ih păng nơ̆r Ih, wă kơ inh gơh kơjăp lăm đon lui mă đei iŏk đơ̆ng Kră Yang Yêsu Krist, ưh kơ đei tơchĕng đơ̆ng tơdrong juăt mă ưh kơ lĕch đơ̆ng Kră Yang, yua anăn Kră Yang Yêsu Krist, Amen.
Bơ̆n oei lui ngeh kơ tơdrong dŏng pơklaih yua kơ đon lui dah yua kơ tơdrong pơm ‘lơ̆ng ayơ nai?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 54
Kênh Youtube BHKTHN:
