Klei Aê Diê Blŭ: Y‑Tit 3:1-2
Êlan kliăng: “Bi hdơr bĕ kơ diñu brei thâo đup gưt kơ phung khua kiă kriê leh anăn kơ phung mâo klei dưi hlăm knŭk kna, thâo gưt asăp, kăp ngă jih bruă jăk” (Y‑Tit 3:1)
Klei êmuh ksiêm mĭn: Ya ngă phung đăo kơ Khua Yang brei gưt asăp phung khua kiă kriê leh anăn phung mâo klei dưi hlăm knŭk kna? Mâo mơ̆ hlei pô amâo guôn hlue ngă? Si knuih phung ƀuôn sang hdĭp bi mơak Aê Diê brei mâo hŏng grăp čô mnuih? Si klei mđing tal êlâo drei hdĭp čiăng bi mơak kơ Aê Diê?
Y‑Tit tuôm mtô leh phung đăo ti Krêt kơ bruă klam diñu hŏng phung khua kiă kriê leh anăn phung mâo klei dưi hlăm knŭk kna ƀiădah năng ai diñu wơr leh sa čô mnuih đăo kơ Khua Yang jing dŏ Ƀuôn Ala Mtao Adiê, ăt jing mnuih ƀuôn sang kơ sa ala čar. Kyua anăn, leh mtô kơ knuih hdĭp hlăm Phung Sang Aê Diê (kdrêč 2), Khua ƀĭng kna Y‑Pôl mtô kơ knuih hdĭp hlăm ala ƀuôn hlăm klei Y‑Tit mtă, “Bi hdơr bĕ kơ diñu brei thâo đup gưt kơ phung khua kiă kriê leh anăn kơ phung mâo klei dưi hlăm knŭk kna, thâo gưt asăp,…” (êlan 1). Êlâo anăn hlăm brô 8 thŭn, Khua ƀĭng kna Y‑Pôl ăt mtô leh klei anei hlăm hră Rôm 13:1, “Brei jih jang mnuih gưt kơ phung khua kiă kriê. Kyuadah amâo mâo ôh klei dưi kiă kriê amâo kbiă hriê mơ̆ng Aê Diê, leh anăn klei dưi kiă kriê Aê Diê sơăi mjing leh”.
Jih jang djăp klei dưi, khua kiă kriê kbiă hriê mơ̆ng Aê Diê sơăi, ƀiădah bruă yua klei dưi pô mâo si ngă, tui hlue si klei ruah grăp čô mdê mdê tơdah ngă bruă kiă kriê. Knŭk kna Rôm ênŭk anăn amâo djŏ jing phung jăk ôh, ƀiădah klei anăn ăt kăn hmăi mơh kơ bruă phung đăo kơ Khua Yang brei gưt asăp phung khua kiă kriê mâo klei dưi. Khădah snăn mâo sa klei mkăn, kyua drei jing phung ƀuôn sang Ƀuôn Ala Mtao Adiê, srăng mâo boh klei amâo dưi ôh gưt asăp Aê Diê leh anăn gưt asăp arăng tơdah ngă klei soh hŏng knuih hdĭp phung đăo. Hlăk anăn, brei drei gưt asăp Aê Diê leh anăn đăo kơ Klei Aê Diê Blŭ (Bruă Phung Khua Ƀĭng Kna 5:24-29).
Khua Yang Yêsu bi mklă leh, “Jăk mơak yơh phung diih tơdah mnuih bi êmut kơ diih, tơdah diñu amâo jum ôh diih, dlao wač kơ diih, leh anăn hngah anăn diih msĕ si pô jhat kyua Anak Mnuih!” (Y‑Luk 6:22). Wăt tơdah lăn ala lui drei, ngă jhat kơ drei, snăn hlăm klei jing ƀuôn sang Ƀuôn Ala Mtao, brei drei hdĭp bi mơak kơ Aê Diê leh anăn bi guh kơang Anăn Ñu hŏng knuih hdĭp “kăp ngă jih bruă jăk”. Brei mă bruă kơ jih jang mnuih, wăt phung ngă dleh dlan, ngă jhat kơ drei; “amâo blŭ jhat kơ arăng ôh, amâo bi msao ôh, jing êdu êun, leh anăn bi êdah klei êmhač kơ jih jang mnuih” (êlan 2).
Čiăng hdĭp bi mơak kơ Aê Diê, phung đăo kơ Aê Diê brei hdĭp hlue klei mđing tal êlâo klă mngač. Tal sa “Brei ih khăp kơ Khua Yang Aê Diê ih hŏng jih ai tiê, hŏng jih mngăt, hŏng jih klei ktang, leh anăn hŏng jih klei mĭn”; tal dua “khăp kơ pô riêng gah ih msĕ si kơ ih pô” (Y‑Luk 10:27). Hlăm boh klei tuôm hŏng klei ruah srăng bi mlih klei đăo, snăn “Đăm huĭ ôh kơ klei knap mñai ih srăng tŭ…Brei ih dôk sĭt suôr tơl djiê…” (Klei Bi Êdah 2:10).
Si drei hdĭp čiăng bi êdah pô jing sa čô mnuih ƀuôn sang bi mơak kơ Aê Diê?
Wah lač: Ơ Khua Yang, kâo akâo kơ Khua Yang jing Pô Thâo Mĭn brei leh kơ kâo klei thâo mĭn čiăng kâo dưi jing sa čô mnuih ƀuôn sang bi mơak kơ Ih ti krah lăn ala. Akâo kơ Khua Yang thiăm klei ktang kơ kâo gưt nanao Klei Aê Diê Blŭ hlăm djăp boh klei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 46-47
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
