Klei Aê Diê Blŭ: I Têsalônik 2:13-16
Êlan kliăng: “Msĕ mơh hmei bi mni kơ Aê Diê nanao kyua klei anei: tơdah diih mă tŭ leh klei Aê Diê blŭ hmei mtô kơ diih, diih tŭ leh klei blŭ anăn amâo djŏ msĕ si klei mnuih blŭ ôh, ƀiădah tui si gơ̆ jing sĭt nik klei Aê Diê blŭ, dôk mă bruă hlăm ai tiê diih phung đăo leh. ” (I Têsalônik 2:13)
Klei êmuh ksiêm mĭn: Ya klei Khua ƀĭng kna Y‑Pôl bi mni nanao kơ Khua Yang? Si phung đăo Têsalônik mă tŭ Klei Aê Diê Blŭ leh anăn si boh tŭ? Si diih mă tŭ Klei Aê Diê Blŭ kơ pô?
Khua ƀĭng kna Y‑Pôl bi mni nanao kơ Aê Diê kyua leh hmư̆ ñu hŏng phung mă bruă mbĭt mtô mblang phung đăo Sang Aê Diê Têsalônik ksiêm dlăng bi nik leh anăn thâo anei jing Klei Aê Diê Blŭ amâo djŏ jing klei blŭ anak mnuih ôh snăn diñu đăo leh anăn mă tŭ čiăng klei myang Klei Aê Diê Blŭ hlăm klei hdĭp diñu, đru kơ klei hdĭp diñu dưi bi mlih klă mngač leh anăn tŭ dưn kơ Aê Diê (êlan 13). Tơdah sa čô mnuih thâo kral leh anăn tŭ mă Klei Aê Diê Blŭ, klei anăn brei ƀuh diñu klă sĭt đăo kơ Khua Yang, mbĭt anăn ăt hưn klei dưi Klei Blŭ anăn hlăm klei hdĭp pô mơ̆ng bruă ngă hlue gưt.
Boh blŭ “mă tŭ” amâodah drông tŭ jing amâo djŏ knŏng hmư̆ jing djăp, ƀiădah “mă tŭ Klei Aê Diê Blŭ” jing sa hdră mđing hmư̆ mâo klei ksiêm mĭn leh anăn mă tŭ Klei Aê Diê Blŭ hlăm klei hdĭp pô. Lač mkăn jing, leh hmư̆ Klei Aê Diê Blŭ diñu bi mklă hdĭp hlue si klei ktrâo atăt mơ̆ng Klei Blŭ diñu mă tŭ, jing Klei Blŭ mâo klei dưi hlăm klei hdĭp pô. Kyua anăn, Klei Aê Diê Blŭ hmăi hlăm klei hdĭp klei đăo diñu ngă kơ diñu dưi kjăp, srăng tŭ klei dleh dlan tơdah arăng ngă jhat kyua klei đăo mơ̆ng phung hlăm ƀuôn sang pô, msĕ si klei bi hmô mơ̆ng dŭm Sang Aê Diê hlăm Khua Yang Yêsu Krist, klă klơ̆ng jing phung đăo hlăm Sang Aê Diê ti Yuđa (êlan 14).
Boh blŭ Khua ƀĭng kna Y‑Pôl yua čiăng lač kơ phung đăo ti Sang Aê Diê Têsalônik msĕ si “mâo klei đăo”, “mă tŭ Klei Aê Diê Blŭ” “tŭ klei dleh dlan” brei ƀuh phung đăo tinei klă sĭt dưi hriê kơ prŏng hlăm klei đăo. Diñu mâo klei đăo, mâo Klei Aê Diê Blŭ. Hĭn mơh, klei đăo diñu lŏ bi êdah mơ̆ng bruă ngă jing srăng tŭ klei dleh dlan kyua Klei Mrâo Mrang Jăk.
Knuih drei hŏng Klei Aê Diê Blŭ hŏng klei drei bi mklă srăng mă tŭ amâodah knŏng hmư̆ jing djăp srăng jing hnơ̆ng mkă klei hriê kơ prŏng hlăm mgăt ai tiê pô. Tơdah klă sĭt mâo klei đăo hlăm Khua Yang snăn drei srăng mă tŭ klei dưi Klei Blŭ mtô hlăm Klei Aê Diê Blŭ jing Klei Blŭ mơ̆ng Aê Diê, leh anăn Klei Blŭ anăn srăng ktrâo atăt drei čiăng kjăp ktang hlăm klei hdĭp klei đăo. Bi tơdah drei knŏng dlăng anăn jing klei mtô mơ̆ng anak mnuih snăn ênưih snăk drei srăng ngă bruă soh msĕ si đa đa phung Yuđa hlăk anăn ngă leh kơ phung đăo kơ Khua Yang (êlan 15-16).
Drei dưm leh klei myang mơ̆ng Klei Aê Diê Blŭ ngă bruă hlăm klei hdĭp drei mơ̆ amâodah ka?
Wah lač: Ơ Aê Diê! Kâo bi mni lač jăk kơ Ih kyua brei leh Klei Aê Diê Blŭ kơ kâo čiăng bi mlih klei hdĭp kâo leh anăn ktrâo atăt kâo thâo hdĭp bi mơak kơ Ih. Akâo kơ Ih đru kâo mă tŭ klei dưi Klei Aê Diê Blŭ hlăm djăp bruă hlăm klei hdĭp. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Êdah 18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
