II Xwmtxheej 29:31-36
Nqe cim.
“Kuv haivneeg thiab kuv yeej muab tsis tau ib yam dabtsi pub rau koj li, rau qhov tej ntawd puavleej yog koj li, peb tsuas muab tej uas yog koj li rov rau koj xwb.” (I Xwmtxheej 29:14)
Lus nug rau sawvdaws xav:
– Vajntxwv Hexekiyas nqua hu cov pejxeem ua dabtsi thiab lawv ua licas?
– Vajntxwv thiab cov pejxeem txais tau dabtsi thaum fij khoom siab dav li ntawd?
– Peb tus cwjpwm fij khoom zoo licas?
Thaum cov povthawj hlawv khoom fij tas lawm, vajntxwv Hexekiyas nqua hu cov pejxeem coj lawv tej tsiaj mus tua fij hauv Tuamtsev rau qhov lawv twb tau zam txim, tau lees yuav, lawv “yog neeg huv lawm” thiaj tau “txav los ze” tus Tswv, qhia lawv txojkev ntseeg thiab kev ua tsaug rau tus Tswv (nqe 31). Yog li ntawd, lawv thiaj coj tej tsiaj tua xyeem thiab tej khoom fij ua tsaug tuaj (nqe 31-32) qhia tshwm lawv nplooj siab nco tus Tswv txiajntsig vim tau dim ntawm tus Tswv txojkev chim thiab tau rov los sib raug zoo nrog Nws lawm. Lawv kuj fij tej khoom ua kev sib raug zoo (Levis Kevcai 3:1-16) thiab tej khoom fij tsw qab rau tus Tswv (nqe 35; Levis Kevcai 23:13).
Cov pejxeem tsis khuvxim tej uas lawv muaj tiamsis txaus siab hlo coj tuaj fij los ntawm lub siab dawb siab dav. Tej khoom uas cov pejxeem txaus siab coj tuaj fij tua xyeem thiab ua tus Tswv tsaug yog tej txiv nyuj, tej txiv yaj thiab tej menyuam yaj. Lawv fij ntau heev txog qib uas cov povthawj muaj tsawg dhau, tsis txaus neeg los laws cov tawv tsiaj uas hlawv xyeem ntawd. Vim li ntawd, cov Levis uas yog cov povthawj li kwvtij thiaj pab ua tej haujlwm ntawd mus txog thaum ua tiav. Tej khoom fij tau cov pejxeem txaus siab coj tuaj fij ntawm nplooj siab dawbpaug, tsis yog vim raug quabyuam (nqe 31).
“Yog li ntawd, thiaj rov pib muaj kev pehawm Vajtswv nyob hauv lub Tuamtsev dua” (nqe 35) thiab cov pejxeem sawvdaws zoo siab ua tus Tswv tsaug. Lub Tuamtsev rov qhib qhov rooj, ua kevcai ntxuav thiab muab fij rau tus Tswv sai heev tsuas yog peb lub asthiv xwb. Vajntxwv thiab cov pejxeem zoo siab xyivfab tsis yog vim lawv tau rov pehawm xwb tiamsis tseem ua tiav txhua yam sai kawg li (nqe 36). Lawv kuj zoo siab kawg vim paub hais tias tej ntawd yog “Vajtswv tau pab lawv” tsis yog lawv lub dag lub zog ua tau.
Kev pehawm nyob vajntxwv Hexekiyas tiam tsis yog tsuas tuaj thov Vajtswv, ua tsaug thiab hu nkauj qhuas Vajtswv xwb tiamsis tseem muaj kev tua tsiaj xyeem rau Vajtswv. Tsuas yog thaum fij khoom los ntawm nplooj siab hlub thiab nco tus Tswv txiajntsig, lawv thiaj fij tau siab dav thiab zoo siab npaum ntawd. Kev fij khoom kuj yog ib tes haujlwm hauv kev pehawm. Niaj hnub nimno, cov ntseeg Tswv Yexus kuj fij tau ntawm nplooj siab dav thaum lawv paub ua tus Tswv tsaug thiab hlub tus Tswv vim tej uas Nws tau ua pab lawv. Thaum fij khoom los ntawm nplooj siab loj dav, peb qhia tshwm tias tus kheej cia siab rau tus Tswv, tsis yog tsuas cia siab rau tej khoom nyiaj txiag, thiab peb tsuas muab tej uas yog tus Tswv tug, tau tus Tswv pub, rov tuaj fij rau tus Tswv xwb. Tus Tswv xav kom peb nplooj siab hlub thiab ua Nws tsaug tau qhia tshwm los ntawm tes haujlwm fij tej khoom haum Nws siab.
Thov Vajtswv,
Tus Tswv, thov pub rau nyuam yaus pehawm thiab fij khoom rau Koj los ntawm nplooj siab hlub thiab ua Koj tsaug, kom nyuam yaus muaj kev kaj siab, txaus siab thaum tau koob hmoov dhau ntawm tej khoom fij. Nyuam yaus tuav Yexus Khetos lub npe thov, Amees.
Peb puas zoo siab hlo fij khoom los ntawm nplooj siab loj dav rau tus Tswv lawm tau?
Nyeem Vajluskub hauv peb lub xyoos: Lukas 11
Kênh Youtube BHKTHN:
