Klei Aê Diê Blŭ: Bruă Phung Khua Ƀĭng Kna 15:35-41
Êlan kliăng: “Knŏng hjăn Y-Luk dôk mbĭt hŏng kâo. Jak Y-Markôs leh anăn atăt ba gơ̆ mbĭt hŏng ih, kyuadah gơ̆ jing yuôm snăk đru bruă kâo.” (II Y-Timôthê 4:11).
Klei êmuh ksiêm mĭn: Hlei Y-Markôs jing? Si klei bi mguôp ñu mâo hŏng Y-Barnabas? Ya ngă Y-Markôs lui hĕ êpul hiu hưn klei đăo krah wah êlan? Ya klei đru Y-Markôs mơ̆ng sa čô luč klei arăng knang dưi jing hĕ sa čô sĭt suôr leh anăn tŭ dưn? Ya klei hriăm drei mă tŭ mơ̆ng klei yăl dliê anei?
Y-Markôs lŏ mâo anăn mkăn Y-Yôhan, jing anak êkei H’Mari, sa čô mniê mdrŏng sah leh anăn khăp kơ Aê Diê ti Yêrusalem. Sang ñu ăt jing anôk pioh kơ lu phung ƀĭng kna bi mguôp wah lač kơ khua ƀĭng kna Y-Pêtrôs hlăk mtao Hêrôt mă krư̆ gơ̆ (Bruă Phung Khua Ƀĭng Kna 12:11-12).
Y-Barnabas, sa čô hlăm phung djă bruă gĭt gai Phung Sang Aê Diê Yêrusalem, jing ayŏng adei sa găp djuê hŏng Y-Markôs (Kôlôs 4:10). Hlăm gưl hiu hưn klei đăo tal sa, YBarnabas atăt ba Y-Markôs nao mbĭt kăp đru bruă kơ ñu leh anăn khua ƀĭng kna Y-Pôl. Ƀiădah hlăk mŭt hlăm čar Pamphili (Thổ Nhĩ Kỳ ară anei), Y-Markôs lui hĕ êpul hiu hưn, lŏ plăk wĭt kơ Yêrusalem (Bruă Phung Khua Ƀĭng Kna 13:13). Klei Y-Markôs lui bruă klam ñu mkrah dưh, ngă kơ khua ƀĭng kna Y-Pôl luč klei čang hmăng kơ ñu, kyuanăn yơh hlăm gưl hiu hưn klei đăo tal dua, ñu amâo brei Y-Markôs nao mbĭt ôh, wăt tơdah Y-Barnabas khut khat čiăng Y-Markôs hlue nao mbĭt. Boh jing knhal tuč, khua ƀĭng kna Y-Pôl ruah YSilas jing mah jiăng hiu mbĭt hŏng ñu, bi Y-Barnabas atăt Y-Markôs hlue mbĭt leh anăn mkŏ mjing êpul hiu hưn mdê.
Drei amâo thâo ôh ya phŭn knhal klei Y-Markôs amâo sĭt suôr ôh, hlăk ñu lui êpul hiu hưn klei đăo lŏ wĭt kơ Yêrusalem, amâo lŏ ngă ôh bruă ñu tŭ ư săn asei mă bruă. Năng ai mâo mta klei ñu amâo ư ai mbĭt, amâodah amâo lŏ dưi gĭr tŭ klei dleh knap… wăt tơdah ya mta phŭn knhal dưn, klă sĭt Y-Markôs jing pô amâo sĭt suôr ôh ngă bruă Aê Diê. Bi mni lač jăk kơ Aê Diê, kyuadah Ñu yua leh Y-Barnabas jing găp djuê hŏng Y-Markôs, ăt gơ̆ jing “anak êkei klei bi mđĭ ai” mơh (Bruă Phung Khua Ƀĭng Kna 4:36), hŏng klei pap bi juh mđĭ ai anăn, êjai hiu hưn klei đăo hŏng Y-Markôs, Y-Barnabas đru êkei hlăk ai anei đĭ hriê kơ prŏng hlăm klei hdĭp mngăt myang, dơ̆ng mơ̆ng sa čô tuôm luč klei arăng knang dưi jing hĕ sa čô sĭt suôr, tŭ dưn kơ Aê Diê. Êdei tinăn Y-Markôs đru khua ƀĭng kna Y-Pêtrôs răng kriê Phung Sang Aê Diê ti čar Rôm. Khua ƀĭng kna Y-Pêtrôs iêu kơ Y-Markôs jing “anak” (mngăt myang) hŏng klei khăp hơiêng (I Y-Pêtrôs 5:13). Sĭt nik akŏ phŭn klei mrâo mrang kơ Hdruôm Hră Klei Mrâo Mrang Jăk Y-Markôs jing mơ̆ng khua ƀĭng kna Y-Pêtrôs yơh, kyua klei bi mguôp suôr tliêr diñu dua. Klei hưn bi sĭt klă êdi kơ Y-Markôs mâo klei bi mlih dơ̆ng mơ̆ng sa čô luč klei arăng knang dưi wĭt jing sa čô sĭt suôr, năng knang leh anăn tŭ dưn, anăn jing hră čih mơ̆ng khua ƀĭng kna Y-Pôl pô yơh mơĭt kơ Y-Timôthê, “Jak Y-Markôs leh anăn atăt ba gơ̆ mbĭt hŏng ih, kyuadah gơ̆ jing yuôm snăk đru bruă kâo.” (II Y-Timôthê 4:11).
Klei truh hlăm klei yăl dliê brei ƀuh, anak mnuih wăt tơdah jing phung djă bruă kiă kriê klei hdĭp mngăt myang dưn, ăt đa bliư̆ mâo klei dưi, đa bliư̆ dluh lĕ mơh. Akâo kơ Aê Diê yua drei jing Y-Barnabas hlăm Phung Sang Aê Diê čiăng mguôp ai đru rŭ phung êdu awăt wĭt jing mnuih tŭ dưn kơ Aê Diê.
Si ngă diih jing mơ̆ “Y-Barnabas” hlăm Phung Sang Aê Diê drei pô?
Ơ Khua Yang, bi mni lač jăk kơ Ih kyuadah mâo đa bliư̆ kâo lĕ buh msĕ si Y-Markôs, ƀiădah kyua mâo klei bi hmô leh anăn đru atăt thâo mĭn mơ̆ng “Y-Barnabas” hlăm Phung Sang Aê Diê brei kâo dưi ƀuh klei hơ̆k mơak mơ̆ng “sa čô dĭng buăl, jăk leh anăn sĭt suôr” čiăng dưi lŏ dơ̆ng mă bruă kơ Khua Yang.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Y-Yôsuê 19:40-21:8
Kênh Youtube BHKTHN:
https://www.youtube.com/channel/UCaSY8ebjVfMKhPups5jZ9yw
