Klei Aê Diê Blŭ: Klei Bi Hriêng 14:1
Êlan kliăng: “Mniê thâo mĭn mdơ̆ng sang ñu, ƀiădah hŏng kngan ñu pô mniê mluk ruh sang ñu.” (Klei Bi Hriêng 14:1)
Klei êmuh ksiêm mĭn: Ya knuih brei phung mniê mâo čiăng mdơ̆ng gŏ sang? Si knuih anei dưi đru gŏ sang găn gao kdrêč gưl dleh dlan? Ya klei brei drei ngă čiăng dưi mâo sa gŏ sang suaih pral jăk mơak?
Klei Aê Diê Blŭ kñăm kơ bruă klam ung jing khua kơ gŏ sang (Êphêsô 5:22-26), ƀiădah lĕ grăp čô hlăm sang ăt mâo bruă klam yuôm amâo ƀiă hĭn ôh čiăng mkŏ mdơ̆ng gŏ sang jăk mơak. Mtao Y-Salômôn brei thâo, mniê mâo klei dưi “mdơ̆ng” amâodah “ruh” sang ñu pô tui si knuih ñu jing. Boh blŭ “sang” tinei amâo djŏ knŏng lač kơ bruă mdơ̆ng sang dôk hŏng mnơ̆ng mnuă ôh, ƀiădah wăt čiăng lač kơ klei hdĭp mda hlăm gŏ sang mâo jih kdrêč hdĭp hŏng ƀuôn sang, klei duah ƀơ̆ng huă, klei bi khăp, klei hdĭp mngăt ai tiê, leh anăn boh nik nak klei bi mguôp sŭk suôr grăp čô hlăm gŏ sang. Tinei, “mniê thâo mĭn” amâo djŏ knŏng kriăng mă bruă čiăng mkŏ mdơ̆ng sang pô ôh, ƀiădah wăt bi mâo djăp mta klei pioh čiêm rông klei hdĭp mngăt leh anăn ai tiê klei mĭn. Jih jang bruă ñu ngă kyua kơ gŏ sang pô sơăi. Bi mklăk hŏng klei anăn, sa čô “mniê mluk” wăt tơdah thâo duah prăk lu leh anăn uêñ mĭn kơ gŏ sang mâo klei hdĭp mdrŏng sah hlăm kđeh, ƀiădah mđrĭng hŏng klei anăn “ruh” sang pô, čiăng lač bi rai klei hdĭp hlăm mngăt leh anăn ai tiê gŏ sang pô. Blŭ mdê, “mniê thâo mĭn” amâo djŏ knŏng kriăng mă bruă čiăng mdơ̆ng sang pô ôh ƀiădah wăt bi mâo djăp mta klei pioh kơ klei hdĭp mngăt leh anăn ai tiê, bi sa čô mô̆ “hŏng kngan ñu pô mniê mluk ruh sang ñu”, čiăng lač hŏng kngan ñu yơh mniê anei bi rai hĕ gŏ sang ñu pô, ñu mă tŭ leh êlâo anăn.
Si sa čô “Mniê thâo mĭn” jing? Klei Bi Hriêng mtô snei, mnuih thâo mĭn jing mnuih huĭ mpŭ kơ Yêhôwa (Klei Bi Hriêng 9:10), đăo knang leh anăn tui duah klei Aê Diê čiăng (Klei Bi Hriêng 3:5). Kyuanăn, mkŏ mdơ̆ng klei hdĭp mngăt jing bruă brei pô jing mô̆ ngă êlâo hĭn, leh anăn jing bruă kơ jing jang mnuih hlăm sang msĕ mơh. Klei thâo mĭn mơ̆ng Aê Diê jing yuôm hlăm jih jang boh klei jing, wăt hlăm bruă mkŏ mdơ̆ng gŏ sang, leh anăn boh nik nak êjai tlă anăp hŏng klei dleh dlan hlăm klei jing ung mô̆ leh anăn hlăm klei hdĭp. Grăp blư̆ msĕ snăn, hŏng klei đĭ hriê kơ prŏng hlăm klei hdĭp mngăt leh anăn gưt Klei Aê Diê Blŭ, drei dưi mgaih mkra hŏng klei bi mơak kơ Khua Yang jih jang klei rŭng truh hlăm gŏ sang, msĕ si klei amâo bi ư ai mbĭt, klei mdê dhar kreh leh anăn klei mĭn mdê mdê ti krah gưl ênuk mdê mdê, klei dleh hŏng găp djuê tĭng kơ ung, tĭng kơ mô̆, klei prăk kăk, klei suaih asei mlei… Bi mklăk, tơdah amâo huĭ mpŭ kơ Aê Diê, grăp čô hlăm gŏ sang srăng ngă tui si klei mĭn pô dê, mgao, čuôt klih, kƀah klei khăp leh anăn kƀah klei thâo pap, atăt truh kơ “hŏng kngan drei pô yơh ruh” bi rai hĕ gŏ sang drei pô khăp hơiêng.
Grăp čô drei brei luă gŭ, tui duah Khua Yang leh anăn akâo kơ Khua Yang brei klei thâo mĭn (Y-Yakơ 1:5) čiăng dưi mkŏ mdơ̆ng sa gŏ sang suaih pral leh anăn jăk mơak.
Si ngă drei dôk “mdơ̆ng” amâodah dôk “ruh” gŏ sang drei pô?
Wah lač: Ơ Khua Yang, bi mni lač jăk Khua Yang kơ gŏ sang Ih brei kơ kâo. Akâo Khua Yang hơêč hmưi kơ gŏ sang kâo leh anăn brei grăp čô hlăm sang hmei tui duah Khua Yang nanao čiăng kơ hmei hrăm mbĭt mkŏ mdơ̆ng sa gŏ sang jăk mơak, bi mơak kơ Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Mathiơ 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
