Klei Aê Diê Blŭ: Bruă Lêwi 10:1-7
Êlan kliăng: “Y‑Nađap leh anăn Y‑Abihu, phung anak êkei Y‑Arôn, grăp čô mă kpur pioh čuh mnơ̆ng ƀâo mngưi ñu pô, dưm pui hlăm anăn, dưm mnơ̆ng ƀâo mngưi hlăm anăn, leh anăn myơr pui mơ̆ng anôk mkăn ti anăp Yêhôwa, pui msĕ snăn Yêhôwa amâo tuôm mtă ôh kơ diñu.” (Bruă Lêwi 10:1).
Klei êmuh ksiêm mĭn: Ya jing pui mơ̆ng anôk mkăn? Ya klei Y‑Nađap leh anăn Y‑Abihu ngă leh anăn ya klei truh kơ diñu? Ya ngă Aê Diê bi kmhal diñu dua huĭ mduĭ msĕ snăn? Ya klei mñă kơ phung mă bruă kơ Aê Diê leh anăn kơ drei hlăm klei kkuh mpŭ kơ Aê Diê, mơ̆ng klei yăl dliê anei?
Knưl kkuh mpŭ ngă hŏng kông hlăm Sang Yang pioh yua myơr mnơ̆ng myơr čuh brei krơ̆ng pui trơ̆ng nanao, amâo dưi djiê ôh. Tơdah čuh mnơ̆ng ƀâo mngưi, khua ngă yang yua hdăng ngur mă mơ̆ng knưl anei dưm hlăm kpur pui leh anăn dưm mnơ̆ng ƀâo mngưi doh jăk (Bruă Lêwi 16:12-13), leh anăn djă ba kpur pui hlăm anôk doh jăk, dưm ti dlông knưl kkuh mpŭ čuh mnâo ƀâo mngưi grăp hruê dua blư̆. Jih jang pui mă mơ̆ng êngao Sang Yang jing pui mơ̆ng anôk mkăn. Dua čô khua ngă yang Y‑Nađap leh anăn Y-Abihu, jing anak êkei khua ngă yang prŏng Y‑Arôn, diñu mă yua leh pui mơ̆ng anôk mkăn, soh hŏng klei Aê Diê mtô kyuanăn tŭ klei Aê Diê bi kmhal ktang tĭt, pui čuh diñu hlŏng djiê mtam hlăm Sang Yang.
Ya ngă klei bi kmhal huĭ mduĭ truh kơ dua čô Y‑Nađap leh anăn Y‑Abihu msĕ snăn? Diñu jing anak khua ngă yang prŏng, ngă bruă khua ngă yang hlăm Sang Yang sui sĭn leh, năng djŏ diñu thâo săng klă leh anăn gưt ngă kjăp phĭt jih klei bhiăn Aê Diê tui si hdră bhiăn klei kkuh mpŭ. Ƀiădah diñu ngă klei amâo uêñ, dlăng hơăi mang kơ klei Aê Diê ktrâo mtô, ngă tui si klei mĭn diñu pô yua pui mơ̆ng anôk mkăn myơr kơ Aê Diê. Hlăk mtô kơ phung ƀuôn sang amâo dưi kkuh kơ rup yang, Y‑Môis lač leh: “Răng bĕ kơ diih pô, huĭdah diih wơr bĭt klei bi mguôp Yêhôwa Aê Diê diih ngă leh hŏng diih, leh anăn ngă rup krah msĕ si rup mnơ̆ng Yêhôwa Aê Diê diih ghă leh. Kyuadah Yêhôwa Aê Diê diih jing sa mkăm pui dôk ƀơ̆ng, jing Aê Diê thâo trih” (Klei Mtô Mñă Klei Bhiăn 4:23-24). Dua čô anak Y‑Arôn mưč kơ Aê Diê, myơr sa mta pui mơ̆ng anôk mkăn kyuanăn yơh pui Aê Diê čuh diñu.
Gưt asăp kơ Aê Diê khut khat jing sa hlăm dŭm mta klei kpĭ bi mjuăt pô hlăm klei hdĭp mngăt, brei bi mâo hĕ hlăm klei kkuh mpŭ kơ Aê Diê, amâo dưi mbăng kơ ya mta klei ôh čiăng ngă klei kkuh mpŭ kơ Aê Diê tui si klei mĭn pô dê. Boh nik nak kơ phung Aê Diê jao bruă klam gĭt gai, kiă kriê phung biăp Ñu, ktang hĭn mơh brei djă pioh klei kpĭ bi mjuăt hlăm klei kkuh mpŭ kjăp phĭt čiăng đăm jing klei bi hmô jhat kơ Phung Sang Aê Diê leh anăn atăt phung biăp nao hlăm êlan soh wê. Djăp mta bruă ngă drei mĭndah jăk ƀiădah amâo gưt tui si klei Aê Diê mtô jing soh sơăi ti anăp Aê Diê. Kyuanăn yơh, Khua Yang Yêsu hưn êlâo brei răng snei, ti hruê knhal tuč lu mnuih lač hŏng Khua Yang, kâo tuôm ngă klei anei klei adih hlăm Anăn Khua Yang, ƀiădah hŏng Khua Yang klei anăn knŏng jing “pui mơ̆ng anôk mkăn” đuč, diñu knŏng mă tŭ klei wĭt lač: “Kâo amâo tuôm thâo kral diih ôh; đuĕ bĕ mơ̆ng kâo, Ơ phung soh jhat.” (Y‑Mathiơ 7:23). Akâo kơ Khua Yang brei drei răng nanao hlăm klei kkuh mpŭ kơ Aê Diê.
Si ngă mâo mơ̆ pui mơ̆ng anôk mkăn drei dôk myơr kơ Khua Yang?
Wah lač: Ơ Khua Yang, akâo kơ Yang Mngăt Jăk mtrang mngač kơ kâo thâo kral ya klei jing tui si lăn ala, ya klei jing doh jăk čiăng kơ kâo huĭ mpŭ kơ klei doh jăk Ih hlăm klei kkuh mpŭ kơ Khua Yang.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Klei Yăl Dliê 9:1-34
Kênh Youtube BHKTHN:
