II Xwmtxheej Vajntxwv 20:20-30
Nqe cim:
“Thaum kuv tseem ua neej nyob, kuv yuav qhuas tus Tswv, kuv yuav hu nkauj qhua kuv tus Vajtswv mus tas kuv simneej” (Phau Ntawv Nkauj 146:2).
Lus nug rau sawvdaws xav:
– Ua ntej yuav mus ntaus rog, Vajntxwv Yehausafas ua dabtsi?
– Vajntxwv thiab tus Tswv haivneeg kev ntaus rog xaus ntawm tes haujlwm dabtsi?
– Tej haujlwm uas lawv ua rau lub sijhawm ntawd yog dabtsi?
– Peb kawm tau Vajntxwv Yehausafas tus qauv zoo li cas?
Ua raws li tus Tswv tej lus hais, sawv ntxov hnub tom qab Vajntxwv Yehausafas nrog cov tubrog thiab cov Levis mus tom roob mojsab qhua ze lub nroog Tekau-as, kwv yees li 40 kilumev mus rau sab qabteb ntawm lub nroog Yeluxalees, ntaus cov yeebncuab tuaj txeeb tebchaws. Thaum sawv kev mus, Vajntxwv Yehausafas txhawb cov pejxeem zog kom cia siab rau tus Tswv thiab Nws tej lus qhia los ntawm cov cevlus, uas yog Yahaxiyees tej lus qhia hais tias Vajtswv ntaus rog rau lawv thiab lawv yuav pom Nws pab lawv. Tom qab uas nrog cov pejxeem sib tham tas, tsis yog tso cov tubrog nqa ntaj nqa riam mus ua ntej tiamsis Vajntxwv Yehausafas thiab cov Levis sawv kev mus ua ntej, lawv ib ke mus ib ke hu nkauj qhuas tus Tswv. Thaum lub suab nkauj qhuas tus Tswv nrov, tus Tswv ua rau cov yeebncuab rov tig los sib tua. Vajntxwv Yehausafas thiab tus Tswv haivneeg tsuas yog mus khaws tej khoom uas yog yeebncuab tug tau peb hnub, vim muaj “ntau heev”, qhia paub tus Tswv lub hwjchim muaj yeej loj kawg nkaus. Mus txog hnub thib plaub, lawv thiaj mus sib sau rau hauv ib lub hav pehawm thiab ua tus Tswv tsaug. Ntawm no lawv hu nkauj qhuas tus Tswv, yog li ntawd lawv thiaj tis npe rau qhov chaw no hu ua lub Hav Npelekas, txhais tau hais tias yog lub hav koob hmoov. Thaum rov los txog tsev lawv tshuab raj tshuab xyu, ntaus nruas npuaj mus rau hauv lub Tuamtsev nroog Yeluxalees pehawm tus Tswv.
Thaum raug cov yeebncuab muaj zog tuaj tua, Vajntxwv Yehausafas thiab cov pejxeem thov tus Tswv hais tias lawv tsis paub yuav ua li cas, tiamsis qhov tseeb tiag lawv twb ua tau yam uas ntse kawg nkaus lawm, yog muab lawv lub neej los pehawm tus Tswv. Lawv sib sau tuaj hauv lub Tuamtsev thov Vajtswv, mloog tus Tswv tej lus qhia, hu nkauj qhuas Nws. Mus txog thaum lawv tawm mus ntaus rog thiab ntaus yeej los lawv yeej pehawm thiab hu nkauj qhuas tus Tswv. Thaum lawv rov los txog hauv lub nroog Yeluxalees los lawv yeej pehawm Vajtswv hauv lub Tuamtsev mus li.
Thaum ntsib tej yeebncuab muaj zog dua yus, xws li kev sim siab, kev mob nkeeg lossis teebmeem, cia li kawm Vajntxwv Yehausafas tus qauv, peb yuav tsum thov Vajtswv, mloog tus Tswv qhia peb ua neej. Peb yim ncaj ncees rau kev tuaj sib sau ua ke pehawm tus Tswv, mloog Nws tej lus qhia ces peb yuav tau txhawb zog, nplig siab thiab tau Vaj Ntsujplig qhia. Teebmeem yim ntau, kev txomnyem yim loj, peb haj yam yuav tsum thov Vajtswv ntau ib yam li Vajntxwv Yehausafas thiab nws cov pejxeem hauv ntu Vajluskub no, thaum kawg peb thiaj ntsia pom tus Tswv txojkev cawm peb thiab kev muaj yeej.
Thov Vajtswv,
Tus Tswv, txawm yog txomnyem thiab tau zoo los thov Koj pub rau nyuam yaus ncaj ncees rau kev pehawm Vajtswv, nyuam yaus thiaj tau txais txojkev muaj yeej uas Koj pub. Amees.
Peb puas muab txojkev pehawm Vajtswv saib ua qhov tseemceeb hauv yus lub neej?
Nyeem Vajluskub hauv peb lub xyoo: Lukas 9:37-62
Kênh Youtube BHKTHN:
