II Hơ’mon 20:5-12
Kơkuh kơ lu bơngai mă mơ̆ng,
Năr âu lu bơ̆n gô tơchĕng pơwao ‘bai pơhrăm đei kơ̆l bai: Nơ̆r Krao Khan Hăm Đon Lui kiơ̆ kơ lăm Sơ̆p hla bơar Nơ̆r ‘Bok Kei-Dei II Hơ’mon 20:5-12.
5 Jêhôsaphat dơ̆ng tŏk-bŏk akŭm hơdai lu bơngai Juđa đơ̆ng rim pơlei păng pơlei Jêrusalem ‘bơ̆t cham ‘nao anăp hnam akŭm tơm Kră Yang. 6 Sư krao khan: “Ơ Kră Yang ‘Bok Kei-Dei ‘bok lu nhôn Ih hăm Kră Yang ‘Bok Kei-Dei oei kơpal plĕnh? Ih boih Kră Yang ‘Bok Kei-Dei wei pơgơ̆r đĭ kon bơngai păng đĭ kơ teh đak Lăm tơpang ti Ih đei tơdrong mơsêh pran kơtang ưh kơ đei bu kĕ tơblah hăm Ih. 7 Ơ Kră Yang ‘Bok Kei-Dei lu nhôn Hăm trŏ Ih boih pơpuh tơweh lu kon pơlei oei lăm tơring âu ‘bơ̆t anăp bơngai Isơrael Ih, na jao ăn dêh char kơ adrĕch adrung Abraham, buăl juăt Ih, oei jang sa tơ âu ling lang hlŏng-hloi? 8 Lu sư oei lăm dêh char ‘nâu păng pơdơ̆ng pơjing hnam akŭm ‘lơ̆ng rơgoh kơ Anăn Ih păng khan: 9 ‘Dah đei tơdrong kơnê̆ truh kơ lu nhôn, đao gưm, phak pơmat, dah lôch hơbuh, pơngot rơwĕt, lu nhôn gô năm dơng ‘bơ̆t anăp hnam ‘nâu, na lu nhôn krao apinh Ih lăm năr pơmat-tat, Ih mơ̆ng păng dŏng pơklaih nhôn.’ 10 ‘Nâu to lu bơngai Ammôn, kon pơlei Môap păng lu bơngai oei kơpal Kông Sêir; lu bơngai mă kơplah kon pơlei Isơrael lĕch đơ̆ng Êyiptơ Kră Yang ưh kơ ăn lu sư blah, na lu sư weh ưh kơ pơrăm đe noh ôh. 11 Lăng to, lu sư pơm plơ̆ kơ lu nhôn, ‘maih wă puh tơweh lu nhôn đơ̆ng lăm teh jang sa mă đơ̆ng Ih ăn kơ lu nhôn boih, 12 Ơ Kră Yang ‘Bok Kei-Dei lu nhôn, lei Ih ưh kơ phak lu sư hă? Tơpă, lu nhôn ưh pă đei jơhngơ̆m pran wă blah hăm lu linh lơ kơdrâ̆m noh mă oei wă wang blah lu nhôn păng lu nhôn kư̆m đĭ pă băt wă pơm liơ; mă-lei măt lu nhôn lăng chang gô Ih đĕch.”
Trong tơm ‘bai pơhrăm ‘nâu:
“…Tơpă, lu nhôn ưh pă đei jơhngơ̆m pran wă blah hăm lu linh lơ kơdrâ̆m noh mă oei wă wang blah lu nhôn păng lu nhôn kư̆m đĭ pă băt wă pơm liơ; mă-lei măt lu nhôn lăng chang gô Ih đĕch.” (II Hơ’mon 20:12)
Nơ̆r jet tơchĕng pơwao:
– Pơtao Jêhôsaphat yua kơ tơdrong kiơ wă pơyơ̆r nơ̆r krao apinh sư hăm ‘Bok Kei-Dei?
– Lu bơ̆n yua nơ̆r đơ̆ng sư krao khan âu ăn kơ bơ̆n yua iŏk thoi yơ?
Kơkuh kơ đĭ đăng,
Lăm tơdrong yoch sư kơ dih, pơtao Jêhôsaphat băt kơ sư kơdih “ưh kơ đei jơhngơ̆m pran kiơ dơ̆ng” păng kŭm “ưh kơ băt kơ wă pơm tơdrong kiơ”. Mă lei sư băt kơ dih năm hăm Kră Yang hăm jơhngơ̆m tơjur kơ dih băt kơ tơdrong tih tin ‘Bok Kei-Dei. Sư pơtơm pơma hăm tơdrong apinh lăm trong 6 wă khan pơma pơsĭt kơ tơdrong mơsêh mơyang Kră Yang ‘Bok Kei-Dei ưh kơ đei ngĭl ngŭl. Đơ̆ng rŏng kơ ‘noh sư đei tơ’blŏk lăI dôm tơdrong ‘Bok Kei-Dei đei pơm ăn kơ lu bơngai Israel (trong 7). Hơgei dêh kơplah tơ’blŏk lăI dôm tơdrong hlĭch chrơp ‘Bok Kei-Dei kơplah krao khan yua kơ tơdrong noh gô tơgŭm đon lui bơ̆n lăm Kră Yang, ư-ang kơ Sư păng tơ ‘blŏk ăn kơ bơ̆n ‘blŏk Kră Yang ‘Bok Kei-Dei ưh kơ tơ plih.
Hơrĭ pơtao Jêhôsaphat tơ’bôh đon lui sư hăm tơdrong pơkă sĭt đơ̆ng ‘Bok Kei-Dei. Lăm trong 8-9, sư tơ’blŏk lăi tơdrong đơ̆ng ‘bok pơtao Salômôn krao khan kơplah sư mơ̆t lăm hnam akŭm (II Hơ’mon 6) păng ‘Bok Kei-Dei đei mơ̆ng tơdrong krao khan ‘noh (II Hơ’mon 7:12-16). Pơtao Jêhôsaphatcho ‘bôh đon lui noh jơ̆ tơdrong gĭt kăl lăm tơdrong krao khan “ Bơngai bu ưh kơ đei đon lui, bơngai noh ‘Bok Kei-Dei ưh kơ lăp đon ôh. Bơngai bu wă năm tơ ‘Bok Kei-Dei, sư athei lui kơ đei ‘Bok Kei-Dei tơpă na ‘Bok Kei-Dei lăp đon păng athei lui kơ Sư wă tơgŭm dôm lu bơngai mă krao chă Sư” (Hêbơrơ 11:6). Đei lơ bơngai lê̆ tơdrong hơnat pat pơm ăn kơ sư đei tơdrong hli krê păng pơm kơ đon lui lăm tơdrong krao khan ưh kơ đei plei nhen thoi ‘bok Yakơ đei bơtho “ ‘Mă-lei bơ̆n athei lui kơ tơdrong bơ̆n krao khan noh gô đei tơpă, na Sư ‘maih tơgŭm. Tơ̆ng bơ̆n tơchĕng ưh kơ ngêh kơ đei, thoi noh ‘Bok Kei-Dei ưh kơ wă tơgŭm bơ̆n ôh. Bơngai tơchĕng thoi noh sư dang lĕ kơ đak dơsĭ kial dơhlu, ‘ mă pơm tơdrong kiơ kiơ sư kư̆m ưh kơ hơnơ̆ng ‘mơ̆i, yua kơ sư tơchĕng đon ‘bar pah, na ‘Bok Kei-Dei ưh kơ wă tơgŭm ôh.” (Yakơ 1:6-8)
Đon lui pơtao Jêhôsaphat păng kon pơlei pơla tơ’bôh kơ lu sư krao khan apinh đĭ jơhngơ̆m “măt lu nhôn gơnang kơ Kră Yang” (trong 12). Lu sư dơ̆ng “tơlăm hnam Kră Yang” (trong 5), anih tơ’bôh ăn kơ tơdrong ‘Bok Kei-Dei oei hơdai păng tơdrong kơkuh kơ Kră Yang ‘Bok Kei-Dei đơ̆ng lu kon pơlei pơla. Pơtao Jêhôsaphat krao khan dah Kră Yang ‘Bok Kei-Dei ưh kơ dŏng tơgŭm lu sư lei lu bơngai ayăt gô “druh lu nhôn đơ̆ng teh mă đei pơsư̆ ăn kơ lu nhôn”. Hiong teh đơ̆ng pơsư̆ kŭm hiong hloi kon Hnam Akŭm, hiong tơdrong akŭm kơkuh. Pơtao đei pơma dơnuh hăm ‘Bok Kei-Dei sư đĭ jơhngơ̆m gơnang kơ Kră Yang “Ơ Kră Yang ‘Bok Kei-Dei lu nhôn, lei Ih ưh kơ phak lu sư hă? Tơpă, lu nhôn ưh pă đei jơhngơ̆m pran wă blah hăm lu linh lơ kơdrâ̆m noh mă oei wă wang blah lu nhôn păng lu nhôn kư̆m đĭ pă băt wă pơm liơ; mă-lei măt lu nhôn lăng chang gô Ih đĕch.” (trong 12). Kơplah tơbơ̆p tơdrong hơnat pat athei tơjur akâu jăn kơ dih păng băt kơ tơdrong mơsêh mơyang Kră Yang, tơdrong tơpăt sĭt păng tơdrong ‘mêm tih kơjung đơ̆ng Kră Yang ‘Bok Kei-Dei ăn kơ lu bơ̆n.
Bĕ bơ̆n pôm jơhngơ̆m đon krao khan ,
Ơ Kră Yang, inh bơnê kơ Ih yua kơ ih tơpăt sĭt, mêm mơnat, ưh kơ ‘bônh kơ blĕk păng wă mơnat kơ inh kơplah inh kơdâu tơ Ih hăm jơhngơ̆m pơchah đĭ. Apinh Ih dŏng tơgŭm inh kơplah jơhngơ̆m hơnat pat. Yua anăn Kră Yang Yêsu Krist. Amen.
Ơ đĭ đăng bơngai mơ̆ng mă ‘mêm kơ eng,
Lu bơ̆n đei pơm thoi yơ kơ plah đei tơdrong hơnat wă kơ thim lăm đon lui lăm Kră Yang?
Gơnang kơ tơdrong mơnat đơ̆ng Kră Yang mơsêh
Kơplah dôm tơdrong hơnat pat dêh
Kră Yang dŏng kơ plah pơmat
Tơdrong mơnat rơkah rơkai lăm chăl arih
Đŏk Sơ̆p hla bơar nơ̆r ‘Bok Kei-Dei lăm tơpêng sơnăm: Êphêsô 2
Kênh Youtube BHKTHN:
