Klei Aê Diê Blŭ: Klei Mphŭn Dơ̆ng 3:1-6
Êlan kliăng: “Brei diih kăp răng bĕ leh anăn wah lač, čiăng kơ diih amâo lĕ hlăm klei mplư ôh. Mngăt čiăng snăk, ƀiădah kđeh jing awăt.” (Y-Markôs 14:38)
Klei êmuh ksiêm mĭn: Si klei H’Êwơ lĕ ti anăp klei Satan mplư? Ya jing phŭn knhal ngă kơ ñu lĕ ti anăp klei mplư? Si Khua Yang Yêsu mtô leh kơ hdră êlan yuôm čiăng dưi găn klei mplư?
H’Êwơ blŭ hrăm hŏng ala êjai dôk dưn war djam jăk siam tloh ênoh Khua Yang brei. Yang jhat hlăm rup sa drei ala (Klei Bi Êdah 12:9) yua mtam mmông găl anăn kăp mplư leh anăn blŭ luar hŏng H’Êwơ hŏng klei êmuh “Si ngă Aê Diê jing jăk ƀiădah kăm ghă ƀơ̆ng boh jih jang ana kyâo hlăm war djam? ” H’Êwơ yap ñu thâo săng Klei Aê Diê lač tơdah ñu lŏ mkra lač, Aê Diê knŏng amâo brei ƀơ̆ng boh mơ̆ng sa ana kyâo đuč, amâo djŏ jih jang ôh! Snăn mâo klei Aê Diê kăm ghă! “Ala” ƀêč ƀưi kơ mnơ̆ng mplư klei ñu lač jing djŏ, wăt djŏ knŏng sa kdrêč điêt dưn! H’Êwơ dluh djŏ ƀưi ñu leh. Klei knăl anăn jing ñu dơ̆ng đing đăo leh anăn bi mplêč mlih Klei Blŭ mơ̆ng Aê Diê tơdah ñu lač “huĭdah diih djiê”, ƀiădah Aê Diê lač klă: “hruê ih ƀơ̆ng boh anăn ih srăng djiê sĭt nik” (Klei Mphŭn Dơ̆ng 2:17). Tơdah ƀuh H’Êwơ djŏ ƀưi leh, “ala” hlŏng ksŭng lač mtam: “hơăi, diih amâo srăng djiê sĭt ôh.” Klei blŭ anei bi mklăk kluôm dhuôm hŏng Klei Aê Diê Blŭ, ƀiădah lĕ H’Êwơ hmư̆ leh anăn đăo! Ñu dluh lĕ ti anăp klei kđeh tluh “jăk ƀơ̆ng”, klei ală tluh “mơak dlăng”, leh anăn klei mgao lăn ala “yuôm” kyuadah dưi brei diñu jing mđơr hŏng Aê Diê (I Y-Yôhan 2:16-17).
Đing kơ Aê Diê leh anăn mgao čiăng kơ pô mđơr hŏng Aê Diê atăt leh diñu amâo gưt klei Aê Diê mtă. Klei anăn truh hlăk êjai H’Êwơ brei Satan mâo mmông găl mplư ñu. Hruê anei drei thâo sơăi Satan jing “ama klei luar” (Y-Yôhan 8:44), brei drei ñĕ đuĕ bi kbưi. H’Êwơ amâo dưi hĭn ôh kyuadah ñu đing kơ Aê Diê amâo jing jăk tơdah kăm ghă, leh anăn lŏ bi mlih hĕ Klei Blŭ mơ̆ng Aê Diê leh anăn mgao, hlăk êjai diñu dôk mâo klei hdĭp mda jăk siam êdimima. Ñu amâo dưi thâo săng ôh ya ngă Aê Diê hrih mjing boh ana kyâo leh anăn lŏ kăm ghă, ƀiădah klei anăn amâo srăng ngă kơ ñu đing ôh tơdah ñu đăo kjăp kơ Aê Diê jing jăk leh anăn khăp hơiêng. Aê Diê čiăng kơ ñu khăp sĭt kơ Aê Diê găn hŏng ruah klei gưt asăp amâodah amâo gưt asăp kơ Aê Diê; kyuanăn, Aê Diê brei kơ diñu mâo klei êngiê ruah. Diñu ruah leh klei gưt asăp Aê Diê tơl truh kơ hruê diñu brei klei mplư truh hŏng diñu leh anăn diñu lĕ.
Khua Yang Yêsu mtô: “Brei diih kăp răng bĕ leh anăn wah lač, čiăng kơ diih amâo lĕ hlăm klei mplư ôh. Mngăt čiăng snăk, ƀiădah kđeh jing awăt.” (Y-Markôs 14:38). Đăm mâo ôh pô mgao mĭndah drei mâo djăp klei ktang dưi găn klei lông dlăng tơdah klei mplư truh. Drei čiăng nanao ngă klei jăk ƀiădah amâo dưi ngă ôh kyuadah kđeh asei mlei awăt êdu. Čiăng dưi găn klei mplư, brei hdĭp dôk kăp răng nanao čiăng thâo kral klei mplư, mbĭt anăn brei hdơr nanao, drei jing awăt êdu, čiăng mâo klei ktang myang mơ̆ng Aê Diê snăn brei wah lač amâo mdei ôh. Dôk kăp răng leh anăn wah lač bĕ čiăng dưi găn klei lông dlăng tơdah klei mplư truh.
Drei khăng lĕ amâodah dưi hĭn hŏng klei mplư? Ya ngă?
Wah lač: Ơ Ama doh jăk! Đăm lui kâo lĕ hlăm klei mplư leh anăn klei Satan luar ôh, ƀiădah brei kâo dôk kăp răng leh anăn wah lač čiăng thâo kral leh anăn đuĕ kbưi mơ̆ng klei mplư. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Yap 23
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
