Klei Aê Diê Blŭ: I Kôrantô 5:1-8
Êlan kliăng: “Ơ phung ayŏng adei, kâo kwưh kơ diih kyua klei Aê Diê pap, myơr bĕ asei mlei diih jing mnơ̆ng ngă yang hdĭp, doh jăk, bi mơak kơ Aê Diê. Klei anăn jing klei kkuh mpŭ djŏ kơ Aê Diê” (Rôm 12:1)
Klei êmuh ksiêm mĭn: Si bruă kjham snăk dôk mâo hlăm klei hdĭp đa đa phung đăo ti Kôrantô? Ya ngă klei soh anei brei “jao hĕ êkei anăn kơ Satan” ? Ya Klei Aê Diê Blŭ hruê anei ƀuah mkra leh anăn mñă kơ drei?
Sa bruă kjham snăk mkăn dôk mâo hlăm Phung Sang Aê Diê Kôrantô jing klei ngă knhông. Anăn jing tinei mâo sa čô êkei dôk hŏng mô̆ hjŭng ama ñu (êlan 1). Dôk mô̆ hjŭng ama amâo djŏ knŏng jing sa klei soh kjham snăk kơ knuih hdĭp ôh, ƀiădah ksiêm dlăng kơ knhuah hdĭp, hnơ̆ng čuăn ala ƀuôn ăt kăn dưi tŭ ư mơh. Anei jing klei bhiăn Aê Diê klă sĭt kăm leh (Bruă Lêwi 18:8). Tơdah lač “arăng amâo tuôm ƀuh ôh wăt ti krah phung tue”, Khua ƀĭng kna Y-Pôl bi kngăr snăk leh anăn jih ai tiê ruă ai tiê kyua klei soh kjham snăk mâo hlăm Phung Sang Aê Diê, leh anăn kyua anăn jing klei soh bi čhŏ Anăn Aê Diê. Boh blŭ “phat leh kđi” Khua ƀĭng kna Y-Pôl yua brei ƀuh anei jing sa klei soh kjham (êlan 4). Leh anăn klei kpĭ mjuăt mnuih ngă klei knhông brei tŭ jing “jao kơ Satan”, jing mjưh klei bi mguôp sĭt suôr, hŏng klei kñăm đru kơ mnuih ngă soh kmhal klei soh čiăng “čiăng kơ mngăt ñu dưi tlaih hlăm hruê Khua Yang Yêsu” (êlan 5).
Lu blư̆ drei lač klei soh anei amâo djŏ tuôm kơ drei kyua drei amâo mâo klei mĭn knhông msĕ snăn ôh. Akâo kơ Khua Yang đru grăp čô drei hdơr kơ Klei Blŭ Khua Yang Yêsu lač hlăm Y-Mathiơ 5:28 snei, “Ƀiădah kâo lač kơ diih, hlei pô dlăng kơ mniê hŏng klei ƀô čiăng ngă soh, tlĕ piu leh hŏng mniê anăn hlăm ai tiê ñu”. Hlue si hnơ̆ng čuăn Khua Yang, klei knhông dôk hlăm klei mĭn leh anăn klei tluh čiăng hlăm ai tiê amâo djŏ knŏng bruă ngă ôh. Kyua anăn, drei hdĭp leh amâo doh jăk msĕ mơh tơdah dlăng hlăm đĭng blŭ leh anăn dôk dlăng kơ rup bi êdah klei knhông, dlăng klei čih kơ klei khăp mniê êkei knhông, dlăng phim rup klei knhông čiăng kơ asei mlei kma êlam leh anăn bi mĭn kơ klei anăn. Amâo ênưih ôh tui hlue hnơ̆ng čuăn doh jăk Khua Yang tơdah dôk hlăm ênuk hŏng klei mĭn êngiê hlăm klei bi dôk mniê êkei jing đĭ kyar, mrâo mrang, bi klei čih hlăm Klei Aê Diê Blŭ snăn arăng lač amâo lŏ djŏ hŏng ênuk ôh. Tơdah amâo mdih, drei ăt srăng lač klei soh ngă knhông bi dôk êkei mniê êlâo kơ jing ung mô̆, bi dôk hdơ̆ng êkei, hdơ̆ng mniê jing amâo dih nei ôh hŏng mta phŭn “bi khăp leh anăn čŏng ngă dưi leh”, msĕ si phung amâo mâo đăo khăng lač.
Thâo săng, êlâo kơ đăo kơ Khua Yang, lu mnuih tuôm yua leh asei mlei pô kơ klei hlăp lêñ klei soh, Khua ƀĭng kna Y-Pôl mtă kơ phung đăo ti Rôm “myơr asei mlei diih jing mnơ̆ng ngă yang hdĭp, doh jăk” mơ̆ng klei bi mlih klei mĭn, hŏng bruă thâo răng hŏng klei drei hriăm hlăm klei mĭn pô. Tơdah mâo ya klei mĭn amâo doh jăk, hlăm klei hdĭp bi dôk êkei mniê drei, akâo kơ Khua Yang đru drei mâo knuih khut khat lui klei anăn.
Grăp hruê, si ngă drei čiêm rông klei mĭn drei hŏng Klei Aê Diê Blŭ amâodah hŏng klei tui lăn ala?
Wah lač: Ơ Khua Yang, akâo kơ Ih đru kâo mlih mrâo klei mĭn grăp hruê hŏng klei bi bŏ ai tiê klei mĭn hŏng Klei Aê Diê Blŭ leh anăn ya klei doh, jăk siam hlăm Khua Yang . Akâo kơ Ih đru kâo hdĭp doh jăk wăt hlăm klei mĭn leh anăn bruă ngă. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Êdah 19
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
