II Kauleethaus 12:5-10
Nqe cim:
“Vajtswv twb ua tej uas zoo kawg nkaus rau kuv pom lawm. Nws ntshai nyob tsam kuv khav heev nws thiaj cia kuv lub cev muaj ib qho mob. Qhov ntawd zoo li dab Ntxwgnyoog ib tug tubtxib uas muab kuv nplawm kom kuv tsis txhob khav” (II Kauleethaus 12:7).
Lus nug rau sawvdaws xav:
– Timthawj Paulus qhia paub vim licas nws tsis khav txog “tej uas zoo kawg nkaus” tus Tswv ua rau nws pom?
– Yam dabtsi ua rau nws tsis khavtheeb?
– Thaum twg peb yooj yim poob rau kev khavtheeb?
Txawm yog tau Vajtswv coj mus txog tshooj ntuj tim peb, tau coj mus txog qhov chaw uas tau zoo nyob kaj siab lug, hnov tej uas luag tsis pub leejtwg qhia (II Kauleethaus 12:1-4) los Timthawj Paulus yeej hais khov kho hais tias “…kuv zaj kuv yeej tsis khav li. Kuv tsuas khav hais txog zaj uas ua rau sawvdaws pom hais tias, kuv tsis muaj hwjchim dabtsi li xwb” (nqe 5). Ntawm no yog tej yam tseemceeb uas Timthawj Paulus tau ntsib hauv lub neej, nws kuj hais tias yog nws khav los nws yeej tsis yog neeg ruam rau qhov tej uas nws hais puavleej muaj tseeb. Tiamsis nws ceev tus kheej tsis pub hais tawm vim nws tsis xav kom lwm tus muab nws saib hlob. Nws tsuas xav kom lwm tus ntaus nqi rau nws raws li tej uas lawv pom thiab lawv hnov nws qhia lawm xwb (nqe 6).
Ib qhov ntxiv, Timthawj Paulus muaj ib yam pab nws khiav dhau kev khavtheeb. Timthawj Paulus hais tias: “…Nws ntshai nyob tsam kuv khav heev nws thiaj cia kuv lub cev muaj ib qho mob. Qhov ntawd zoo li dab Ntxwgnyoog ib tug tubtxib uas muab kuv nplawm kom kuv tsis txhob khav”. Nws tsis qhia meej hais tias qhov mob uas nws raug ntawd yog dabtsi, tiamsis nws twb thov Vajtswv kho peb zaug lawm, Vajtswv tsis pom zoo kho, Vajtswv hais rau nws hais tias: “Kuv pom zoo hlub koj ces txaus lawm. Kuv yuav pub kuv lub hwjchim rau tus uas qaug zog” (nqe 8-9). Txij thaum ntawd los, vim Tus Cawmseej, Timthawj Paulus zoo siab heev thiab khav txog tus kheej kev qaug zog kom Tus Cawmseej lub hwjchim nyob nrog nraim nws. Nws kawm tau ib zaj hais tias: “thaum kuv qaug zog thaum ntawd kuv yuav muaj zog” (nqe 9-10).
Tej uas tau ntsib hauv sab ntsujplig yog yam tseemceeb rau cov uas “nyob hauv tus Tswv”, tiamsis yog peb pheej khav txog tej yam no kom tau lwm tus qhuas ces thaum ntawd peb tabtom raug kev khavtheeb dag ntxias. Ib qhov mob yuav ua rau peb nyob khwv thiab raug mob, tiamsis raws li Timthawj Paulus, qhov ntawd pab nws kovyeej kev dagntxias khavtheeb. Vajtswv tus uas muaj kev hlub yeej muaj ntau txoj haukev rau peb, tej zaum Nws cia peb raug ib “qhov mob” lossis ib yam xwmtxheej twg, kom qhuab ntuas, pab peb saib pom txog tus kheej kev qaug zog heev dua tej yam uas peb ua tau. Thaum saib pom thiab khav txog tus kheej kev qaug zog, ces peb thiab lwm tus yuav pom “Yexus Khetos lub hwjchim” tabtom tsomkwm peb dhau ntawm txhua tes haujlwm sab ntsujplig uas peb ua.
Thov Vajtswv
Vajtswv tus uas nyuam yaus hlub! Thov ua Koj tsaug vim Koj txojkev hlub thiab txoj koobhmoov pub rau nyuam yaus. Thov pab nyuam yaus pom tus kheej kev qaug zog kom nyuam yaus paub vamkhom Koj thiab tau txais lub hwjchim sab ntsujplig txhua hnub. Amees.
Peb puas pom tus kheej kev qaug zog lossis tsuas saib pom lwm tus kev qaug zog xwb?
Nyeem Vajluskub hauv peb lub xyoos: Yauhas 7:45-8:29
Kênh Youtube BHKTHN:
https://www.youtube.com/c/bhkthn
Nyeem Vajluskub hauv peb lub xyoos: Yauhas 7:1-44
