II Xwmtxheej Vajntxwv 20:1-4
Nqe cim:
“Yehausafas ntshai heev, nws thiaj thov tus Tswv pab. Yog li ntawd, vajntxwv thiaj samhwm kom cov pejxeem sawvdaws ua kevcai yoo movthoob lub tebchaws Yudas. Cov Yudas uas nyob txhua lub nroog puavleej tuaj rau hauv lub nroog Yeluxalees thiab thov tus Tswv pab” (II Xwmtxheej Vajntxwv 20:3-4).
Lus nug rau sawvdaws xav:
– Dab tsi ua rau Yehausafas ntshai?
– Thaum ntsib kev ntshai, vajntxwv thiab cov pejxeem ua dab tsi?
– Nej ua dab tsi thaum ntsib kev ntshai?
Hauv ntu Vajluskub no muaj lo lus hais tias, “Tau tsis ntev” yog hais txog tom qab uas Yehausafas mus thoob plaws cov Yudas tej nroog nqua hu sawvdaws los cuag tus Tswv (II Xwmtxheej 19:4) thiab tsa cov txiav txim, cob qhia lawv txiav txim “raws li tus Tswv siab nyiam”. Peb kuj pom qhov txi txiv hauv tej kev siv zog ua haujlwm coj tau kev txhim kho rau sab ntsujplig ntawm Yehausafas dhau ntawm nws tus kheej thiab cov pejxeem thaum sawv sib tim rau ib yam kev txhawj ntshai tshiab, lawv raug kev sib koom ntawm peb haiv neeg Mau-am, Amoos, thiab cov neeg ntawm roob Xe-i (II Xwmtxheej 20:22-23), yog ib lub roob hauv cov Edoos teb chaws, nyob raws tus ciam qab teb lub chaws Yudas, tuaj tua.
Muaj neeg los qhia Yehausafas hais tias “cov tubrog Edoos coob heev” (nqe 2) tuaj txog ntawm Hiavtxwv tuag sab tid, tsuas nrug deb lub nroog Yeluxalees li plaub caug kilaumev xwb. Thaum paub li ntawd, Yehausafas “ntshai heev” (nqe 3) thiab “tsis paub yuav ua li cas” (nqe 12). Tsis tso tes khiav, lossis nrhiav tswvyim saib yuav ua li cas tawm tsam yeebncuab, tiamsis vajntxwv los “thov tus Tswv pab” thiab nqua hu tej pejxeem sawvdaws ua kevcai yoo mov thov Vajtswv pab. Cov neeg Yudas mloog raws li vajntxwv nqua hu, sawvdaws sib sau tuaj ua ke rau hauv nroog Yeluxalees koom siab thov Vajtswv pab. Tas nrho tej pej xeem sawvdaws, tsis hais txivneej, pojniam thiab lawv tej me nyuam txhua tus tuaj ua ke nrhiav tus Tswv (nqe 13). Qhov uas vajntxwv Yehausafas qhia kom sawvdaws paub nrhiav tus Tswv, ua rau txhua tus muaj lub neej zoo rau sab ntsujplig.
Yog ib tug uas tau tus Tswv lees paub, yuav tsum “ua raws li Vajtswv lub siab nyiam” (II Xwmtxheej 19:3), vajntxwv Yehausafas ua tau li ntawd nyob hauv nws kev ua neej. Tsis yog los nrhiav tswvyim “saib kuv yuav ua li cas?”, lossis sab laj nrog sawvdaws saib yuav ua li cas?, thiab tsis tso siab rau tus kheej, Yehausafas los thov Vajtswv thiab tso siab rau tus Tswv.
Thaum ntsib kev nyuaj siab hauv lub neej, peb kheev ua li cas? Puas yog tsis quav ntsej, kavliam nws, mus nrhiav lwm tus pab lossis siv yus lub zog los daws tej teebmeem ntawd. Thaum ntsib kev nyuaj siab, txhawj ntshai, peb puas los cuag tus Tswv thiab thov Vajtswv pab lawm tau? Cia li kawm xyaum vajntxwv Yehausafas tus qauv zoo ntawm “ua raws Vajtswv siab nyiam thiab thov tus Tswv pab”.
Thov Vajtswv,
Tus Tswv, thov pab nyuam yaus xyaum ua raws li Yehausafas tus qauv zoo thaum ntsib kev txhawj ntshai, paub los thov Koj pab thiab tso siab rau Koj xwb, txhob tso siab rau nyuam yaus lub tswvyim lossis rau tibneeg. Amees.
Peb puas paub los thov Vajtswv pab thaum ntsib kev txhawj ntshai?
Nyeem Vajluskub hauv peb lub xyoo: Mathais 27:57-28:20
Kênh Youtube BHKTHN:
