Tơdrong jang 12:1-12
“Kơplah Yêsu oei tơ teh âu sơ̆, Sư krao pơret ‘Bă Sư păng hmoi apơi kơ ‘Bă Sư, yua kơ Sư băt kơ ‘Bă Sư gơh tơdŏng Sư đơ̆ng tơdrong lôch. Na ‘Bok Kei-Dei mơ̆ng Sư, yua kơ Sư chu yom kơ ‘Bok Kei-Dei.” (Hêbơrơ 5:7)
Nơ̆r jet tơchĕng pơwao:
– Kơplah ‘bok Pêtrôs oei lăm hnam phak, đĭ đăng bơngai lui pơm kiơ? Lĕch đơ̆ng tơdrong noh thoi yơ?
– Yua kơ kiơ bơ̆n athei krao khan đĭ jơhngơ̆m păng adrin?
Khul bơngai lui blŭng a sơ̆ krao khan đĭ jơhngơ̆m na Kră Yang ăn đei lơ tơdrong mơsêh, bơngai lui kơ Kră Yang wơ̆ tŏk dêh, đơ̆ng noh jơ̆p kơ dêh tơmoi, yang kơnê̆ ưh kơ wă khul bơngai lui hiôk ôh, trŏ thoi nơ̆r Yêsu đei pơma lê̆ hơdrol bơih “tơ ala teh âu iĕm gô đei tơdrong anat anot (Yôhan 16:33). Tơdrong tơm sư noh thoi lĕ ‘bar tŏ jrăng khul bơngai lui mă đe pơm kơnê̆. Yakơ đe chơ̆ng ako sư, na ‘bok Pêtrôs đe tah sư lăm hnam phak. Khul bơngai lui lăm jơ noh sơ̆ đei lăp minh trong đĕch gơh hlôi đơ̆ng tơdrong pơlong, “Hơtai Pêtrôs oei lăm hnam phak, na lu bơngai lui kơ Yêsu krao khan ling lang kơ ‘Bok Kei-Dei hăm đĭ jơhngơ̆m apinh Sư tơgŭm Pêtrôs wă kơ gơh lĕch.” (trong 5 BTTHĐ).
Kơplah tơdrong ‘mêm Kră Yang ăn đĕch kơ bơ̆n bơih mă khan lu bơ̆n tơ’bơ̆p tơdrong pơlong lăng tih truh dang yơ phŏ lăp ưh kơ ‘bôh tơdrong mơsêh, ‘bok Yakơ tơ’bơ̆p thoi tơdrong noh, ‘bok Pôl kư̆m dai oei lăm tơdrong jang noh na Kră Yang kuă ăn inh pơang kơ iĕm tơdrong noh, dang ei inh đei tơdrong nhek nhek dang jơla trŏ akar, pơm kơ sư pơmat na sư krao khan đĭ jơhngơ̆m lơ wơ̆t mălei Kră Yang khan huay ôh… tơdrong ih jang ưh kơ kĕ ưh kơ pran noh lê̆ kơ inh tơgŭm ih (II Kôrintô 12:6-10). Phŏ lăp Kră Yang yua lu tơdrong pơmat tat păng tơdrong kơnê̆ kơplah bơ̆n oei arih kiơ̆ kơ noh wă tơgŭm bơ̆n wơ̆ ‘lŏ hloh hăm nơ̆r krao khan đĭ jơhngơ̆m ‘biơ̆. Na gah ‘bok Pêtrôs, mă khan đei lu Linh jang ‘lơ̆ng dŏng tơgŭm, na sư oei tơchĕng khan nhen lĕ apo đĕch (trong 9)! Mălei đơ̆ng khul bơngai lui krao khan đĭ jơhngơ̆m, na Kră Yang pơm tơlei glang đêl chô̆ mah kơtĕch đơ̆ng ti păng pơm kơ tơdrong lui sư rai kơjăp.
Kơplah khul bơngai lui pôm jơhngơ̆m krao khan păng adrin krao khan ling lang, mă lu drŏkăn đei akŭm tơ hnam đe Mari (trong 12), na lu sư ‘bôh tơdrong mơsêh. Phŏ bơ̆n krao apinh Kră Yang tơgŭm kơ ‘nhŏng oh bơ̆n tơdrong kiơ noh, na đơ̆ng rŏng kơ noh dơ̆ng, năr đơ̆ng rŏng, giĕng đơ̆ng rŏng… lu bơ̆n pă đei ‘blŏk na wă pơtrơp krao khan tơgŭm dơ̆ng! Kră Yang Yêsu đei ăn kơ lu bơ̆n kơmĭl wă kơ krao khan đĭ jơhngơ̆m mă bơ̆n oei tơ ala teh âu, lăm jơ tuch luch Kră Yang krao khan pơret ‘Bă Sư păng hmoi hơpơi kơ ‘Bă Sư (Hêbrơ 5:7). Lĕch bơuh bơang thoi lĕ kơ pham lĕch đơ̆ng akâu Sư. (Luka 22:44).
Kră Yang hiơ̆k tơdrong krao khan đĭ jơhngơ̆m đơ̆ng lu kon pơlei Sư, Kră Yang pơkă păng ăn tơdrong bơ̆n apinh sĭt tơpă noh tơdrong gĭt kăl hloh ưh kơ trŏ mơ̆ng kơ bơ̆n apơi wă na ưh kơ ‘lơ̆ng kơ bơ̆n. Kră Yang ling lang tơl tơwih tơdrong bơ̆n apinh mălei phŏ lăp Kră Yang tơl tơwih ưh kơ kiơ̆ thoi bơ̆n wă phŏ lu bơ̆n ưh kơ ‘bôh tơdrong noh. Athei đĭ jơhngơ̆m păng adrin krao khan đĕch.
Ơ Kră Yang apinh Ih tơgŭm inh arih đei tơdrong tơ’bưh hăm Ih păng đĭ jơhngơ̆m krao khan mă đei tơ’bơ̆p tơdrong pơmat. Apinh Ih tơgŭm inh kơjăp lăm tơdrong ‘mêm Ih gô ăn kơ inh tơdrong ‘lơ̆ng. Krao khan yua anăn Kră Yang Yêsu Krist, Amen.
Lu bơ̆n hăm đei krao khan đĭ jơhngơ̆m dah bơ̆n đei tơdrong pơlong truh, tơdrong anat anot ưh?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 38-39
Kênh Youtube BHKTHN:
