Êphêsô 4:32
“Iĕm athei pơm băl mă ‘lơ̆ng, băt ‘mêm mơnat kơ bôl buăl, ‘nĕ kơ jô̆ yo dih băl thoi ‘Bok Kei-Dei huay kơ jô̆ yo kơ bơ̆n yua kơ Kon Sư Yêsu Krist lôch tang bơ̆n.” (Êphêsô 4:32)
Nơ̆r jet tơchĕng pơwao:
– Pơm ‘lơ̆ng kơ đe, ‘mêm mơnat păng huay kơ jô̆ yo wă khan thoi yơ?
– Yua kơ kiơ Khul Bơngai lui athei arih ‘lơ̆ng tơpăt păng ‘mêm mơnat lăm hnam dơnŏ?
– Pơm thoi yơ wă kơ lu bơ̆n đei tơplih hăm tơdrong arih sa hăm hnam Dơnŏ bơ̆n kơdih?
Chăl arih lăm hnam dơnŏ noh jơ̆ anih đon lui lu bơ̆n mă đei hlôi đơ̆ng tơdrong pơlong păng pơm tơ’bôh nhen dêh, Êphêsô 4:32, đei tơlĕch minh nơ̆r athei pơm ‘bônh ‘bŏ mă-lei noh jrŭ hlom dêh lăm tơdrong arih. Bơngai Lui lăm hnam dơnŏ: pơm ‘lơ̆ng, ‘mêm mơnat păng huay kơ jô̆ yo. Nâu bơih jơ̆ lu tơdrong pơm tơ’bôh minh chăl arih kư̆m ‘lơ̆ng tơpăt păng kư̆m ‘mêm mơnat lăm hnam dơnŏ, Mă minh, arih ‘lơ̆ng tơpăt đei pơm tơ’bôh đơ̆ng tơdrong pơm ‘lơ̆ng păng ‘mêm mơnat. Arih ’lơ̆ng tơpăt noh ưh kơsĭ khan wer weh đơ̆ng tơdrong glăi mă ‘noh athei adrin pơm ‘lơ̆ng, pơm trŏ ‘bơ̆t anăp Kră Yang ‘Bok Kei-Dei. Lu bơngai hŏk hơgei tơdrong yang Jones SPence tơblang hơđăl lu nơ̆r “pơm ‘lơ̆ng” dah “hơlăng” noh jơ̆ ‘ngam rơngơp, lăng ngăl hơiă lăm tơdrong arih pơgăn dôm tơdrong ưh kơ ‘lơ̆ng, pơtrŭt dôm tơdrong hiôk rơngơp păng ‘lơ̆ng hơiă ; tơdrong arih rơhâu hơlăng bơ̆n arih ‘bĕnh hăm tơdrong mơnat ăn đĕch. Na “tơdrong mơnat” tơ’bôh tơdrong ‘brơ̆k đak măt, huay kơ mah anat anot dêh hăm tơdrong yoch glăi bơngai nai yua kơ bơ̆n kư̆m đei yoch glăi. Lăm hnam dơnŏ, tơdrong ‘lơ̆ng tơpăt pơm tơ’bôh hăm tơdrong hmă đĕch, yua kơ lu bơ̆n ‘maih pơm tơdrong hơnat, pơma dơnuh ưh kơ lei lăi băl, băt tơchĕng tơtăm dih băl păng băt đei mơn ‘maih pơm ‘lơ̆ng; tơdrong âu rŏ lăng băt hŭt lê̆ tơdrong ưh kơ ‘lơ̆ng, pơgŏ pơđep klo kăn, kon hơ’lơ̆p.
Mă ‘bar, arih ‘mêm mơnat đei pơm tơ’bôh tơdrong huay kơ jô̆ yo lăm hnam dơnŏ. Tơdrong ‘mêm đei pơm tơ’bôh hơđăl nhen dêh ‘noh huay kơ jô̆ yo. Nơ̆r tơm “huay kơ jô̆ yo” dah “mơnat ăn”, ‘nâu sư ‘bơm nơ̆r “mơnat ăn đĕch” mă ‘bok Pôl đei yua nơ̆r tơmam ăn đĕch đơ̆ng Kră Yang ăn lăm Yêsu Krist (Êphêsô 2:5, 7-8). Lăm tơdrong tơ’bưh tơjê̆ hăm hnam dơnŏ, tơdrong hơtŭt băl noh hơnat kơ wer weh. Mă-lei ơh sơ’ngon chhŭr nuih ‘nĕ kơ wei răk khŏm khŏm. Mơnat ăn wă khan hŭt lê̆ tơdrong blĕk ơh păng rơih iŏk tơdrong mơnat ăn. Huay kơ jô̆ yo noh pơm tơ’bôh tơdrong bơ̆n sơng iŏk đơ̆ng Yêsu Krist huay kơ jô̆ yo kơ bơ̆n. Kơplah huay kơ jô̆ yo, lu bơ̆n puh pơrăm lê̆ tơdrong blĕk ơh đơ̆ng lăm bơ̆n păng hơmet ming tơdrong tơ’bưh ‘lơ̆ng dih băl.
Bơngai Lui arih ‘lơ̆ng tơpăt păng ‘mêm mơnat mă đei iŏk tơdrong mơnat păng huay kơ jô̆ yo đơ̆ng Kră Yang Yêsu Krist ‘Bok mă lôch wă dŏng pơklaih yoch bơ̆n. Tơdah ưh kơ mơnat păng ưh kơ pơm ‘lơ̆ng hăm bơngai nai lăm hnam dơnŏ lei lu arih tơplơ̆ hăm tơdrong ‘mêm mơnat Kră Yang.
Tơdrong kơnhăm lăm hnam dơnŏ ‘noh ‘Bok Krist “thoi Yêsu Krist huay kơ jô̆ yo kơ lu iĕm” . Kơplah đei Sư pơm tơm, hnam dơnŏ jing anih ‘bĕnh hăm tơdrong ‘lơ̆ng tơpăt, ‘mêm mơnat hiôk chơt hiôk păng noh nơ̆r kơdranh ‘lơ̆ng gah Kră Yang. Athei tơchĕng hơlen gah tơdrong huay kơ jô̆ yo mă ‘Bok Krist đei ăn kơ lu bơ̆n, wă kơ tơdrong noh tơplih tơdrong arih sa lu bơ̆n wă kơ lu bơ̆n arih hăm hnam dơnŏ lu bơ̆n.
Ơ Kră Yang, bơnê kơ Ih lăm tơdrong mơnat păng huay kơ jô̆ yo đơ̆ng Ih ăn kơ inh. Apinh bơtho inh arih pơm ‘lơ̆ng, ‘mêm mơnat păng huay kơ jô̆ yo lăm hnam dơnŏ thoi Ih huay kơ jô̆ yo kơ inh lăm Kră Yang Yêsu Krist. Krao khan yua anăn Kră Yang Yêsu Krist, Amen.
Tơdrong kiơ oei pơgăn lu bơ̆n huay kơ jô̆ yo bơngai bôl juăt lăm hnam dơnŏ ?
Đŏk Hla bơar ‘Bok Kei-Dei lăm pêng sơnăm: Sachari 6
Kênh Youtube BHKTHN:
