Rôm 15:1-13
“’Bok Kei-Dei ăn kơ bơ̆n đei đon lui kơjăp păng ăn kơ bơ̆n oei hiôk, na inh apinh Sư ăn kơ iĕm oei hiôk gơh găt dih băl, kư̆m thoi Yêsu Krist bơngai gơh găt păng bơ̆n. Thoi noh na đĭ đăng kơ iĕm jing pôm ‘bơ̆r pôm đon ư-ang Kră Yang ‘Bok Kei-Dei mă ‘Bă Yŏng Kơdră bơ̆n Yêsu Krist.” (Rôm 15:5-6)
Nơ̆r jet tơchĕng pơwao:
– ‘Bok Pôl athei kon pơlei Kră Yang arih thoi yơ?
– Yua kơ kiơ kon pơlei Kră Yang kăl kơ arih thoi noh?
– Khul bơngai lui kơ Kră Yang athei arih pôm jơhngơ̆m đon thoi yơ?
‘Bok Pôl bơtho lu bơngai mă lui pran kơjăp, jing minh ‘nu bơngai wơ̆ ‘lŏ gah bơhngol athei hiơ̆k pŭ iŏk tơgŭm lu bơngai lui rơdu, lu bơngai mă rơdu gah tơdrong lui. Bơngai lui pran ưh kơ hiơ̆k pơm tơdrong ‘lơ̆ng kơdih đĕch mălei hiơ̆k tơgŭm pơm pơhiôk kơ lu bơngai đei đon lui oei rơdu wă tơgŭm gơh đei yua păng tơ’bôh tơdrong pơm ‘lơ̆ng “tơgŭm” wă khan anhăk, chơ, kĕ iŏk tơdrong trăp atŏk. Bơngai pran kăl kơ kĕ chơ̆n tơgŭm lu bơngai rơdu gơh tŏk tơiung lăm tơdrong lui (1-2). Sư pơma tơlĕch tơdrong ‘lơ̆ng wă kơ lơ bơngai rok kiơ̆. Kră Yang Yêsu. Yang mă ‘bar lăm ‘Bok Kei-Dei ưh kơ đei rơih pơm tơdrong kiơ̆ kơdih, mălei pơm kiơ̆ thoi Yang ‘Bă wă, chu lôch akâu kơdih, wă ba tơdrong dŏng pơklaih kơ kon bơngai. Kră Yang Yêsu sơng iŏk bơ̆n lăm tơdrong kơnê̆ ‘mê̆ ‘mach rim lu bơ̆n. Sư chu pŭ iŏk dôm tơdrong kơnê̆ bơ̆n, adrin bơtho wă kơ bơ̆n jing thoi Sư (3-6). Khul bơngai Lui tơ pơlei Rôm lơ bơngai phara pha, đei lơ tơdrong phara băl mălei đei lơ bơngai Kră Yang mơnat dŏng tơgŭm, kư̆m krao Kră Yang bơih ‘Bă. Thoi noh, ‘nhŏng oh lăm hnam dơnŏ Kră Yang kăl kơ pôm jơhngơ̆m đon “thoi Yêsu Krist” (trong 5), wă khan athei pôm jơhngơ̆m đon lăm Yêsu Krist ưh kơ sĭ pôm đon dih băl pơm kiơ̆ minh ‘nu bơngai bu ôh.
Dah pôm jơhngơ̆m đon lăm Kră Yang lei “iĕm ‘nĕ kơ pơdêh dih băl (trong 7). Bơ̆n ngăl ‘bônh dêh kơ pơdê băl yua kơ đơ̆ng dôm tơdrong phara gah tơdrong hlôh băt gah bơhngol dah gah tơdrong tơchĕng, mălei dah arih hơdai thoi noh lei liơ “gơh ư-ang kơ ‘Bok Kei-Dei” sư khan hơđăl ‘Bok Kei-Dei bơih tơpăt, wei răk dôm nơ̆r pơkă hăm adrĕch adrung Abraham sơ̆, đơ̆ng adrĕch adrung noh, rim kơ kon pơlei pơla gô đei pŭn hiôk (Blŭng a 22:18). Đơ̆ng trong 9-12, Sư tơ’bôh thim dơ̆ng lơ nơ̆r ‘Bok Kei-Dei wă tơbăt kơ tơdrong ‘mêm păng tơdrong tơdă Kră Yang dŏng pơklaih ‘măn kơ bơngai tơmoi ưh kơ đei pơdê kơ bu ôh.
Rim ‘nu bơngai lui gơh huai iŏk tơdrong yoch hăm pham gĭt kăl Kră Yang păng tă gĭt kăl ‘bơ̆t anăp Kră Yang ngăl. Bơ̆n kăl kơ đei nơ̆r Kră Yang bơtho tơ’bôh păng pơlung pơtrŭt bơ̆n krao khan, krao khan tang wă kơ mă bu bu bơ̆n ‘maih kư̆m đei jơhngơ̆m pran arih pôm jơhngơ̆m đon hăm Yang Bơhngol ‘Lơ̆ng, pôm jơhngơ̆m đon bơ̆jang păng ư-ang kơ ‘Bok Kei-Dei, wă hơdai tơgŭm dih băl wơ̆ ‘lŏ gah bơhngol lăm Kră Yang.
Ơ Kră Yang, inh bơnê kơ Ih yua kơ đơ̆ng tơdrong ‘mêm păng tơdrong Ih mơnat ăn đĕch, inh gơh jing kon Ih. Apinh Ih ăn kơ inh jơhngơ̆m pran gah tơdrong lui, tơdrong ‘mêm, tơdrong gơh hơgei păng jơhngơ̆m kĕ chơ̆n wă kơ inh arih chơt hiôk păng pôm jơhngơ̆m đon hăm ‘nhŏng mŏ oh lăm tơdrong kơkuh kơ Kră Yang păng tơgŭm dih băl wơ̆ ‘lŏ gah bơhngol rim năr. Krao khan yua anăn Kră Yang Yêsu Krist, Amen.
Bơ̆n oei pôm jơhngơ̆m đon hăm Yang Bơhngol ‘Lơ̆ng dah mă pôm jơhngơ̆m đon hăm tơduă kon bơngai kiơ̆ kơdih?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 46
Kênh Youtube BHKTHN:
