Klei Aê Diê Blŭ: Y‑Đaniel 5:5-10; 18-30
Êlan kliăng: “Wăt êjai mâo klei tlao, ai tiê ăt mâo klei ênguôt, leh anăn êdei kơ klei hơ̆k dưi mâo klei ênguôt.” (Klei Bi Hriêng 14:13).
Klei êmuh ksiêm mĭn: Ya klei mtao Belsasar ngă leh tơl ƀuh kđiêng kngan čih ti dlông mtih? Si knhuah ñu bi êdah hlăk ƀuh boh blŭ mdê anăn? Ya ngă ka thâo săng ôh ya boh blŭ anăn čiăng ƀiădah ñu rŭng huĭ snăk sơưn? Si anak mnuih drei kreh bi êdah êjai hơ̆k mơak đei? Mâo mơ̆ ya mta klei drei čiăng knang kơ Aê Diê bi mlih drei?
Mtao Belsasar kyua mơak đei êjai čhưn ƀơ̆ng huă mnăm hŏng phung khua êmua hlăm čar, ngă sa klei soh prŏng ñu ba mnơ̆ng doh jăk hlăm Sang Yang Yêhôwa kơ diñu yua mnăm (êlan 2). “Hlăk anăn” mtam, dơ̆ng mơ̆ng ai tiê dôk hơ̆k kdơ̆k hưn ktưn kơ klei ktang klei dưi amâo mâo pô dưi mkă, khua pô hưn êlâo Y‑Đaniel čih hưn tlâo blư̆ klei mtao Belsasar “ƀô̆ mta ñu bi mlih”, “klei ñu mĭn bi rŭng ñu” (êlan 6, 9 leh anăn 10), “thung ñu awăt, leh anăn kơŭt ñu bi kpoh” hlăk mtao ƀuh mâo kđiêng kngan mnuih bi êdah leh anăn čih ti dlông mtih čŭr sang mtao, ti anăp ƀô̆ mta mtao (êlan 5-6). Klă sĭt klei ƀuh anăn mdê êdi leh anăn huĭ mduĭ êdi. Sĭt nik hŏng klei ñu tuôm thâo leh kơ bruă Aê Diê ngă leh kơ mtao ama ñu tơdah ama ñu ngă mgao (êlan 20-23), ai tiê kpă hlăm ñu kčŭt hưn bruă ñu ngă jing soh, leh anăn ñu thâo mơh hnơ̆ng kjham bruă ñu ngă soh, kyuanăn ñu ktư̆ yơ̆ng huĭ êdimima êlâo kơ ñu thâo săng klei mblang boh blŭ čih ti mtih. Tơl, leh khua pô hưn êlâo Y‑Đaniel mblang boh blŭ anăn kơ ñu, Klei Aê Diê Blŭ amâo lŏ čih hưn thiăm ôh si klei ñu ktư̆ yơ̆ng ti anăp klei truh huĭ mduĭ ñu srăng tŭ (êlan 26-27). Snăn, klei mblang boh blŭ čih anăn knŏng lŏ bi klă hĭn klei bi blŭ amâodah klei ƀuah leh hlăm lam ai tiê ñu kơ bruă ñu ngă mưč kơ Aê Diê đuč.
Hlăm klei hdĭp, bruă drei ngă êjai mơak, êjai ênguôt brei ƀuh klă mnuih sĭt drei pô jing. Klei mtao Belsasar mơak đei brei ƀuh, khădah thâo lu kơ Aê Diê leh anăn kơ bruă ñu ngă dưn, ƀiădah mtao ăt dlăng hơăi mang kơ Aê Diê. Leh anăn boh mơ̆ng klei ñu dlăng hơăi mang kơ Aê Diê, mmiă mă klei guh kơang Aê Diê jing huĭ mduĭ êdimi. Arăng bi mdjiê mtao Belsasar “Mlam anăn yơh” (êlan 30).
Ama mtao Belsasar jing mtao Nebukatnetsar tŭ klei suôt kbiă nao dôk hlăm kdrăn tač mbĭt hŏng hlô dliê (êlan 20-21). Hră H’Êsther brei ƀuh mtao Asuêrus tla ênoh yuôm kơ bruă ñu ngă êjai ai tiê ñu mơak đei, ñu yua arăng brei atăt mtao mniê čiăng bi êdah gơ̆ kơ phung ƀuôn sang leh anăn kơ phung khua dlăng msĕ si mnơ̆ng yua mprăp bi msiam, snăn ñu tŭ klei hêñ leh anăn bi mdlưh hĕ mtao mniê ñu mrâo hơ̆k kdơ̆k čiăng hưn mdah hŏng jih jang mnuih (H’Êsther 1). Mtao Hêrôt djiê mtam êjai dôk gŭ ti jhưng mtao (Bruă Phung Khua Ƀĭng Kna 12:21-23). Klei hriăm hlăm hƀuê ênuk mñă kơ drei, thâodah êjai mơak amâodah ênguôt brei hdơr nanao Khua Yang jing Mtao kơ jih jang mtao čiăng thâo krơ̆ng asei pô, hŏng jih ai tiê huĭ mpŭ kơ Aê Diê, răng kriê êlah kƀông, bruă ngă čiăng đăm ôh ngă soh dlăng hơăi mang kơ Aê Diê.
Si ngă drei tuôm mơ̆ êjai mơak đei, ngă hĕ sa mta bruă leh anăn êdei anăn amâo mâo klei êđăp ênang amâodah tŭ klei truh huĭ hyưt?
Wah lač: Ơ Khua Yang, Ih jing Mtao kâo. Akâo kơ Ih đru kâo hdơr Ih jing Mtao kơ jih jang mtao čiăng kơ kâo huĭ mpŭ kơ Ih nanao, êjai mơak amâodah êjai ênguôt.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Klei Yăl Dliê 12:1-37
Kênh Youtube BHKTHN:
