Tĭt 3:3-5
“Pŭn dêh lu bơngai mă băt mơnat kơ đe, ‘Bok Kei-Dei kư̆m mơnat kơ lu sư mơ̆n.” (Mathiơ 5:7)
Nơ̆r jet tơchĕng pơwao:
– ‘Bok Kei-Dei đei tơ’bôh tơdrong tơ’bưh thoi yơ lăm jơhngơ̆m băt ‘mêm mơnat păng huay pă jô̆ yo tơdrong yoch?
– Jơhngơ̆m băt mơnat păng huay pă jô̆ yo kơ tơdrong yoch, tơgŭm kơ bơ̆n thoi yơ kơplah tơ’bưh hăm bơngai pơm glăi pơm kơ jơhngơ̆m bơ̆n ưh kơ hiôk?
Kơplah pơting lăm tơdrong ‘mêm mơnat păng tơdrong Kră Yang huay pă jô̆ yo tơdrong yoch, bơ̆n băt đei tơdrong tơ’bưh băl kơjăp dêh lăm ‘bar tơdrong ‘nâu, yua kơ đơ̆ng tơdrong ‘mêm mơnat ba truh tơdrong băt mơnat kơ tơdrong yoch. Nơ̆r ‘Bok Kei-Dei năr ‘nâu đei tơ’bôh đei mơnat ăn tơdrong yoch bơ̆n, ‘noh lĕch đơ̆ng tơdrong ‘Bok Kei-Dei ‘mêm mơnat. Mălei ră, bơ̆n lăng sĭn to ‘biơ̆, tơdrong ‘mêm mơnat tih hloh kơ tơdrong mơnat kơ tơdrong yoch. Yua kơ jơhngơ̆m ‘mêm mơnat na ‘Bok Kei-Dei mơnat kơ tơdrong yoch bơ̆n kơplah bơ̆n tơbral, apinh Sư (Hơriso 103:13-14; Hêbrơ 4:15-16).
Tơdrong ‘nâu kư̆m trŏ mơ̆n hăm bơ̆n lăm tơdrong arih hăm bơngai jum dăr kơ bơ̆n, yua kơ dah đei tơdrong ‘mêm mơnat lei bơ̆n ‘bônh mơnat kơ tơdrong yoch lu bơngai nai. Minh ‘nu bơngai băt mơnat noh bơngai dan sư kơdih ‘bơ̆t anih đe nai noh wă kơ gơh hlôh păng băt mơnat hăm lu sư, đơ̆ng noh. Dah bơ̆n đei jơhngơ̆m mơnat lei na kơplah tơ’bưh hăm dôm tơdrong glăi bơngai nai, bơ̆n gơh hlôh kơ lu sư, hloh yua kơ kiơ lu sư pơm thoi noh, păng đơ̆ng noh bơih bơ̆n ‘bônh kơ mơnat hloh.
Jơhngơ̆m băt ‘mêm mơnat ưh kơ sĭ pơm tơ’bôh gah ‘nguaih đĕch mălei bơ̆n kư̆m athei pơm tơ’bôh đơ̆ng lăm jơhngơ̆m. Jơhngơ̆m mơnat ưh kơ wei rong mong găr wă pơm ‘mong plơ̆, ưh kơ wei tơdrong blĕk, ưh kơ yua iŏk tơdrong thuơ răm păng tơdrong rơdu đe nai, kư̆m ưh kơ roi pơdah tơdrong yoch bơngai nai wă pơjăm sư.
Tơdrong gĭt găl kăl kơ pơ’lơ̆ng noh jơhngơ̆m băt ‘mêm mơnat gô mơnat kơ tơdrong yoch mălei jơhngơ̆m băt mơnat ưh kơ ‘bônh ôh, hŭt lê̆ tơdrong kơnê̆, ưh kơ đei pơma hơlĕnh khan ưh kơ ‘bôh tơdrong yoch mă oei pơm noh. ‘Mêm mơnat na mălei ưh kơ hiơ̆k kơ tơdrong yoch noh ưh kơ trŏ kơ mơnat ôh thoi pơtao Sôl đei mơnat kơ pơtao Aga, dah mă pơtao Đawit đei mơnat kơ dôm tơdrong glăi kon tơdăm pơtao anăn Apsalôm. Minh ‘nu bơngai đei jơhngơ̆m ‘mêm mơnat ưh kơ đei ưh kơ hiơ̆k ôh tơdrong yoch yua kơ lu sư băt tơdrong răm đơ̆ng tơdrong yoch noh tih kơ băt dang yơ. ‘Bok Kei-Dei bơih Tơ’ngla ‘mêm mơnat mălei Sư kư̆m Tơ’ngla Tơpăt păng ‘lơ̆ng rơgoh, thoi noh Sư ưh kơ đei tŭk hŭt lon lê̆ tơdrong yoch ôh. Kră Yang băt tơdrong yoch oei wă pơrăm kon bơngai thoi yơ, păng yua kơ jơhngơ̆m ‘mêm mơnat thoi noh Sư wơh Kră Yang Yêsu jur tơ teh đak wă lôch tang kon bơngai yoch.
Hloh kơ noh dơ̆ng, bơ̆n kư̆m kăl kơ pơtŏ pơting wă kơ băt tơdrong mơnat huay pă jô̆ yo kơ tơdrong yoch păng tơdrong phak. Phak mă ưh kơ băt kơ mơnat lei noh bơih thoi lĕ kơ đe yua hăm jơhngơ̆m pran, mălei phŏ lơ wơ̆t tơdrong phak athei kiơ̆ đơ̆ng rŏng tơdrong mơnat wă kơ đei yua lăm tơdrong bơtho tơ’bôh. Apinh Yang Bơhngol ‘Lơ̆ng ăn kơ bơ̆n tơdrong hơgei păng tơdrong ‘mêm hai wă kơ băt klah tơdrong jang kăl kơ pơm jang wă tơgŭm kơ bơngai mă pơm yoch gơh đei yua hloh.
Kơkuh kơ Ih Kră Yang, inh bơnê kơ Ih yua kơ Ih đei ‘mêm mơnat păng huay pă jô̆ yo tơdrong yoch inh. Apinh Ih ăn kơ ính đei nơ̆r Ih wă kơ inh băt ‘mêm mơnat păng huay kơ jô̆ yo tơdrong yoch bơngai nai lăm tơdrong tơpăt tơpă Ih. Krao khan yua anăn Kră Yang Yêsu Krist, Amen.
Bơ̆n hlôi mơn đơ̆ng ‘bai pơhrăm ‘nâu thoi yơ lăm tơdrong arih?
Đŏk Sơ̆p hla bơar ‘Bok Kei-Dei lăm pêng sơnăm: Êsêkiên 44
Kênh Youtube BHKTHN:
