Klei Aê Diê Blŭ: Klei Kbiă 29:26-37
Êlan kliăng: “Êjai kjuh hruê brei ih ngă klei bi doh knưl anăn leh anăn pioh brei ñu, leh anăn knưl srăng jing doh jăk hĭn. Ya mnơ̆ng djŏ ti knưl srăng jing doh jăk” (Klei Kbiă 29:37).
Klei êmuh ksiêm mĭn: Ya klei drei ƀuh kơ Aê Diê mơ̆ng bruă myơr mnơ̆ng pap brei klei soh, klei mkra mjing mnơ̆ng ƀơ̆ng phung khua ngă yang hlăm jih gưl knăm mđĭ mjing khua ngă yang? Ya jing klei yuôm bhăn mơ̆ng knưl ngă yang hlăm klei bhiăn mđi jing Khua ngă yang? Ya klei hriăm drei mâo hlăm klei hriăm hruê anei?
Aê Diê doh jăk anăn hlei pô nao giăm Ñu ăt brei jing doh jăk mơh. Kyua anak mnuih amâo mâo klei dưi bi doh pô ôh anăn Aê Diê brei leh sa hdră čiăng bui doh klei soh anak mnuih hlăm knăm akâo pap brei klei soh hlăm ênuk Klei Bi Mguôp Hđăp, ăt jing gru rup mơ̆ng Khua Yang Yêsu hlăm ênuk Klei Bi Mguôp Mrâo, sa mta mnơ̆ng myơr kluôm dhuôm Aê Diê mprăp brei. Jih kjuh hruê, phung khua ngă yang brei hlŏng dôk hlăm Sang Yang čiăng ngă klei bhiăn ngă yang akâo pap brei klei soh (êlan 36-37; Bruă Lêwi 8:33). Klei anei brei ƀuh Aê Diê mđing kơ klei brei kơ phung khua ngă yang jing doh jăk (Bruă Lêwi 11:45).
Knưl ngă yang srăng jing doh jăk leh kjuh hruê mđĭ Y‑Arôn leh anăn phung anak êkei ñu jing khua ngă yang. Aê Diê mơak sĭt phung ƀuôn sang Ñu gưt djăp mta Klei Aê Diê Blŭ mtô. Klei Aê Diê dôk mbĭt ngă kơ mnơ̆ng myơr, mnơ̆ng ƀơ̆ng leh anăn phung khua ngă yang… jih jang dưi jing doh jăk. Ti anôk mâo Aê Diê dôk mbĭt, anôk anăn srăng jing doh jăk. Ăt snăn mơh, drei hruê anei dưi dlăng jing phung ƀĭng kna doh jăk amâo djŏ kyua drei doh jăk hĭn kơ lu mnuih ôh ƀiădah kyua drei dưi bi mguôp hŏng Tlâo Yang Aê Diê doh jăk. Aê Diê Ama ruah leh drei êlâo kơ mphŭn hrih mjing lăn ala (Êphêsô 1:4), Aê Diê Anak bi tui leh drei hŏng êrah yuôm Ñu, leh anăn Yang Mngăt Jăk hlăk dôk mbĭt, bi hriăm, bi doh drei grăp hruê.
Aê Diê jing klei khăp. Ñu mpŭ kơ phung mă bruă kơ Ñu, bi sĭt klei digơ̆ čiăng. Hlăm jih kjuh hruê mđĭ jing khua ngă yang, Aê Diê brei leh kơ Y‑Môis leh anăn phung Khua ngă yang klei pap dưi ƀơ̆ng mnơ̆ng ƀơ̆ng dưi bi doh jăk pô mkăn amâo dưi yua ôh. Diñu srăng ƀơ̆ng kdrêč kđeh čĭm grưh leh anăn pha êđai biăp knô myơr jing mnơ̆ng ngă yang bi mni. Kdrêč kđeh čĭm anei dưi tŭk ti anôk doh jăk, dưi ƀơ̆ng hŏng ƀêñ hlăm bai dưi myơr hlăm sang čhiăm. Tơdah kđeh čĭm leh anăn ƀêñ êbeh truh hruê êdei brei nao čuh (êlan 34), snăn phung khua ngă yang mâo nanao mnơ̆ng ƀơ̆ng mrâo hlăm grăp hruê. Bi mni kơ Khua Yang kyua hruê anei Aê Diê ăt brei “phung khua ngă yang kơ mtao” (I Y‑Pêtrôs 2:9). Aê Diê ăt ƀuăn brei djăp mnơ̆ng ƀơ̆ng huă hŏng djăp mta klei čiăng yua grăp hruê (Y‑Mathiơ 6:31-33). Kyua anăn brei hdĭp hdơr knga leh anăn răng kriê pô doh jăk kyua Aê Diê drei jing doh jăk.
Drei mđĭ nanao mơh klei bi mguôp sĭt suôr hŏng Aê Diê Doh Jăk?
Wah lač: Bi mni Aê Diê Tlâo Yang doh jăk! Akâo kơ Ih đru kâo thâo mđing bi mđĭ klei bi mguôp sĭt suôr hŏng Aê Diê hlăm klei wah lač leh anăn hriăm Klei Aê Diê Blŭ čiăng kâo dưi jing doh jăk, êbat hlăm klei gưt asăp leh anăn bi guh kơang Anăn doh jăk Ih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: H’Êsther 9:18-10:3
Kênh Youtube BHKTHN:
