Klei Aê Diê Blŭ: Klei Mtô Mñă Klei Bhiăn 30:1-6
Êlan kliăng: “Yêhôwa, Aê Diê diih srăng atăt ba diih mŭt hlăm ala čar phung aê diih đưm mă leh, čiăng kơ diih dưi mă bha. Ñu srăng brei diih čăt đĭ lu hĭn leh anăn jing lar êngŭm hĭn kơ phung aê diih đưm” (Klei Mtô Mñă Klei Bhiăn 30:5)
Klei êmuh ksiêm mĭn: Ya klei Aê Diê srăng ngă tơdah phung ƀuôn sang kmhal lŏ wĭt hŏng Ñu?nYa ngă klei Aê Diê pap brei mâo klei kmhal klei soh? Ya klei brei drei ngă tơdah ngă soh hŏng Khua Yang?
Tơdah kdrêč 29 lu jing lač kơ klei hưn brei răng kơ phung ƀuôn sang Israel kơ boh jhat kjham snăk mơ̆ng klei bi kdơ̆ng, snăn hlăm kdrêč 30 anei lŏ lač kơ ai tiê thâo pap êbeh dlai Aê Diê pap brei kơ phung ƀuôn sang Ñu tơdah klă sĭt kmhal klei soh, tŭ ư wĭt kkuh mpŭ kơ Aê Diê. Aê Diê amâo knŏng tŭ hjăn ai tiê kmhal klei soh ƀiădah wăt lŏ hrui mă wĭt jih klei tăm pah tuh leh kơ digơ̆ mơh. Aê Diê lač êlâo kơ klei arăng srăng mă phung ƀuôn sang Aê Diê jing mnă kyua ngă soh kjham hŏng Ñu, ƀiădah tơdah diñu leh anăn anak čô diñu kmhal, wăt tơdah arăng mă jing hlŭn ti lu anôk dưn mơh, Aê Diê ăt srăng ba wĭt diñu ti anôk Aê Diê brei leh kơ phung aê diñu mjing ngăn drăp, Ñu srăng đru kơ digơ̆ lŏ jing mdrŏng sah leh anăn lu êngŭm hĭn êlâo kơ anăn.
Wăt tơdah Aê Diê jing Pô mdrŏng hŏng klei pap, ƀiădah brei drei hdơr, amâo ôh kyua snăn Ñu tŭ ư kơ hlei pô ăt khăng ai tiê dôk hlăm klei hdĭp soh jhat. Trăn Klei Aê Diê Blŭ anei brei ƀuh Aê Diê knŏng pap brei, bi mrâo kơ phung ƀuôn sang Israel tơdah diñu klă sĭt kmhal klei soh, lui knuih hdĭp hđăp, lŏ wĭt hŏng klei hdĭp hŏng klei bhiăn Aê Diê mtă leh hlăm hdruôm hră klei bhiăn. Dưi lač, klei Aê Diê pap brei kơ phung ƀuôn sang Ñu mâo sa klei brei ngă jing kmhal klei soh, ƀiădah anăn jing klei djŏ guôp. Kyua tơdah klei pap amâo mâo klei mtui, tŭ ư lăm lui dŭm klei soh phung ngă soh wăt tơdah diñu ăt dôk hdĭp hlăm klei soh, snăn anăn jing phưi brei ngă soh, leh anăn amâo djŏ jing knuih Aê Diê ôh.
Trăn Klei Aê Diê Blŭ anei msĕ si sa klei blŭ jak iêô kơ hlei pô sui hŏng anei lui Aê Diê, êran tiŏ klei pô čiăng leh anăn găn lu klei amâo tŭ jing hlăm klei hdĭp. Ai tiê thâo pap prŏng prĭn mơ̆ng Aê Diê drông nanao hlei pô thâo pô ngă soh, kmhal klei soh, lui knuih hdĭp hđăp leh anăn lŏ wĭt kkuh mpŭ kơ Aê Diê. Klei năng ênguôt jing hlăm boh sĭt, lu blư̆ drei hêñ kơ klei hdĭp pô soh jhat, bi mĭn ya klei pô ngă leh kjham đei leh anăn Aê Diê amâo srăng pap brei ôh, anăn drei hngah kơ klei dưi lŏ wĭt kơ Khua Yang. Leh anăn ƀrư̆ hruê lĕ êlam hĭn hlăm êlan klei soh! Brei drei hdơr, amâo mâo ôh ya klei soh prŏng tơl Aê Diê amâo dưi pap brei, knŏng mâo ai tiê amâo kmhal wĭt kơ Aê Diê đuč. Brei kmhal mtam êlâo kơ hnui hĕ.
Mâo ya klei gang mkhư̆ drei kmhal wĭt kơ Khua Yang mơ̆?
Wah lač: Ơ Khua Yang, jing Pô êmưt ngêñ, bŏ hŏng klei jăk leh anăn mdrŏng klei pap. Hlăm klei hdĭp kâo, kâo amâo dưi ñĕ ôh kơ klei soh. Akâo kơ Ih đru kâo thâo kmhal mtam grăp blư̆ ngă soh čiăng kơ kâo dưi thâo klei Aê Diê pap brei êbeh dlai. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Yôsuê 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
