Klei Aê Diê Blŭ: Y‑Đaniel 2:36-45
Êlan kliăng: “Ñu lač, “Ênuk truh leh, leh anăn ƀuôn ala mtao Aê Diê giăm leh. Kmhal hĕ bĕ kơ klei soh leh anăn đăo kơ klei mrâo mrang jăk” (Y‑Markôs 1:15).
Klei êmuh ksiêm mĭn: Si mblang kơ klei êpei mtao Y‑Nebukatnetsar? Klei hƀuê ênuk hưn mdah kơ klei jing sĭt leh tui si klei êpei anei? Ya gru knăl kơ ƀuôn ala mtao hlăm êlan 44 mâo? “Boh tâo” čiăng ktrâo lač kơ hlei pô? Ya klei čang hmăng ba kơ drei mơ̆ng klei hriăm anei?
Klei mblang kơ klei êpei mtao Y‑Nebukatnetsar jing klei “lŏ mâo” phung ƀuôn ala mtao hriê êdei “bi mčah leh anăn bi ƀhĭ” phung ƀuôn ala mtao êlâo ktang kjăp hĭn (êlan 39-40). Sa klei êpei kơ ƀuôn ala mtao “kiă kriê jih jang” (êlan 38) srăng bi mlih hŏng ƀuôn ala mtao “kiă kriê tar ƀar lăn ala” (êlan 39), êdei ti-anăn ƀuôn ala mtao kiă kriê tar ƀar lăn ala anei lŏ mâo sa ƀuôn ala mtao tal pă “bi joh leh anăn bi mčah jih jang mnơ̆ng” (êlan 40). Jih jang phung ƀuôn ala mtao jing ktang êdimima ƀiădah jih jang lŏ hrô mlih sơăi. Hlăm klei êpei, phung ƀuôn ala mtao hriê êdei hĭn mâo klei bi msĕ hŏng mnơ̆ng hdjul hĭn, êlưih mčah hĭn. Kyuadah snăn yơh, hlăk “boh tâo arăng bi kpĕ leh mơ̆ng čư̆ amâo djŏ hŏng kngan mnuih ôh” truh bi mčah ti jơ̆ng rup tuh, snăn jih jang prăk, mah, kông, msei leh anăn lăn lŭ rai ƀhĭ jih.
Klei hƀuê ênuk lăn ala brei ƀuh klei mtao anei êpei truh jing sĭt. Čar Ƀaƀilôn (boh kŏ ngă hŏng mah) luč lăm leh hlăm rup lăn ala čar ti lăn ala. Phung čar hgŭm gĭt Mêđơ – Persơ (đah da leh anăn păl kngan ngă hŏng prăk) kgŭ hrô mlih ƀiă lŏ mâo phung Grĕk (tian leh anăn jơ̆ng ngă hŏng kông) bi mdlưh hĕ. Knhal tuč, jing ƀuôn ala mtao Rôm (plă jơ̆ng sa kdrêč ngă hŏng msei, sa kdrêč ngă hŏng lăn lŭ) dưi mblah hŏng phung Grĕk ăt truh hruê dlưh rai mơh. Ƀiădah, klei hƀuê ênuk amâo djŏ knŏng jing klei yăl dliê kơ klei đĭ kyar kjăp ktang amâodah dluh rai phung ƀuôn ala mtao ôh. Hƀuê ênuk jing klei yăl dliê kơ sa boh ƀuôn ala mtao “amâo srăng tuôm rai luč ôh”, sa boh ƀuôn ala mtao “dôk nanao hlŏng lar” (êlan 44) mdơ̆ng hŏng “boh tâo” amâo djŏ hŏng kngan mnuih ngă ôh. “Boh tâo” truh “bi mčah msei, kông, lăn lŭ, prăk, leh anăn mah” (êlan 45), čiăng lač kơ pă boh ƀuôn ala mtao mĭndah amâo dưi dlưh rai ôh, ngă kơ diñu jing hĕ “msĕ si kam ti anôk juă mdiê êjai yan bhang, leh anăn angĭn mđung kpuh diñu, snăn amâo lŏ ƀuh diñu ôh hơăi” (êlan 35)
Mtao Y‑Nebukatnetsar amâo dưi ngă mgao amâodah knang kơ klei jing êjai leh anăn awăt êdu ƀuôn ala mtao mơ̆ng kngan phung mnuih mkŏ mjing ôh. Ƀiădah brei ñu knang kơ sa boh ƀuôn ala mtao amâo djŏ mkŏ mjing mơ̆ng kngan mnuih ôh, kngan mnuih amâo dưi bi rai ôh: jing Ƀuôn Ala Mtao Aê Diê dôk nanao hlŏng lar. Ya jing boh tâo anăn? Hdruôm Hră Klei Aê Diê Blŭ wăt Klei Bi Mguôp Hđăp leh anăn Klei Bi Mguôp Mrâo khăng bi hmô kơ Khua Yang Yêsu jing Boh Tâo (Y‑Êsai 28:16; Y‑Mathiơ 21:44; I Kôrantô 10:4). Khua Yang Yêsu kčưm mdơ̆ng leh Ƀuôn Ala Mtao Ñu hlăk Ñu hưn hlăm êlan blŭ tal êlâo hĭn kčưm dơ̆ng bi êdah bruă Ñu: “Ênuk truh leh, leh anăn ƀuôn ala mtao Aê Diê giăm leh” (Y‑Markôs 1:15a). “Ƀuôn Ala Mtao Boh Tâo” mkŏ mkra leh.
Thâo săng kơ klei jing êjai, klei đĭ kyar dluh lĕ phung ƀuôn ala mtao ti lăn ala, đru kơ drei thâo kral Aê Diê yơh jing Pô Mkŏ Mkra hƀuê ênuk. Drei kluôm dhuôm dôk hơĭt ênang tơdah dưm klei hdĭp drei hlăm kngan Ñu.
Si ngă, ti anôk ƀuôn ala mtao drei dôk tuh êyuh mkŏ mjing?
Wah lač: Ơ Khua Yang, tơdah kâo dlăng kơ klei truh prŏng ti lăn ala ară anei, akâo Ih đru kâo đăm rŭng răng ôh, ƀiădah duah klei rơ̆ng anôk Ƀuôn Ala Mtao dôk kjăp hlŏng lar Ih jing Pô Mkŏ Mkra hƀuê ênuk.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Y‑Samuel 1
Kênh Youtube BHKTHN:
