Mathiơ 24:29-31
“Kơplah noh đĭ-đăng kon bơngai ala teh âu nhơ̆m hmoi yua kơ lu sư ‘bôh Inh Kon Bơngai ‘lơ̆ng rŏ mơsêh mơyang tih-tin jur hăm hơmơ̆l.” (Mathiơ 24:30)
Nơ̆r jet tơchĕng pơwao:
– Kră Yang tơbăt lê̆ adrol tơdrong Sư jur dơ̆ng rơđah rơđong dêh noh thoi yơ ’nei?
– Tơdrong Kră Yang Yêsu jur dơ̆ng rơđah dêh noh Hla bơar ’Bok Kei-Dei roi hơlen thoi yơ?
– Hla bơar’Bok Kei-Dei bơ̆n lăng năr’nâu tơ’blŏk kơ bơ̆n tơdrong kiơ?
Hla bơar ’Bok Kei-Dei bơ̆n lăng ’nâu, ‘nâu nơ̆r Kră Yang Yêsu tơl nơ̆r lu bơngai pơhrăm kiơ̆ Sư jet Sư tơdrong’nâu: “Đơ̆ng rŏng kơ noh Yêsu năm ngôi tơ kông Ôliwơ, na lu bơngai pơhrăm păng Sư jet Sư kơdrô̆ khan: “Apinh Ih roi kơ nhôn layơ đe wă pơrăm hnam akŭm ‘Bok Kei-Dei to păng đei tơdra liơ wă kơ nhôn kơnăl kơ Ih wă jur tơ teh âu păng kơnăl kơ năr tôch wă truh ?” (Mathiơ 24:3). Kră Yang tơbăt, đơ̆ng rŏng kơ lu năr gleh pơmat noh hloi, tơdrong tơdra tơbăt kơ bơ̆n Kră Yang Yêsu gô jur dơ̆ng. Tơdrong Kră Yang jur dơ̆ng rơđah rơđong thoi yơ, thoi yơ ei đei lu linh jang ’lơ̆ng hlôi roi tơbăt lăm năr Kră Yang tŏk tơ plĕnh noh thoi âu: “Ơ bơngai Galilê, iĕm lăng ‘bloh chă kiơ tơ plĕnh? Ning-mônh Sư gô jur dơ̆ng kư̆m thoi Sư tŏk mơ̆n” (Tơdrong jang 1:11).
Tơdrong Kră Yang Yêsu jur dơ̆ng rơđah rơđong dêh ‘noh pơm kơ lu hơtăl plĕnh ti păng tơ teh âu tơdrŏ kyĭng-kiơ̆ng, măt ’năr păng măt khei đêl hơdah ‘lơ̆ng rŏ ưang rang mơnhal jing măng mu, ’măn kơ Kră Yang Yêsu tơdrong ‘lơ̆ng rŏ ưang rang mơnhal noh, dôm lu sơnglŏng huŏng đĭ păng dôm tơdrong pran kơtang tơ rơwơ̆ng ti kư̆m dai pơpơ̆ hyĭng hyơ̆ng.
Kră Yang gô jur rơđah rơđong hloi, Sư yua hăm tơdrong mơsêh ’lơ̆ng rŏ ư-ang oei kơpal hơmơ̆l na đơ̆ng kơpal ti hơlơng hơlơng jur tơ ala, đĭ-đăng kon bơngai lăng ’bôh ngăl, lăm noh, đei lu mơ’nah lăng ’bôh hăm jơhngơ̆m hmach đĕch bơih, lu sư tŭr kơtơh nhơ̆m hơdrôi hơdrai pă băt pơm liơ, yua kơ đơ̆ng lu sư sơngah kuă kơ lui iŏk tơdrong Kră Yang mơnat dŏng pơklaih, lu sư gô oei lăm anih tơdrong hli krưp lăm khei năr gleh pơmat tih noh. Nơ̆r khan “mơsêh tih, ’lơ̆ng rŏ ư-ang tih” ’nâu roi hơlen tơdrong Kră Yang Yêsu mơsêh mơyang, ’lơ̆ng rŏ ư-ang kơplah Sư jur dơ̆ng tơ teh đak, jur rơđah rơđong ngơngei noh. Đĭ-đăng kon bơngai tơ ala teh âu gơh ngơk lăng hăm jơhngơ̆m pơyom kơkuh kơ Kră Yang Yêsu Anăn Mă ’Bar lăm Pêng Anăn Yang ’Bok Kei-Dei. Kră Yang gô wơh linh jang’lơ̆ng Sư hlôm keng jơwa kơtơ̆ng jơ̆p jang wă krao pơpôi lu bơngai mă Sư rơih iŏk bơih đơ̆ng jơ̆p jang anih kơpal teh âu, ‘nâu bơih‘bơ̆r keng tơdrong Kră Yang kĕ jei, hiôk hian rơnŭk rơnua. Lu bơngai Isơrael hlôi tơbral bơih kơplah khei năr pơmat tih noh lu sư brŏk tơ Kră Yang hăm jơhngơ̆m chhôk ngă’nă hal tơpă.
Đe roi hơ’mon tơdrong Khul Bơngai Lui đơ̆ng sơ̆ khơ̆ kơ dang ei hưch hanh dêh chang gô Kră Yang wă jur dơ̆ng. Khul Bơngai Lui tơpă kơ ’Bok Ke-Dei,lu sư ưh kơ pŭ tơdrong hli krưp lăm tơdrong gleh pơmat tih noh ôh, mă-lei rim’nu Bơngai Lui kơ Yêsu Krist ling-lang kăl kơ đei tơ’blŏk gah khei năr gleh pơmat tih noh, bơ̆n athei hơmet lê̆ hơdrol, đơ̆ng tơdrong arih bơ̆n, păng jơhngơ̆m bơ̆n chang gô năr Kră Yang jur dơ̆ng, sơng iŏk Khul Bơngai Lui. Bơ̆n ưh kơ pôm răp gô kơtơ̆ng linh jang ’lơ̆ng hlôm keng tơbăt tơdrong jei Kon Triu ‘bơ̆t năr tuch luch’nei đĕch ôh (trong 31), bơ̆n kư̆m chang gô linh jang hlôm keng đơ̆ng Kră Yang wơh wă krao pơpôi Khul Lui kơ Sư, thoi Hla bơar’Bok Kei-Dei khan: “Năr ei kơnh ‘bok yŏng lu linh jang ‘lơ̆ng gô pơma krao pơret đơ̆ng plĕnh ti păng đei linh jang ‘lơ̆ng hlôm keng ‘Bok Kei-Dei. Na Kră Yang Yêsu Krist jur hloi đơ̆ng plĕnh, na lu bơngai lôch mă lui kơ Yêsu boih sư iung arih ‘mơ̆i…” (I Têsalônik 4:16). Apinh Kră Yang tơgŭm bơ̆n đơ̆ng Sư hlôi tơ’blŏk kơ bơ̆n ’nâu bơ̆n kơchăng hloi bơih, păng bơ̆n krao khan rai dêh dơ̆ng wă kơ Kră Yang huay kơ lê̆ bơ̆n oei lăm năr gleh pơmat tih noh, bơ̆n huay kơ tŭr kơtơh, huay kơ hmach,huay kơ nhơ̆m hơdrôi hơdrai yua kơ bơ̆n lui tơpă bơih, păng bơ̆n hơmet bơih tơdrong arih wă sơng Kră Yang jur dơ̆ng.
Ơ Kră Yang Tơ’ngla’mêm mơnat, âu jơhngơ̆m inh hưch hanh chang gô năr Ih jur dơ̆ng.Apinh Ih tơgŭm inh ling-lang tơchĕng lăng inh kơdih wă kơ Yang Bơhngol ’Lơ̆ng tơhlâu ăn kơ inh’bôh dôm lu tơdrong yoch lăm inh, tơdrong yoch hlơp noh, wă kơ inh tơbral oei tam, adrol kơ năr Kră Yang Yêsu jur dơ̆ng. Inh krao khan yua Anăn Kră Yang Yêsu Krist, Amen!
Bơ̆n hơmet tơdrong arih thoi yơ bơih wă kơ pre jơhngơ̆m sơng Kră Yang jur dơ̆ng?
Đŏk Sơ̆p Hla bơar’Bok Kei-Dei lăm pêng sơnăm: Esơra 3
Kênh Youtube BHKTHN:
