II Hơ’mon 33:1-11
“ …athei hŭt lê̆ đĭ dôm tơdrong kơnê̆. ‘Nĕ pă pơm tơdrong kơnê̆ dơ̆ng.” (Êsai 1: 16b)
Nơ̆r jet tơchĕng pơwao:
– Pơtao Manase đei pơm tơdrong yoch kơnê̆ kiơ ‘bơ̆t anăp Kră Yang?
– Kră Yang pơm tơdrong kiơ wă tơ’blŏk kơ pơtao?
– Lu bơ̆n băt mơn kơdih kăl kơ tơbral păng tŭk đi tơdrong kiơ?
Manase tŏk pơm pơtao kơplah mơjĭt ‘bar sơnăm, pơgơ̆r pơđăm jĭt pơđăm sơnăm, sơ̆p hla bơar nơ̆r ‘Bok Kei-Dei roi tơbăt kơplah pơtao puh pơ̆k lăm tơdrong kơnê̆ rai lơ dêh. Nơ̆r “pơm tơdrong kơnê̆” (trong 2), truh tơ “pơm tơdrong kơnê̆ krưp dêh”, pơm lơ tơdrong yoch kơnê̆ rai dêh (trong 6), păng “ pơm tơdrong yoch kơnê̆ hloh kơ adrĕch drung mă ‘Bok Kei-Dei wă pơrăm” (trong 9). Pơtao man tơiung dơ̆ng lu anih kơjung mă đêl ‘bă sư pơrăm lê̆, pơm chơnang soi ăn kơ yang ‘Baal păng man rup yang Asêra, lăng nhen thoi akăn ‘Baal, lăm tơdrong kơkuh kơ yang Asêra, lu bơngai drŏ-nglo kơkuh lăng kơdih nhen thoi ‘Baal wă kơ gơh ‘bĭch hơdai hăm lu drŏ-kăn đi, pơtih kơ Asêra. Mă tơpă, noh kon bơngai chă tơchĕng đĕch wă kơ kiơ̆ kơ jơhngơ̆m ‘maih wă kơdih, pơtao kơkuh kơ lu sơnglŏng kơpal plĕnh păng man tơiung lu chơnang soi, pơm rup Asêra lăm anih hnam akŭm kơkuh kơ Kră Yang ưh kơ man tơ ‘nguaih cham hnam akŭm thoi lu pơtao pơm yoch kơnê̆ adrol. Pơtao pơm lơ tơdrong yoch kơnê̆ mă Kră Yang hil areh noh pơyơ̆r kon kơdih pơm tơmam soi ‘buh ăn kơ yang Môlŏk, lăng ti wă kơ băt adrol, chă lu pơjâ̆u tơwir, kiơ̆ lu bơngai krao pơma dơnuh hăm atâu. Pơtao pơm lơ tơdrong yoch kơnê̆ rai dêh wă tơblĕk Kră Yang (trong 6).
Kơplah ưh kơ hli yom kơ Kră Yang na pơtao Manase kư̆m pơhlŭ kon pơlei pơm tơdrong yoch kơnê̆ rai dêh (trong 9), mă khan đei đơ̆ng ‘bă sư pơtao Hesekia lui yom mă-lei pơtao Manase đei pơm tơplơ̆ hăm tơdrong mă đêl ‘bă sư pơm. Kră Yang khan tơbăt dah kon pơlei pơla Sư rokkiơ̆ khôi juăt, nơ̆r pơkă tơtă mă Kră Yang yua Môis bơtho tơ’bôh lei Kră Yang huei kơ toh lê̆ lu sư đơ̆ng lăm teh đak mă ăn bơih kơ ‘bok yă lu sư (trong 8). Đơ̆ng noh dơ̆ng pơtao oei chông anhăk kon pơlei kơkuh kơ rup yang, ding mah lu sư pơm yoch kơnê̆ hloh kơ adrĕch adrung mă Kră Yang wă pơrăm ‘bơ̆t anăp lu kon pơlei Israel, păng ăn kơ lu sư đơ̆ng kơ noh jing đe rôp bơnă. Kră Yang ‘mêm mơnat, wă kơ pơtao Manase păng kon pơlei tơbral, thoi noh đei yua lu bơngai khan lê̆ adrol mă-lei “lu sư ưh kơ wă lăng” păng Kră Yang chă trong wă kơ lu sư mơ̆ng lăng. Noh Kră Yang pơm ăn kơ Asiri truh năm blah, pơtao Manase đe rôp chô̆ hăm tơlei glang chông ba tơ dêh char ‘Babilôn.
Tơdrong yoch rai dêh păng dui hor thim lơ bơngai puh pơ̆k pơm yoch, dah ưh kơ wă mơ̆ng lăng păng pơm kiơ̆ nơ̆r Kră Yang pơkă khan lăm nơ̆r Sư, mă khul bơngai lui kư̆m gô pơm tơdrong yoch kơnê̆ ‘bơ̆t anăp Kră Yang, rok kiơ̆ tơdrong kơnê̆ ‘mê̆ ‘mach ala teh, kơkuh kơ rup yang mă ưh kơ ‘bôh mơn lăm jơhngơ̆m yua kơ tŭk lê̆ Kră Yang pơgơ̆r, lui kơ tơdrong lăng ti wă kơ băt adrol, lui ngeh kư̆ kă tơplih kơ lui ngeh kơ Nơ̆r Kră Yang; arih kư̆ kă truh tơ mah pơlôch kon nge, pơlôch kon kơdih kơplah tam mă rơneh.v.v… Athei tơbral hloi, dah ưh, truh tơ jơ ‘năr Kră Yang, yua kơ Kră Yang ‘mêm mơnat gô chrih bơtho phak trăp wă kơ tơ’blŏk kơ lu bơ̆n.
Kơkuh kơ Ih, ơ Kră Yang apĭnh Ih ăn kơ inh gơh tŭk tơdrong kiơ mă pơm kơ Kră Yang ưh kơ lăp đon, lăm đon tơchĕng dah lăm tơdrong arih, apĭnh Ih ăn kơ inh ‘maih mơ̆ng lăng păng pơm kiơ̆ nơ̆r Kră Yang. krao khan yua anăn Kră Yang Yêsu Krist. Amen.
Lu bơ̆n hăm oei đei pơm tơdrong yoch kơnê̆ kiơ wă tơblĕk Kră Yang?
Đŏk sơ̆p hla bơar nơ̆r ‘Bok Kei-Dei lăm pêng sơnăm: II Hơ’mon 15
Kênh Youtube BHKTHN:
