Klei Aê Diê Blŭ: I Y-Timôthê 4:6
Êlan kliăng: “Tơdah ih mtô jih klei anei kơ phung ayŏng adei, ih srăng jing sa čô dĭng buăl mă bruă jăk kơ Krist Yêsu, čiêm rông leh ih pô hŏng klei blŭ kơ klei đăo leh anăn hŏng mta klei đăo jăk ih tui hlue leh.” (I Y-Timôthê 4:6)
Klei êmuh ksiêm mĭn: Ya klei Khua ƀĭng kna Y-Pôl mtă kơ Khua pô mtô hlăk ai Y-Timôthê? Jing phung anak, ya klei drei hriăm mơ̆ng ênuk êlâo? Jing amĭ ama, ya klei drei ngă čiăng mkŏ hŏng ênuk êdei?
Hlăm êlan Klei Aê Diê Blŭ anei, Khua ƀĭng kna Y-Pôl mđĭ ai Y-Timôthê, sa čô khua pô mtô hlăk ai, brei sĭt suôr mtô klei sĭt nik ñu tŭ mă leh. Khua pô mtô Y-Timôthê dôk ti krah dua ênuk: Êlâo dih, ñu hriăm mơ̆ng Khua ƀĭng kna Y-Pôl, leh anăn ară anei ñu klam bruă mtô pô mkăn. Bruă klam Y-Timôthê jing kban mkŏ klei đăo ênuk leh êgao hŏng klei čang hmăng êdei anăp.
Khua ƀĭng kna Y-Pôl mđĭ ai Khua pô mtô Y-Timôthê brei “mtô jih klei anei kơ phung ayŏng adei”, jing mtô klei đăo čiăng kơ phung đăo thâo pô đăo kơ ya klei leh anăn ti anôk dôk nao čiăng kơ phung ƀuôn sang Aê Diê dưi ñĕ kơ klei hiu mplư soh čhuai atăt êlan soh. Klei hdĭp Y-Timôthê leh anăn phung đăo brei rông pô hŏng Klei Aê Diê Blŭ (êlan 6b) leh anăn mtô Klei Aê Diê Blŭ kơ ênuk lŏ čuê. Knuih hdĭp grăp hruê ksiêm dlăng “knuih jăk” leh anăn ksiêm mĭn Klei Aê Diê Blŭ srăng đru kơ phung ƀuôn sang Aê Diê hriê kơ prŏng hlăm klei đăo leh anăn klei thâo săng Khua Yang.
Khua ƀĭng kna Y-Pôl mtă kơ anak hlăm klei hdĭp mngăt pô brei jing “sa čô dĭng buăl mă bruă jăk” hiu hưn Klei Blŭ pô mâo hriăm mjuăt grăp hruê, leh anăn hĭn mơh, brei hlue ngă Klei Blŭ anăn.
Hruê anei, hlăm lu gŏ sang leh anăn Phung Sang Aê Diê, boh kbưi plah wah dŭm gưl ênuk jing klă mngač hĭn: Mdê hlăm klei mĭn, knuih hdĭp, amâodah klei čang hmăng. Ƀiădah Khua ƀĭng kna Y-Pôl mñă kơ drei klei bi mguôp sa anăn mâo hriê mơ̆ng klei msĕ ôh, ƀiădah hriê mơ̆ng klei sĭt suôr hŏng Klei Aê Diê Blŭ. Tơdah sa čô ama khua thŭn bi hmô kơ klei kpă ênô, huĭ mpŭ leh anăn thâo pap; leh anăn tơdah phung mda asei bi êdah klei luă gŭ leh anăn huĭ mpŭ, snăn klei khăp gŏ sang srăng sĭt suôr, Phung Sang Aê Diê jing anôk dŭm ênuk bi đru leh anăn bi hdơ̆ng mkŏ mjing, mơ̆ng ênuk anei truh kơ ênuk mkăn tơl truh hruê Khua Yang lŏ hriê.
Grăp čô drei wăt tơdah jing ama kkiêng, ama hlăm ai tiê, pô ktrâo atăt, amâodah khua kiă kriê hlăm klei đăo, Khua Yang iêô drei dôk hlăm klei mkŏ plah wah dŭm ênuk. Ñu iêô drei rông ba drei pô hlăm klei kpă ênô Ñu leh anăn mtô klei sĭt nik anăn hŏng klei luă gŭ, klei khăp leh anăn bi hmô jăk. Hlăm bruă tui duah hdră msir bi hrŏ klei bi kpleh dŭm gưl ênuk, klă sĭt drei hŏng bruă klam jing amĭ ama, srăng ngă ya klei pô mtô leh, hŏng klei ƀrư̆ hruê ƀrư̆ gĭr hĭn čiăng kơ knuih hdĭp pô djŏ guôp hŏng hnơ̆ng čuăn klei đăo. Akâo kơ Khua Yang đru drei duh, rông ba klei đăo leh anăn lŏ bi lar ngăn drăp klei hdĭp myang kơ ênuk lŏ čuê.
Drei ƀuăn rơ̆ng jing kban mkŏ, mbha klei yăl dliê kơ klei đăo, klei hriăm Khua Yang mtô, leh anăn bi hmô kơ phung ênuk hlăk ai mơ̆ amâodah ka?
Wah lač: Ơ Ama hlăm adiê, kâo bi mni kơ Ih kyua phung aê, phung ama, phung nai, pô ktrâo atăt leh anăn phung kiă kriê hlăm klei hdĭp mngăt, atăt gai leh kâo hlăm klei sĭt nik. Akâo kơ Ih rông kâo hŏng Klei Aê Diê Blŭ leh anăn sĭt suôr lŏ mtô kơ ênuk êdei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 105
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail:elankleisitnik@gmail.com
Kênh Youtube BHKTHN:
