Klei Aê Diê Blŭ: II Kôrantô 12:5-10
Êlan kliăng: “Leh anăn huĭdah kâo bi mđĭ kâo pô kyua lu êbeh klei bi êdah yuôm bhăn kâo ƀuh, Aê Diê dưm sa aruăt êruê hlăm asei mlei kâo, jing dĭng buăl Satan, čiăng bi knap kâo, huĭ kâo jing mgao” (II Kôrantô 12:7)
Klei êmuh ksiêm mĭn: Khua ƀĭng kna Y‑Pôl brei thâo ya ngă ñu amâo mđĭ ôh ñu pô kơ “klei yuôm bhăn ñu ƀuh”? Ya klei krơ̆ng ñu amâo jing mgao? Hbĭl drei ênưih lĕ hlăm klei mgao?
Wăt tơdah Aê Diê ba truh ti adiê tal tlâo, dưi nao truh ti Paradi, hmư̆ klei amâo dưi lŏ wĭt yăl dliê ôh (II Kôrantô 12:1-4) ƀiădah Khua ƀĭng kna Y‑Pôl lač nanao “…kâo amâo srăng bi mni ôh, knŏng kâo srăng bi mni kơ kâo pô kyua klei awăt kâo” (êlan 5). Anei jing sa klei tuôm ƀuh yuôm bhăn snăk, ñu pô ăt lač wăt tơdah ñu ktưn hưn lŏ yăl dliê snăn ñu ăt kăn jing mnuih mluk ôh kyuadah ñu lač klei sĭt nik. Ƀiădah ñu ư̆ ăn amâo lač ôh kyua amâo čiăng ôh arăng bi mđĭ pô. Ñu knŏng čiăng arăng lač kơ ñu djŏ msĕ si digơ̆ ƀuh leh anăn hmư̆ klei ñu blŭ đuč (êlan 6).
Êngao anăn, Khua ƀĭng kna Y‑Pôl lŏ brei thâo čiăng đru ñu đăm ngă mgao kơ ya klei bi êdah leh anăn, Aê Diê dưm leh “…sa aruăt êruê hlăm asei mlei kâo, jing dĭng buăl Satan, čiăng bi knap kâo, huĭ kâo jing mgao” . Ñu amâo lač klă ôh aruăt êruê anăn ya jing ƀiădah ñu knŏng lač lu blư̆ akâo kơ Aê Diê bi mtlaih ñu kơ klei ruă anei ƀiădah Aê Diê hngah, Ñu lač hŏng Y‑Pôl: “Klei kâo pap djăp leh kơ ih, kyuadah klei myang kâo bi êdah klă hlăm klei ih awăt” (êlan 8-9). Mơ̆ng anăn, kyua Krist, Khua ƀĭng kna Y‑Pôl hơ̆k mơak snăk leh anăn ktưn hưn kyua klei awăt ñu čiăng kơ klei ktang mơ̆ng Pô Bi Mtlaih dôk nanao hlăm ñu. Ñu thâo sa klei “êjai kâo jing awăt, hlăk anăn kâo jing ktang” (êlan 9-10).
Thâo kơ klei hdĭp mngăt jing klei yuôm bhăn kơ hlei pô“dôk hlăm Krist”, ƀiădah tơdah drei mđĭ nanao kơ pô kơ klei anei čiăng kơ arăng mpŭ snăn hlăk anăn jing drei dôk hlăm klei mplư jing mgao. Sa aruăt êruê hlăm asei mlei ngă drei ruă snăk, khădah hŏng Khua ƀĭng kna Y‑Pôl, klei anăn đru ñu dưi hŏng klei mplư jing mgao. Aê Diê khăp mâo nanao lu hdră, amâodah sa “aruăt êruê” amâodah sa klei truh, kñăm mtô mjuăt drei, đru drei ƀuh klei awăt pô hĭn kơ ƀuh klei tŭ dưn pô. Tơdah ƀuh leh anăn hưn kơ klei êdu awăt pô, drei leh anăn phung mkăn srăng ƀuh “klei ktang mơ̆ng Krist” dôk mâo hlăm klei hdĭp drei mơ̆ng djăp bruă mngăt drei dôk ngă.
Drei khăng ƀuh klei êdu awăt pô mơ̆ amâodah knŏng ksiêm duah klei êdu awăt ayŏng adei hlăm sa klei đăo?
Wah lač: Ơ Aê Diê khăp hơêng! Kâo bi mni kơ Ih kyua klei pap êbeh dlai Ih brei leh anăn klei ktang Ih kluôm ênŭm hlăm klei êdu awăt pô. Akâo kơ Khua Yang đru kâo ƀuh kơ klei êdu awăt pô čiăng knang nanao kơ Ih leh anăn mâo klei ktang myang mơ̆ng Ih.
Dlăng Klei Aê Diê Blŭ hlăm tlâo thŭn: Y‑Yôhan 7:45-8:29
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
