Klei Aê Diê Blŭ: II Klei Yăl Dliê 29:31‑36
Êlan kliăng: “Ƀiădah hlei kâo jing, leh anăn hlei phung ƀuôn sang kâo jing tơl hmei dưi myơr hŏng ai tiê čiăng msĕ snei? Kyuadah jih jang mnơ̆ng kbiă hriê mơ̆ng ih, leh anăn hmei myơr kơ ih dŏ ih pô” (I Klei Yăl Dliê 29:14)
Klei êmuh ksiêm mĭn: Ya klei Mtao Hêsêkia mtă brei phung ƀuôn sang ngă, leh anăn si ngă digơ̆ lŏ wĭt ngă hŏng klei mtă anăn? Ya mnơ̆ng mtao leh anăn phung ƀuôn sang lŏ mă tŭ tơdah digơ̆ myơr hŏng klei kmah msĕ snăn? Hŏng si ai tiê drei myơr?
Tơdah ruê̆ phung khua ngă yang myơr mnơ̆ng myơr, Mtao Hêsêkia iêô phung ƀuôn sang brei digơ̆ ba mnơ̆ng digơ̆ myơr kơ sang Aê Diê kyuadah digơ̆ mâo klei Aê Diê tŭ leh anăn pap brei leh klei soh digơ̆, “pioh leh digơ̆ pô kơ Yêhôwa” kyuanăn digơ̆ dưi “hriê giăm” Aê Diê, bi êdah klei đăo hŏng klei bi mni (êlan 31). Snăn digơ̆ djă ba thiăm mnơ̆ng myơr bi mni leh anăn mnơ̆ng myơr čuh (êlan 31‑32) čiăng bi êdah klei bi mni kyuadah digơ̆ tlaih leh mơ̆ng klei Aê Diê ngêñ leh anăn dưi lŏ bi mrâo klei bi mguôp hŏng Ñu. Digơ̆ myơr msĕ mơh mnơ̆ng myơr kơ klei êđăp ênang (Bruă Lêwi 3:1‑16) leh anăn mnơ̆ng myơr mnăm tuh kơ mnơ̆ng myơr čuh (êlan 35; Bruă Lêwi 23:13).
Phung ƀuôn sang amâo hơưi ôh dŏ ngăn digơ̆ mâo ƀiădah myơr hŏng klei kmah. Ênoh yap mnơ̆ng myơr hŏng ai tiê čiăng pioh ngă mnơ̆ng myơr čuh leh anăn mnơ̆ng myơr bi mni mâo lu êmô knô, biăp knô leh anăn êđai biăp. Ênoh mnơ̆ng digơ̆ myơr jing lu snăk ƀiădah phung khua ngă yang jing ƀiă đei tơl digơ̆ amâo dưi lôk klĭt jih jang mnơ̆ng myơr čuh ôh, kyuanăn, phung ayŏng adei diñu jing phung Lêwi đru bruă diñu tơl bruă bi leh jih. Jih jang mnơ̆ng myơr čuh myơr hŏng ai tiê čiăng amâo mâo klei mgô̆ ôh (êlan 31).
Msĕ snăn “arăng lŏ mkŏ mjing bruă sang Yêhôwa” (êlan 35) leh anăn ai tiê jih jang mnuih hơ̆k mơak bi mni kơ Aê Diê. Arăng lŏ pŏk ƀăng bhă Sang kkuh mpŭ, bi doh leh anăn lŏ myơr djăl snăk amâo bŏ tlâo hruê kăm ôh. Mtao leh anăn phung ƀuôn sang hơ̆k mơak snăk kyuadah dưi lŏ mkŏ mjing djăl klei kkuh mpŭ kơ Aê Diê (êlan 36). Msĕ mơh, diñu mơak kyuadah diñu thâo anăn jing “klei Aê Diê ngă leh kơ phung ƀuôn sang” amâo djŏ bruă diñu pô ngă ôh.
Klei kkuh mpŭ kơ Aê Diê hlăm ênuk Mtao Hêsêkia amâo djŏ knŏng klei wah lač, klei bi mni leh anăn klei mmuñ hŏng ƀăng êgei ôh ƀiădah mâo wăt mnơ̆ng myơr kơ Yêhôwa mơh. Knŏng tơdah klei myơr hŏng ai tiê khăp leh anăn bi mni kơ Aê Diê yơh kyuanăn digơ̆ dưi myơr hŏng klei kmah leh anăn hŏng klei hơ̆k mơak msĕ snăn. Klei myơr ăt jing sa bruă ngă hlăm klei kkuh mpŭ mơh. Phung đăo hruê anei ăt msĕ mơh, knŏng tơdah mâo klei khăp sĭt leh anăn hdơr knga kyua bruă Khua Yang ngă leh kơ drei kơh drei dưi myơr hŏng klei kmah. Tơdah drei myơr hŏng klei hơ̆k mơak leh anăn hŏng klei kmah, drei bi êdah klei drei knang kơ Khua Yang amâo djŏ knang kơ dŏ ngăn ôh, leh anăn drei dôk myơr kơ Khua Yang dŏ Ñu pô, Ñu brei leh kơ drei. Khua Yang čiăng klei drei khăp leh anăn hdơr knga bi mni kơ Ñu bi êdah hlăm klei drei myơr bi mơak kơ Ñu.
Si ngă drei myơr kơ Aê Diê hŏng klei hơ̆k mơak leh anăn hŏng klei kmah mơ̆?
Wah lač: Ơ Khua Yang, brei kâo kkuh mpŭ leh anăn myơr hŏng ai tiê khăp leh anăn bi mni kơ Ih čiăng kơ kâo dưi mâo klei hơ̆k mơak leh anăn klei jăk jĭn mơ̆ng klei myơr. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y‑Luk 11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
