Tơdrong jang 2:1-4
“Yang Bơhngol ‘Lơ̆ng mơ̆t ‘bĕnh kơ rim ‘nu lu sư. Na lu sư pơtơm pơma pha ra hloi nơ̆r kiơ̆ thoi Yang Bơhngol ‘Lơ̆ng ăn kơ lu sư pơma.” (Tơdrong jang 2:4)
Nơ̆r jet tơchĕng pơwao:
– Lu bơngai pơhrăm păng Sư akŭm minh anih wă khan kiơ?
– Rup kial păng ŭnh tơ’bôh tơdrong kiơ gah lăm păng tơdrong jang Yang Bơhngol ‘Lơ̆ng?
– Yang Bơhngol ‘Lơ̆ng ăn tơdrong mơsêh wă kơ lu bơ̆n pơkeh tơdrong jang ayơ?
Yang Bơhngol ‘Lơ̆ng lăm năr Phĕt Pang Tơkôt tơ’bôh lu tơdrong gĭt kăl.
Mă minh, kon pơlei Kră Yang akŭm minh anih (trong 1). Chu kiơ̆ nơ̆r Kră Yang iung arih: “Lu bơngai lui kơ Yêsu akŭm minh anih” pôm jơhngơ̆m krao khan păng chang gô. Đơ̆ng minh jơhngơ̆m noh, mơsêh ‘Bok Kei-Dei đei tơ’bôh. Đei Yang Bơhngol ‘Lơ̆ng bơ̆jang pran kơtang kơplah kon pơlei Kră Yang pôm jơhngơ̆m đon.
Mă ‘bar, tơdrong mơsêh Yang Bơhngol ‘Lơ̆ng (trong 2, 3). Yang Bơhngol ‘Lơ̆ng jur ưh tam kơ băt păng hrĕnh dêh, đei roi tơ’bôh pơtih hăm rup gơh pơm tôm tơdrong. “Thoi kial hơbŭt tih ‘bĕnh kơ hnam hloi…… Lu sư ‘bôh pla ŭnh jruh rim ‘bơ̆t lu sư.” ‘Nâu bơih lu tơdrong pơtih mơsêh păng tơdrong tơplih đơ̆ng ‘Bă pal plĕnh. Kial noh wă pơtih kơ dui jơhngơ̆m, dơhlu kial arih đơ̆ng Kră Yang ‘Bok Kei-Dei ăn (Blŭng a 2:7; Yôhan 20:22). Ŭnh pơtih gia kơ pla ŭnh lu bơngai thơ̆ hơjơ̆m, jang đĭ jơhngơ̆m păng Kră Yang ‘Bok Kei-Dei oei hơdai (LĐ Êyiptơ 3:2; Malachi 3:2). Lu jơ̆ng ‘bang đêl hli tơrơ hrei ‘nâu pơ̆n nuih bơih, nuih kơ chă ră roi tơdrong Kră Yang. Yang Bơhngol ‘Lơ̆ng ăn kơ lu sư đei tơdrong mơsêh pran kơtang đơ̆ng ‘Bok Kei-Dei, ‘bok mă tơplih lu sư, jơhngơ̆m pơ̆n nuih, păng arih ăn kơ bơngai lui. Phĕt Pang Tơkôt ‘blep trŏ thoi nơ̆r Kră Yang Yêsu đei pơkă, bơngai pơhrăm păng Sư gô hrŭk iŏk “Inh gô ăn kơ iĕm Yang Bơhngol ‘Lơ̆ng kư̆m thoi lĕ ‘Bă Inh pơkă wă ăn kơ iĕm mơ̆n. Mă-lei iĕm athei oei tơ Pơlei Jêrusalem khŏm khŏm tơ̆p mă ‘bôh Yang Bơhngol ‘Lơ̆ng đơ̆ng plĕnh jur tơ iĕm ‘mơ̆i, na iĕm jing pran hăm nuih tơpă chă bơtho đe.” (Luka 24:49).
Mă pêng, jang keh nơ̆r pơkă đơ̆ng ‘Bok Kei-Dei: Lu sư “Yang Bơhngol ‘Lơ̆ng mơ̆t ‘bĕnh kơ rim ‘nu lu sư. Na lu sư pơtơm pơma pha ra hloi nơ̆r kiơ̆ thoi Yang Bơhngol ‘Lơ̆ng ăn kơ lu sư pơma.” (trong 4).
Tơdrong hlĭch “na lu sư pơma phara hloi nơ̆r kiơ̆ Yang Bơhngol ‘Lơ̆ng ăn kơ lu sư.” Tơ’bôh Tơdrong ‘Nao ‘Lơ̆ng athei ră roi kơ đe jơ̆p kơ teh đak. Phĕt Pang Tơkôt đei pơpôi kon bơngai lăm ‘Bok Krist păng bơlŭ lê̆ nơ̆r pơma kon bơngai lăm teh đak (Blŭng a 11). Kră Yang ăn tơdrong mơsêh Yang Bơhngol ‘Lơ̆ng ưh kơ trŏ wă pơ ư kơdih akâu, mălei wă pơm keh nơ̆r tơtă Kră Yang ră roi Tơdrong ‘Nao ‘Lơ̆ng Sư. Khul bơngai lui oei wă kơ bơ̆jang tơdrong jang ‘Bok Krist lăm mơsêh Yang Bơhngol ‘Lơ̆ng.
Phĕt Pang Tơkôt ưh kơ trŏ đei roi hơ’mon tơdrong truh sơ̆ đĕch ôh, mălei oei đei truh kơ khul bơngai lui bơ̆n dang ei mơ̆n. Tơdrong pơtơm đơ̆ng hnam kơjung tơ anih mă khul bơngai krao khan, pơih jơhngơ̆m sơng iŏk tơdrong mơsêh ‘Bok Kei-Dei, păng pơyơ̆r akâu jăn kơ ‘Bok Krist. Lu bơ̆n athei pôm jơhgơ̆m lăm Yang Bơhngol ‘Lơ̆ng păng krao khan, păng chơ chă wă kơ Kră Yang oei hơdai wă kơ Yang Bơhngol ‘Lơ̆ng tơplih jơhngơ̆m bơ̆n, tơplih lu bơ̆n wă kơ jing bơngai pơ̆n nuih lăm ‘Bok Krist, ră roi tơdrong ‘mêm Kră Yang ăn đĕch tơ ala âu.
Ơ Kră Yang, inh bơnê kơ Ih đei ăn Yang Bơhngol ‘Lơ̆ng lăm năr Phĕt Pang Tơkôt. Apinh Ih ăn kơ lu nhôn minh jơhngơ̆m đon lăm tơdrong ‘mêm Ih, wă kơ lu nhôn ‘bĕnh blai Yang Bơhngol ‘Lơ̆ng Ih păng wơh lu nhôn chă ră roi tơdrong ‘mêm Ih ăn đĕch kơ nhôn. Apinh Yang Bơhngol ‘Lơ̆ng tơplih ming dơ̆ng păng chông anhăk inh, wă kơ đĭ chăl arih inh ưang kơ anăn Kră Yang. Krao khan yua anăn Kră Yang Yêsu Krist, Amen.
Yang Bơhngol ‘Lơ̆ng jur ba ăn tơdrong tơplih ‘nao lăm chăl arih bơ̆n thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong Tơ’bôh 14
Kênh Youtube BHKTHN:
