Blŭng a 14:13-16
“Lăp Abram kơtơ̆ng khan mon sư linh ayăt rôp boih, na sư pơtơm akŭm pêng-hrĕng mơjĭt-tơhngam ‘nu bơngai mă pơhrăm lê̆ tơdrong tơblah boih, lu bơngai đĭch đam tơpŭ lăm hnam sư, na druh ‘moi lu pơtao noh truh tơ teh đak Đan.” (Blŭng a 14:14)
Nơ̆r jet tơchĕng pơwao:
– Kơplah Lot oei lăm tơdrong tơblah lei na tơdrong arih Abram thoi yơ?
– Jơhngơ̆m sư thoi yơ kơplah băt đe rôp mon sư?
– Lu bơ̆n pơhrăm iŏk tơdrong kiơ đơ̆ng tơdrong hơ’mon ‘nâu?
Kơplah Lot rơih iŏk arih tơ pơlei Sôđôm yua kơ sư tơchĕng anih ‘noh bơih, anih bơngai lơ păng mơdrŏng, hơđơ̆ng, mălei tuch luch jing tơdrong tơblah, mălei Abram tơdrong arih pha ‘biơ̆. Sư đei lơ bơngai lăm dêh noh băt kơ sư bơih “bơngai Hêbrơ” (trong 13). Krao anăn sư noh đơ̆ng adrĕch adrung Eber ‘bok yă sư (Blŭng a 11:16), tơ’bôh tơdrong arih ‘bok Abram phara kơ ‘bok Lot rơđah hơđăl dêh. Ưh kơ arih hăm teh đak nai, mă khan arih lăm pơlei Kanaan, bơngai Amôrit. Păng mă khan phara, sư arih pơm hiôk hơiă wă arih hiôk hơđơ̆ng hơdai hăm kon pơlei lăm dêh noh (trong 13). ‘Bok Abram arih hiôk hơđơ̆ng, đei anăn đe ưang păng pơm ‘lơ̆ng, lăm hnam đei truh 318 ‘nu bơngai jang kơ sư đei pơtơ̆p pơhrăm lê̆ bơih, hơmet tôm tơmam wă tơblah.
Kơtơ̆ng đe rôp mon sư, jơhngơ̆m Abram ưh kơ hiôk wă năm dŏng hloi. Lăm tơdrong arih sư, Abram đei tơdrong trŏ wă achăng lê̆ mon sư, mălei đei pơm tơ’bôh hăm jơhngơ̆m ‘mêm mơnat. Sư băt dah ưh kơ đei pơm kiơ lei na mon sư oei lăm tơdrong hli krê. Sư akŭm lu bơngai jang kơ sư păng wă blah druh ‘moi lu linh (trong 14). Pơting hăm puăn ‘nu pơtao pơgơ̆p băl linh lei na kơsô̆ Abram ưh kơ lơ ôh. Sư yua iŏk tơdrong wă tơblah “Thoi noh Abram klah asong lu đam sư, wơh năm wang lu linh ayăt kơmăng blah puh truh tơ teh đak Hôba gah yă-nơ̆m kơ pơlei Đamas.” (trong 15). Tuch luch linh Abram kĕ jei, chĕp brŏk đêl lu ayăt tơgar iŏk, păng gĭt kăl hloh noh dŏng mon sư Lot hăm kon pơlei, (trong 16).
Lăm tơdrong arih, phŏ lơ wơ̆t bơ̆n đei jơhngơ̆m ưh kơ hiôk đơ̆ng tơdrong glăi bơngai nai, păng dah bơngai noh đei tơdrong truh anat, bơ̆n ưh kơ ‘maih tơgŭm sư. Mălei Kră Yang wă kơ bơ̆n arih sa hăm đĭ đăng bơngai hăm jơhngơ̆m ‘mêm mơnat. Jơhngơ̆m ‘mêm mơnat pơchŭt ưh kơ ‘maih pơm ‘mong plơ̆, mălei “pơm ‘lơ̆ng kơ sư đĕch wih jei bơ̆n” (Rôm 12:21). ‘Noh bơih tơdrong arih trŏ thoi nơ̆r Kră Yang bơtho păng Sư lăp đon tơpă. Gĭt kăl hloh dơ̆ng, tơdrong hơ’mon kơ ‘bok Abram sư lĕch đơ̆ng tơdrong arih hiôk hơđơ̆ng sư wă pơyơ̆r lăm tơdrong tơblah dŏng ‘bok Lot ‘noh tơdrong kơmĭl ‘lơ̆ng dêh pơm kơ tơdrong tơchĕng bơ̆n gah Kră Yang Yêsu. Tơ’ngla mă đe tơpŭ kơ sư đơ̆ng adrĕch adrung ‘bok Abram, achăng anih pơtao kơpal plĕnh jur tơ lăm teh đak ‘nâu wă dŏng pơklaih kon bơngai đơ̆ng tơdrong yoch, đơ̆ng tơdrong noh na bơ̆n gơh klaih đơ̆ng tơdrong lôch hiong răm jing đei tơdrong arih păng arih đei yua. Athei tơchĕng bĕ tơdrong ‘nâu păng pơyơ̆r nơ̆r bơnê kơ Kră Yang.
Ơ Kră Yang Yêsu mă ‘mêm kơeng, bơnê kơ Ih gah kơmĭl ‘bĕnh tơdrong ‘mêm lăm jơhngơ̆m ‘bok Abram. Mălei hơdrol hloh, inh bơnê kơ Ih yua kơ Ih jur tơ lăm teh đak wă dŏng pơklaih inh klaih đơ̆ng tơdrong lôch răm yua kơ tơdrong yoch. Apinh Ih ăn kơ inh ling lang arih, tơ’bôh tơdrong ‘mêm mơnat Ih kơ kon bơngai. Krao khan yua anăn Kră Yang Yêsu Krist, Amen.
Đơ̆ng kơmĭl tơdrong arih ‘bok Abram, bơ̆n tơchĕng kiơ gah trong pơm tơ’bôh jơhngơ̆m băt bơnê kơ Kră Yang Yêsu?
Đŏk Sơ̆p Hla bơar ‘Bok Kei-Dei lăm pêng sơnăm: Jop 10
Kênh Youtube BHKTHN:
