Klei Aê Diê Blŭ: Bruă Phung Khua Ƀĭng Kna 2:1-4
Êlan kliăng: “Jih jang diñu bŏ hŏng Yang Mngăt Jăk, leh anăn dơ̆ng blŭ hlăm klei blŭ mkăn, tui si Yang Mngăt Jăk brei kơ diñu blŭ” (Bruă Phung Khua Ƀĭng Kna 2:4)
Klei êmuh ksiêm mĭn: Ya ngă phung ƀĭng kna bi kƀĭn hlăm sa bĭt anôk? Rup angĭn leh anăn pui bi êdah kơ ya klei kơ knuih leh anăn bruă ngă mơ̆ng Yang Mngăt Jăk? Ya bruă Yang Mngăt Jăk brei klei myang čiăng kơ drei bi leh?
Klei Yang Mngăt Jăk trŭn hriê hlăm Knăm Pantơkôt bi êdah kơ lu klei yuôm bhăn snăk.
Tal sa, klei bi mguôp phung ƀuôn sang Aê Diê (êlan 1). Gưt asăp Khua Yang Yêsu kbiă lŏ hdĭp, “phung ƀĭng kna bi kƀĭn hlăm sa bĭt anôk” wah lač leh anăn čang hmăng. Mơ̆ng klei sa ai anăn, klei myang Aê Diê bi êdah. Yang Mngăt Jăk ngă bruă ktang snăk tơdah phung sang Aê Diê hdĭp hlăm klei sa ai.
Tal dua, klei myang Yang Mngăt Jăk (êlan 2-3). Klei Yang Mngăt Jăk trŭn bi kngăr leh anăn ktang snăk, mâo čih hŏng rup bŏ hŏng klei myang: “ênai angĭn ktang”… “êlah pui bi êdah…” Anei jing klei bi knăl kơ klei myang leh anăn klei bi mlih mơ̆ng adiê. Angĭn bi knăl kơ klei bi êwa, klei Aê Diê ƀhur êwa brei klei hdĭp (Klei Mphŭn Dơ̆ng 2:7; Y-Yôhan 20:22). Pui bi knăl kơ klei čuh, hur har leh anăn bi êdah mâo Aê Diê dôk mbĭt tinăn (Klei Kbiă 3:2; Y-Malaki 3:2). Phung ƀĭng kna tuôm huĭ hyưt ară anei jing jhŏng hưn bi sĭt kơ Aê Diê. Yang Mngăt Jăk bi êdah klei myang yuôm bhăn Aê Diê, Pô brei klei mlih mrâo, ai tiê jhŏng leh anăn klei hdĭp kơ phung đăo. Knăm Patơkôt bi sĭt djŏ hlue si klei Khua Yang ƀuăn, phung khua ƀĭng kna srăng mâo “klei myang mơ̆ng dlông trŭn kơ diñu” (Y-Luk 24:49).
Tal tlâo, bi leh bruă Aê Diê jao: Diñu “dơ̆ng blŭ hlăm klei blŭ mkăn, tui si Yang Mngăt Jăk brei kơ diñu blŭ” (êlan 4). Klei myang “blŭ hlăm klei blŭ mkăn” bi êdah Klei Mrâo Mrang Jăk brei hưn mdah kơ jih jang mnuih ƀuôn sang, jih jang ala čar. Knăm Pantơkôt bi mguôp jih jang anak mnuih hlăm Krist leh anăn bi mklăk klei mtŭk mtŭl mơ̆ng sang êñan Ƀaƀel (Klei Mphŭn Dơ̆ng11). Aê Diê brei klei myang bŏ hŏng Yang Mngăt Jăk amâo djŏ jing čiăng mpŭ kơ drei pô ôh, ƀiădah čiăng bi leh bruă klam hiu hưn Klei Mrâo Mrang Jăk. Phung Sang Aê Diê dôk mâo čiăng lŏ čuê bruă Krist hlăm klei myang Yang Mngăt Jăk .
Knăm Pantơkôt amâo djŏ knŏng jing klei mâo hƀuê ênuk ôh, ƀiădah lŏ jing boh klei lŏ čuê hlăm Phung Sang Aê Diê. Klei mphŭn dơ̆ng hlăm adŭ dlông adih ăt lŏ dơ̆ng čuê hlăm êpul êya phung đăo sa ai wah lač, pŏk ai tiê kơ klei myang Aê Diê, leh anăn myơr asei mlei kơ bruă klam mơ̆ng Krist. Brei drei lŏ dơ̆ng sa ai hlăm Yang Mngăt Jăk leh anăn wah lač, tui duah klei Aê Diê dôk mbĭt kiă kriê čiăng klei myang Yang Mngăt Jăk mlih mrâo, bi mlih phung drei jing phung hưn bi sĭt hŏng klei jhŏng kơ Krist, hiu hưn klei khăp leh anăn klei pap Ñu kơ lăn ala.
Yang Mngăt Jăk trŭn hriê ba leh si klei mlih mrâo hlăm klei hdĭp drei?
Wah lač: Ơ Khua Yang, bi mni kơ Ih brei leh Yang Mngăt Jăk hlăm Hruê Knăm Pantơkôt. Akâo kơ Ih brei klei sa ai hmei hlăm klei khăp Ih, bi bŏ hmei hŏng klei myang Ih, leh anăn tiŏ nao hmei hiu hưn bi sĭt kơ klei pap Ih. Akâo kơ Yang Mngăt Jăk lŏ dơ̆ng mlih mrâo leh anăn atăt kâo, čiăng kơ jih klei hdĭp kâo mpŭ mni Anăn Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Êdah 14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
