II Xwmtxheej 21:1-6
Nqe cim:
“Cov neeg ncaj ncees yuav pom zaj no thiab lawv ntshai kawg li, ces lawv yuav luag koj plig thiab hais tias, ‘Nej saib, tus neeg uas tsis cia Vajtswv ua tus pab nws, tiamsis nws pheej cia siab rau nws tej nyiaj txiag, thiab pheej rau siab ntso nrhiav kev ua phem nkaus xwb’” (Ntawv Nkauj 52:6-7).
Lus nug rau sawvdaws xav:
– Vajntxwv Yehausafas tau npaj dab tsi tseg rau nws cov menyuam?
– Keebkwm sau tseg hais tias Yehaulas yog tus vajntxwv zoo licas?
– Vajntxwv Yehausafas uas yog leej txiv muaj txim dabtsi hauv tes haujlwm no?
– Koj tabtom npaj dabtsi rau koj thiab tej xeebntxwv lub neej yav tomntej?
Vajntxwv Yehausafas npaj txhij txhua yam rau nws cov menyuam. Thaum tseem ua neej nyob, vajntxwv pub rau nws 6 tus tub ntxawg muaj txiag npluanuj thiab tsa lawv kav tej nroog loj hauv tebchaws Yudas, thiab vajntxwv xaiv tus tub hlob Yehaulas hloov nws chaw. Tiamsis nws tus tub hlob yog ib tug vajntxwv ntshaw meejmom thiab siab phem. Thaum tau ua vajntxwv, Yehaulas ua phem ua qias kawg nkaus li, uas yog muab nws cov kwv thiab cov Yixalayees tej nom ib txhia tua povtseg kom nws lub tebchaws tiaj tus thiab txeeb lawv tug los ua nws tug.
Phau Xwmtxheej qhia paub hais tias Vajntxwv Yehaulas tsuas kav tau 8 xyoo hauv nroog Yeluxalees, thiab thaum nws tuag tsis muaj leejtwg quaj thiab tshua nco li (nqe 20), ntawd yog lub cim qhia hais tias vajntxwv tsis tau Vajtswv foom koob hmoov. Keebkwm sau xaus lus hais tias Vajntxwv Yehaulas tau “ua phem ua qias ib yam li Vajntxwv Ahaj thiab lwm tus vajntxwv uas kav tebchaws Yixalayees”. Qhov uas Vajntxwv Yehaulas ua tej haujlwm phem qias li ntawd twb yog vim nws “yuav Ahaj tug ntxhais los ua pojniam” (nqe 6).
Txawm hais tias Vajntxwv Yehausafas twb npaj txhua yam zoo heev tseg rau nws cov menyuam nyob rau sab nqaij tawv lawm tiamsis nws yeej tsis npaj dabtsi rau tej me nyuam sab ntsujplig. Vajntxwv yuav Vajntxwv Ahaj uas kav Yixalayees tus ntxhais rau Yehaulas ua pojniam, thiab tus ntxhais no leej niam yog Yexenpees uas muaj moo hais tias yog neeg ua phem ua qias, yog tus uas coj tagnrho cov Yixalayees poob mus rau kev pe mlom Npa-as thiab Atates. Thaum kawg ua rau Vajntxwv Yehaulas uas kav tebchaws Yudas qabteb xyaum ua raws li cov Vajntxwv kav tebchaws Yixalayees qaumteb thiab ua tej kev phem kev qias li Ahaj tsevneeg tau ua, thaum kawg ua rau nws txiv tsevneeg puastsuaj yuav luag tas.
Kev npaj txhua yam rau tus kheej thiab cov menyuam lub neej yav tomntej yog yam cheemtsum heev, tiamsis yog tsuas xam txog nyiaj txiag, meejmom xwb, tsis quavntsej txhim kho lub plag ntawm sab kev ntseeg ruaj khov los ntawm kawm xyaum thiab ua raws li Vajtswv Txojlus ces txawm neeg ntiajteb hais tias muaj tswvyim, los raws li tus Tswv saib tuaj ces yog ruam kawg nkaus li. Thaum Vajntxwv Yehausafas pub cai rau nws tus tub yuav Ahaj tus ntxhais kom tebchaws muaj zog, saib cuag li muaj tswvyim heev tiamsis qhov tseeb yog neeg ruam kawg nkaus li, thaum kawg coj lub tsevneeg mus rau kev puastsuaj yuav luag tas. Thaum peb ntshaw tau zoo lossis ntshaw lub ntiajteb, tso Vajtswv Txojlus tseg ces thaum kawg tus kheej thiab lub cuabyig yuav raug kev ntxhov siab.
Thov Vajtswv
Tus Tswv, thov pub rau nyuam yaus muaj tswvyim kom paub txhim kho lub neej sab ntsujplig npluanuj hauv Koj thiab ua raws li Koj Txojlus hloov pauv qhov uas nqis peev rau kev npluanuj sab nqaij tawv tiamsis pluag sab ntsujplig. Amees.
Peb tabtom npaj rau tus kheej thiab tsevneeg muaj zog rau lubneej sab nqaij tawv lossis muaj zog rau sab ntsujplig?
Kênh Youtube BHKTHN:
https://www.youtube.com/c/bhkthn
Nyeem Vajluskub hauv peb lub xyoos: Yauhas 7:1-44
