Klei Aê Diê Blŭ: Klei Kbiă 29:15-18
Êlan kliăng: “Arăng pơ̆ng leh kâo ti kyâo bi kal mbĭt hŏng Krist; snăn amâo djŏ ôh kâo pô dôk hdĭp, ƀiădah Krist dôk hdĭp hlăm kâo. Leh anăn klei kâo dôk hdĭp hlăm kđeh ară anei, jing kâo dôk hdĭp hŏng klei đăo kơ Anak Aê Diê, Pô khăp kơ kâo leh anăn jao leh Ñu pô kyua kâo” (Galati 2:20).
Klei êmuh ksiêm mĭn: Si ngă hdră myơr mnơ̆ng myơr tal dua jing sa hlăm dua drei biăp knô? Ya klei jing mnơ̆ng myơr hŏng pui mâo mnâo ƀâo mngưi hlăm knăm mđĭ jing khua ngă yang? Ya klei hriăm drei mâo hlăm klei hriăm hruê anei?
Leh ngă knăm myơr mnơ̆ng ngă yang pap brei klei soh kơ Y‑Arôn leh anăn phung anak êkei ñu hŏng mnơ̆ng ngă yang tal êlâo jing sa drei êmô knô dam, Y‑Môis ngă klei ngă yang myơr mnơ̆ng bi mni hŏng mnơ̆ng myơr čuh tal dua jing sa hlăm dua drei biăp knô. Y‑Arôn leh anăn phung anak êkei ñu dưm kngan ti kŏ biăp knô mđrĭng hŏng klei jing sa hŏng biăp, leh anăn mdjiê biăp anăn mă êrah htrah jŭm dar knưl ngă yang. Leh anăn, khăt biăp knô anăn bi kdrêč, rao prôč tiê leh anăn jơ̆ng, leh anăn dưm mbĭt hŏng kdrêč gơ̆ leh anăn boh kŏ gơ̆, čuh jih biăp knô anăn ti dlông knưl jing mnơ̆ng myơr čuh kơ Yêhôwa, mnâo ƀâo jăk, mnơ̆ng myơr hŏng pui kơ Yêhôwa (êlan 15-18). Prôč tiê leh anăn jơ̆ng jing kdrêč amâo doh brei rao bi doh, bi hmô kơ dŭm mta hlăm klei hdĭp phung khua ngă yang ka bi mơak kơ Aê Diê snăn brei rao bi doh. Jih drei biăp dưi ba čuh ti knưl čiăng mjing mnâo ƀâo mngưi myơr kơ Aê Diê djŏ tui si hlăm Bruă Lêwi 1:10-13 kčah, čiăng lač kơ phung khua ngă yang srăng myơr kluôm ênŭm kơ Aê Diê, jih klei hdĭp diñu knŏng thơ̆ng mă bruă Aê Diê leh anăn bi mơak kơ Ñu.
Bruă phung khua ngă yang ngă jing đru kơ phung ƀuôn sang Aê Diê hdĭp leh anăn kkuh mpŭ kơ Ñŭ hŏng klei djŏ. Diñu dưi ngă dŭm klei bhiăn ngă yang, wah lač brei leh anăn bi hriăm phung ƀuôn sang Aê Diê tui hluê klei Aê Diê čiăng. Wăt tơdah bruă ngă ênưih ƀiădah čiăng bi leh bruă klam Aê Diê jao hlăm djăp mta bruă, brei diñu thâo săn asei lu snăk kơ hruê mông leh anăn ai ktang kyua hƀuê ênuk brei buh phung ƀuôn sang Aê Diê ăt jing phung mâo ai tiê khăng, knuih mâo hlăm diñu jing čiăng ngă tui si klei pô čiăng, amâo hlue ngă ôh klei bhiăn Aê Diê mtă.
Grăp čô phung đaŏ kơ Krist khăng dlăng kơ knuih pô jing soh jhat. Ƀiădah Khua Yang Yêsu săn leh asei yuôm bhăn čiăng bi mtlaih drei, bi mrâo drei dưi jing anak Ñu. Ñu ăt brei kơ drei sa anôk bruă čiăng mă bruă kơ Ñu. Grăp čô mnuih brei thâo kral mta bruă Aê Diê ciăng pô mă, leh anăn brei drei pơ̆ng ti kyâo bi kal klei pô mgao mbĭt hŏng Krist, iêô Khua Yang kiă kriê hlăm klei hdĭp drei leh anăn srăng ngă djăp mta bruă kơ Pô khăp leh kơ drei leh anăn djiê hrô kơ phung drei.
Drei myơr leh jih klei hdĭp pô čiăng mă bruă hlăm ya mta bruă Aê Diê jao leh mơ̆ ka?
Wah lač: Ơ Khua Yang! Kâo amâo dưi yăl dliê jih ôh klei khăp Ih leh anăn klei yuôm bhăn Ih ngă kơ kâo! Klei hdĭp kâo anei, akâo kơ Khua Yang yua kâo hlăm bruă Ih leh anăn akâo kơ Ih đru kâo bi leh bruă mă hlue si klei Ih čiăng hŏng ai tiê mơak leh anăn hdơr knga.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Klei Yăl Dliê 35:20 – 36:8
Kênh Youtube BHKTHN:
