Klei Aê Diê Blŭ: Y-Mathiơ 24:29-31
Êlan kliăng: “Hlăk anăn klei bi knăl kơ Anak Mnuih srăng bi êdah hlăm adiê. Jih jang phung găp djuê hlăm lăn ala srăng čŏk hia, leh anăn diñu srăng ƀuh Anak Mnuih hriê ti knam hlăm adiê hŏng klei myang leh anăn klei guh kơang prŏng” (Y-Mathiơ 24:30)
Klei êmuh ksiêm mĭn: Si Khua Yang hưn êlâo klei Ñu srăng lŏ hriê bi êdah ti lăn ala? Si klei čih kơ klei Khua Yang Yêsu srăng lŏ hriê bi êdah ti lăn ala? Si klei mñă kơ drei hlăm trăn Klei Aê Diê Blŭ anei?
Trăn Klei Aê Diê Blŭ anei jing klei Aê Diê wĭt lač kơ klei phung ƀĭng kna êmuh: “…ya jing klei bi knăl kơ klei Ih lŏ hriê, leh anăn kơ hruê knhal tuč ênuk”? (Y-Mathiơ 24:3). Khua Yang brei thâo leh dŭm hruê knap mñai, klei bi knăl kơ Khua Yang Yêsu lŏ hriê srăng truh. Klei Khua Yang hriê mâo leh phung dĭng buăl jăk hưn hlăm hruê Khua Yang đĭ wĭt kơ adiê “…Yêsu anei, Pô Aê Diê pŭ ba leh kơ adiê mơ̆ng diih, srăng lŏ hriê msĕ si diih ƀuh Ñu đĭ kơ adiê mơh” (Bruă Phung Khua Ƀĭng Kna 1:11).
Klei Khua Yang Yêsu srăng lŏ hriê bi êdah jing klei kpư̆ mgei jih lăn adiê, yang hruê srăng jing mmăt, mlan amâo srăng lŏ mtrang mngač ôh, phung mtŭ srăng lĕ mơ̆ng adiê leh anăn jih klei myang hlăm phung adiê srăng kpư̆ mgei, Khua Yang srăng bi êdah klă mngač, Ñu mă klei dưi guh kơang leh anăn hriê ti knam hlăm adiê, jih jang mnuih ƀuh sơăi, hlăm anăn, đa đa mnuih srăng ƀuh hlăm klei hơưi hƀlŏk leh anăn tŭk đah da čŏk hia kyua diñu hngah leh kơ klei bi mtlaih Khua Yang leh anăn dôk hlăm rŭng răng mơ̆ng ênuk knap mñai. Boh blŭ “klei guh kơang prŏng” lač kơ klei guh kơang Khua Yang Yêsu tơdah ñu lŏ hriê ti lăn ala, grăp čô mnuih srăng ƀuh klei guh kơang Aê Diê Tal Dua. Khua Yang srăng tiŏ nao phung dĭng buăl jăk ñu ayŭ ki kraih ktang čiăng bi kƀĭn jih jang phung Ñu ruah leh kluôm lăn ala, anei jing ênai ki klei dưi, êđăp ênang. Phung Israel kmhal leh klei soh hlăm ênuk knap mñai srăng wĭt hlăm klei mơak mñai.
Jih hƀuê ênuk Phung Sang Aê Diê, phung ƀuôn sang Ñu hur har dôk čang guôn hruê Khua Yang Yêsu lŏ hriê. Phung Sang Aê Diê amâo lŏ tŭ klei rŭng răng kơ klei kñap mñai ôh, ƀiădah grăp čô Phung đăo kơ Krist hmư̆ klei mñă nanao kơ ênuk anei, drei srăng mprăp klei hdĭp leh anăn ai tiê dôk čang guôn hruê Khua Yang lŏ hriê drông Phung Sang Aê Diê. Drei amâo djŏ knŏng guôn ênai ki hưn klei dưi knhal tuč mơ̆ng Êđai Biăp ôh (êlan 31), ƀiădah lŏ čang hmăng ênai ki bi kƀĭn Aê Diê brei kơ Phung Sang Aê Diê: “Kyuadah Khua Yang pô srăng trŭn hriê mơ̆ng adiê hŏng klei ur mjan, hŏng asăp khua dĭng buăl jăk Aê Diê, leh anăn hŏng asăp ki Aê Diê. Leh anăn phung djiê leh hlăm Krist srăng kbiă lŏ hdĭp tal êlâo hĭn…” (I Têsalônik 4:16-17). Akâo kơ Khua Yang đru drei mâo klei mñă brei dôk răng leh anăn wah lač čiăng amâo lui ôh hlăm ênuk knap mñai, amâo tŭk đah da hƀlŏk, čŏk hia ôh kyua pô amâo đăo kơ Khua Yang leh anăn amâo mprăp klei hdĭp pô čiăng drông Khua Yang lŏ hriê.
Si drei mprăp klei hdĭp pô čiăng drông Khua Yang lŏ hriê?
Wah lač: Ơ Khua Yang khăp hơiêng, kâo hur har dôk čang guôn hruê Ih lŏ hriê. Akâo kơ Ih đru kâo ksiêm dlăng pô čiăng kơ Yang Mngăt Jăk ktrâo kơ kâo ƀuh klei soh hgăm hlăm kâo leh anăn kâo hmao kmhal êlâo kơ hruê Khua Yang Yêsu lŏ hriê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsra 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail:elankleisitnik@gmail.com
Kênh Youtube BHKTHN:
