Titus 3:1-2
Nqe cim:
“Koj qhia rau cov ntseeg hais tias lawv yuav tsum hwm tej nomtswv, mloog nomtswv lus thiab zoo siab hlo ua txhua yam haujlwm zoo.” (Titus 3:1)
Lus nug rau sawvdaws xav:
– Ua li cas cov ntseeg Yexus yuav tsum mloog nomtswv lus?
– Puas muaj lwm txoj hau kev twg thiab?
– Tus neeg ua neej haum Vajtswv siab cheemtsum muaj tus cwjpwm twg rau txhua tus?
– Peb yuav ua lub neej muaj kab muaj kev twg kom haum Vajtswv siab?
Titus twb qhia rau cov ntseeg nyob koog povtxwv Kaletes ntsig txog feem xyuam lawv yuav tsum tau ua rau tej nomtswv, tiamsis tej zaum ntshai yog lawv tsis nco qab tias tus ntseeg yog neeg qaumntuj thiab nws kuj yog ib tug pejxeem nyob hauv lub tebchaws thiab. Yog li, tom qab uas qhia txog kev ua tus ntseeg nyob hauv Pawg Ntseeg (tshooj 2), Timthawj Paulus qhia txog kev ua neej nyob hauv lub tebchaws xa mus rau Titus, “Koj qhia rau cov ntseeg hais tias lawv yuav tsum hwm tej nomtswv, mloog nomtswv lus…” (nqe 1). Kwvlam li yim lub xyoo ua ntej, Timthawj Paulus kuj qhia cov lus no hauv tsab ntawv Loos 13:1, “Sawvdaws yuav tsum mloog nomtswv lus, rau qhov tej nomtswv ntawd yog Vajtswv pom zoo thiaj muaj, thiab tej nomtswv ntawd puavleej yog Vajtswv tsa.”
Tagnrho txhua yam meejmom, hwjchim puavleej yog Vajtswv tsa thiab pub cai ua, tiamsis qhov uas siv lub hwjchim yus tau li cas, yog nyob ntawm txhua tus neeg uas los ua thawjcoj. Cov nomtswv Loos hnub thaud tsis yog cov neeg zoo, yog li qhov ntawd tsis cuam tshuam cov ntseeg Yexus txojkev mloog nomtswv lus. Tiamsis muaj ib qhov txawv, vim peb yog neeg qaumntuj, yuav muaj tej yam uas peb mloog tsis tau ob tug tswv lus, peb yuav tsum mloog Vajtswv thiab ntseeg Nws tej lus heev dua (Tes Haujlwm 5:24-29).
Vajtswv yeej hais meej tias, “Thaum luag ntxub nej thiab ntiab kom nej khiav, thuam nej thiab hais tias nej yog cov neeg ua phem, vim nej ntseeg Neeg Leej Tub, nej yuav tau koob hmoov!” (Lukas 6:22). Txawm yog neeg ntiajteb ntxub, ua saib tsis taus peb, los hauv lub meejmom ua pejxeem saum ntuj Ceebtsheej, peb yuav tau ua haum Vajtswv siab thiab ua rau Nws tau ntsejmuag los ntawm peb kev ua neej “zoo siab hlo ua txhua yam haujlwm zoo”. Ua haujlwm pab txhua tus, pab cov neeg uas ua nyuaj, tsimtxom peb; “Koj qhia lawv kom lawv tsis txhob thuam leejtwg, tsis txhob nyiam sib cav sib ceg, tiamsis kom lawv ib leeg hlub ib leeg thiab nrog sawvdaws sib raug zoo” (nqe 2).
Cia kom ua tau haum Vajtswv siab, cov ntseeg Yexus yuav tau ua neej muaj kab muaj kev. Thib ib, “Hlub tus Tswv uas yog koj tus Vajtswv kawg siab kawg ntsws, kawg plab kawg plawv thiab kawg lub dag lub zog’; thiab ‘Hlub koj tej kwvtij zejzog ib yam li koj hlub koj lub cev.” (Lukas 10:27). Nyob rau lub tsamthawj yuav tau xaiv kom tau txojkev ntseeg, ces “Nej tsis txhob ntshai qhov uas nej yuav raug kev txomnyem. Nej cia li ua tib zoo mloog kuv tej lus!” (Tshwmsim 2:10).
Thov Vajtswv,
Tus Tswv, nyuam yaus thov Koj yog tus uas Tuavxam pub kev txawj ntse kom nyuam yaus ua tau tus neeg haum Koj lub siab nyiam nyob hauv lub ntiajteb no. Thov Koj ntxiv zog kom nyuam yaus niaj hnub ua raws li Koj Txojlus txhua lub sijhawm. Tuav Tswv Yexus lub npe thov, Amees.
Peb ua neej zoo li cas kom qhia paub tias peb yog tus neeg ua haum Vajtswv siab?
Nyeem Vajluskub hauv peb lub xyoo: Phau Ntawv Nkauj 46-47
Kênh Youtube BHKTHN:
