Klei Aê Diê Blŭ: Y-Yôp 1:1-5
Êlan kliăng: “Tơdah hruê huă mnăm ruê̆ leh, Y-Yôp bhiăn iêô leh anăn bi doh hĕ phung diñu, leh anăn gơ̆ bhiăn kgŭ ưm aguah leh anăn myơr mnơ̆ng myơr čuh tui si grăp čô diñu; kyuadah Y-Yôp lač, “Năng ai phung anak êkei kâo ngă soh leh, leh anăn tăm pah kơ Aê Diê hlăm ai tiê diñu.” Msĕ snăn Y-Yôp khăng ngă nanao” (Y-Yôp 1:5)
Klei êmuh ksiêm mĭn: Si klei hưn mdah kơ Y-Yôp jing? Ya klei phung anak êkei ñu khăng mưng ngă? Ya klei Y-Yôp bhiăn ngă čiăng mkŏ mdơ̆ng klei hdĭp huĭ mpŭ kơ Aê Diê hlăm gŏ sang ñu? Si hdră drei mkŏ mdơ̆ng knhuah hdĭp huĭ mpŭ kơ Aê Diê hlăm gŏ sang drei pô?
Klei hưn mdah kơ gŏ sang Y-Yôp jing mnuih “amâo mâo klei arăng dưi ƀuah ôh leh anăn kpă ênô, sa čô huĭ mpŭ kơ Aê Diê leh anăn weh đuĕ mơ̆ng klei jhat ” (êlan 1), leh anăn “jing pô prŏng hĭn kơ jih jang phung mnuih ƀuôn sang hlăm čar Ngŏ” (êlan 3). Phung anak êkei ñu khăng mkŏ mjing klei huă mnăm hlăm sang grăp čô diñu tui si wir bi kčah leh; leh anăn diñu bhiăn jak tlâo čô amai adei diñu brei huă mnăm mbĭt hŏng diñu. Anei jing sa klei bhiăn jăk hlăm gŏ sang Y-Yôp čiăng kơ ayŏng amai adei mâo klei bi mguôp suôr tliêr hdơ̆ng diñu. Ƀiădah lĕ, hlăm klei huă mnăm ăt êlưih atăt truh kơ klei mplư leh anăn ngă soh mơh tơdah amâo mâo klei djŏ hnơ̆ng ôh. Kyuanăn, jing sa čô ama huĭ mpŭ kơ Aê Diê, Y-Yôp iêô jih jang phung anak ñu wĭt leh anăn bi doh hĕ diñu, djă pioh klei bhiăn jăk hlăm klei myơr mnơ̆ng ngă yang leh anăn wah lač brei kơ phung anak ñu.
Hlăm ênuk Y-Yôp, ka mâo ôh phung khua ngă yang ruah pioh myơr mnơ̆ng ngă yang kơ Aê Diê. Snăn, ama yơh jing pô mâo bruă klam gĭt gai klei đăo hlăm gŏ sang ñu pô leh anăn kăp ngă bruă anei. Kyuanăn, leh ruê̆ klei huă mnăm Y-Yôp bhiăn myơr mnơ̆ng myơr čuh brei kơ phung anak ñu čiăng akâo kơ Aê Diê pap brei klei soh kơ grăp čô diñu, kyuadah ñu huĭ phung anak ñu tăm ngă soh hĕ hŏng Aê Diê êjai huă mnăm. Ñu jing sa čô ama huĭ mpŭ kơ Aê Diê, sĭt suôr uêñ mĭn kơ klei hdĭp mngăt phung anak ñu.
Jing sa čô huĭ mpŭ kơ Aê Diê, snăn sĭt nik yơh Y-Yôp čiêm rông mtô lač phung anak ñu hlăm êlan Khua Yang. Ñu mkŏ mdơ̆ng knhuah hdĭp huĭ mpŭ kơ Aê Diê hlăm gŏ sang ñu. Hlăm hdră phung anak ñu bi kčah tui si wir mkŏ mjing klei huă mnăm leh anăn iêô jak phung ayŏng amai adei diñu, drei ƀuh klei diñu thâo bi khăp leh anăn uêñ mĭn kơ hdơ̆ng diñu. Bi Y-Yôp pô bhiăn kgŭ ưm aguah, myơr mnơ̆ng ngă yang leh anăn wah lač brei kơ phung anak ñu. Anei jing sa rup bi hmô kơ sa gŏ sang thâo huĭ mpŭ kơ Aê Diê, ayŏng amai adei thâo bi khăp, amĭ ama uêñ mĭn kơ klei hdĭp mngăt phung anak ñu.
Jing klei ênguôt snăk tơdah lu gŏ sang phung anak Aê Diê hlăm Phung Sang Aê Diê hruê anei kƀah klei uêñ mĭn kơ klei hdĭp mngăt kơ phung anak diñu. Amĭ ama kpăk gun rŭng răng đei kơ klei duah ƀơ̆ng huă tơl wơr bĭt hĕ klei mkŏ mdơ̆ng knhuah hdĭp huĭ mpŭ kơ Aê Diê, sĭt suôr kkuh mpŭ kơ Aê Diê. Lu amĭ ama amâo mâo klei mưng bi mtuôm mbĭt gŏ sang čiăng kơ phung anak djă pioh klei thâo bi khăp hdơ̆ng ayŏng amai adei. Diñu kăn pioh rei mnĭt mmông mñă bi hdơr kơ phung anak amâodah wah lač brei kơ phung anak diñu čiăng dưi rơ̆ng diñu dôk doh jăk. Tui hlue klei bi hmô mơ̆ng Y-Yôp, brei drei êlâo hĭn uêñ mĭn răng kriê klei hdĭp mngăt kơ phung anak drei, čiăng kơ gŏ sang drei dưi jing gŏ sang huĭ mpŭ kơ Aê Diê sĭt.
Si ngă drei dôk mkŏ mdơ̆ng knhuah hdĭp huĭ mpŭ kơ Aê Diê hlăm gŏ sang drei pô mơ̆?
Wah lač: Ơ Khua Yang, akâo Ih mñă brei kâo hdơr nanao dưm êlâo hĭn bruă mkŏ mdơ̆ng gŏ sang thâo huĭ mpŭ kơ Aê Diê. Akâo Khua Yang đru hmei thâo huĭ mpŭ kơ Aê Diê leh anăn čiêm rông mtô lač anak čô êbat hlăm êlan Ih.
Dlăng Klei Aê Diê Blŭ hlăm tlâo thŭn: Y-Markôs 13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
