Tơdrong Pơđơ̆k 28:13a
“Bơngai bu ôn tơdrong yoch sư ưh kơ đei pŭn hiôk…” (Tơdrong pơđơ̆k 28:13a)
Nơ̆r jet tơchĕng pơwao:
– Ôn tơdrong yoch wă khan kiơ păng lĕch đơ̆ng tơdrong noh jing liơ?
– Bơ̆n gơh ôn tơdrong yoch bơ̆n hăm bơngai nai păng hăm bơ̆n kơdih thoi yơ?
– Yua kơ kiơ đe ngăl ‘maih ôn tơdrong yoch?
– Kră Yang wă kơ bơ̆n pơm kiơ kơplah tơ’bưh hăm tơdrong yoch?
Pơtao Sôlômôn bơtho ‘nĕ kơ “ôn tơdrong yoch bơ̆n”, wă khan ‘nĕ kơ ôn tơdrong yoch bơ̆n đei pơm. Lăm nơ̆r Hêbrơ đei lơ nơ̆r wă pơma gah tơdrong yoch, nơ̆r mă Pơtao Sôlômôn yua lăm nơ̆r âu pơma hơđăl tơdrong pơgăn blah plơ̆ kơ tơdrong ‘Bok Kei-Dei wă (Êsai 43:25, 27). Pơtao tơbăt yua kơ kiơ ‘nĕ kơ ôn tơdrong yoch yua kơ bơngai noh “sư ưh kơ đei pŭn”. Lăm tơm nơ̆r pơma, nơ̆r “pŭn” wă khan “đei iŏk dôm tơdrong trŏ kơ bơ̆n đei tơchĕng hơmet”. Thoi noh, kơplah minh ‘nu bơngai ôn tơdrong yoch sư” lei na sư ưh kơ iŏk tơdrong kiơ? Mă mônh, ‘Bok Kei-Dei ưh kơ đei ăn kơ bơngai ‘nâu kĕ jei lăm tơdrong ôn tơdrong yoch sư. Mă ‘bar, sư kư̆m ưh kơ ăn bơngai ‘nâu đei pŭn hiôk thoi lu sư tơchĕng kơplah ôn tơdrong yoch sư. Mă pêng, kơplah minh ‘nu bơngai “ôn tơdrong yoch sư” lei na ưh kơ đei tơdrong hơđơ̆ng păng sư gô chu iŏk đe teh pơmat sư mă gah jơhngơ̆m akâu jăn, tơdrong tơchĕng, tơdrong ‘mêm păng sĕch akar (Tơdrong Pơđơ̆k 28:1; Hơriso 32:3-4).
Dang ei, minh ‘nu bơngai gơh ôn tơdrong yoch hăm bơngai nai hăm tơdrong glăi thoi kơ: Pơma hơlĕnh, tơpŭ kơ bơngai nai dah mă pơma dŏng kơdih đơ̆ng dôm tơdrong sư pơm. Đe ưh kơsĭ ôn tơdrong mă đei pơm yoch hăm bơngai nai đĕch ôh na kư̆m tơdrong yoch hăm bơ̆n kơdih. Lơ bơngai hơlĕnh bơ̆n kơdih kơplah chă trong wă dŏng tơdrong glăi kơdih, ding mah sư tơchĕng khan sư pơm thoi noh trŏ! Bơngai nai chu iŏk kơdih glăi mălei ưh kơ ‘maih achăng tŭk. Đei bơngai chă trong pơlung jơhngơ̆m kơdih wă kơ hơđơ̆ng kơplah pơm yoch na khan lơ bơngai kư̆m pơm thoi noh wă dŏng đơ̆ng tơdrong sư pơm yoch kơdih. Đei lơ bơngai yua iŏk tơdrong hrăt hrot ưh kơ rơhơi, mă loi sư tơdrong jang lăm tơdrong lui, wă ôn lê̆ tơdrong yoch kơdih…
Yua kơ kiơ đe ngăl ôn tơdrong yoch kơdih? Yua kơ jơhngơ̆m pơang ưh kơ ‘maih jô̆ kơdih yoch, hli kơ pŭ iŏk đơ̆ng tơdrong yoch, păng hli achăng tŭk tơdrong yoch bơ̆n đei pơm! Đei minh tơdrong pha gĭt găl dêh, lu bơngai “ôn tơdrong yoch sư” ngăl ưh kơ ‘maih tơ’bôh tơdrong yoch bơngai nai! Rŏ lăng yua kơ lu sư ‘maih wă kơ đe khul tơpôl lăng tơ bơngai nai, dah mă dŏng kơdih na khan đe kư̆m pơm yoch thoi bơ̆n, dah mă tơ jur bơngai nai, atŏk bơ̆n kơdih.
Jing bơngai lui, Kră Yang wă kơ rim ‘nu kơ bơ̆n kơplah tơ’bưh hăm tơdrong yoch đơ̆ng bơngai nai, kăl kơ đei jơhngơ̆m ‘mêm băt mơnat, ‘nĕ kơ lăng tơdrong lu sư, mălei tơgŭm lu sư tơbral (Tơdrong pơđơ̆k 10:12); na dah tơ’bưh hăm tơdrong yoch bơ̆n kơdih, ‘nĕ kơ ôn na athei roi tơdrong yoch, tơbral wă kơ Kră Yang mơnat.
Kơkuh kơ Ih Kră Yang, apinh Ih ăn kơ jơhngơ̆m păng tơdrong tơchĕng inh ‘bônh kơ băt tơdrong yoch inh pơm, păng đei jơhngơ̆m iŏk đon ala wă chu iŏk tơdrong yoch noh, năm tơ Ih wă chă tơdrong mơnat đơ̆ng Ih, krao khan yua anăn Kră Yang Yêsu Krist, Amen!
Bơ̆n hăm đei chă trong wă ôn tơdrong yoch bơ̆n kơdih ưh?
Đŏk Sơ̆p Hla bơar ‘Bok Kei-Dei lăm pêng sơnăm: I Yôhan 1
Kênh Youtube BHKTHN:
