Chivkeeb 3:1-6
Nqe cim:
“Nej yuav tsum ceevfaj thiab thov Vajtswv pab, kev sim siab thiaj yuav ntxias tsis tau nej. Lub siab mas kub lug, tiamsis lub cev qaug zog heev.” (Malakaus 14:38)
Lus nug rau sawvdaws xav:
– Evas kov tsis yeej ntxwgnyoog tej kev dag ntxias twg?
– Vimchiv ua rau Evas kov tsis yeej kev dag ntxias yog dab tsi?
– Tswv Yexus tau qhia li cas txog haukev hla dhau kev dag ntxias?
Evas raug dag ntxias yog thaum uas nws tseem tau zoo noj zoo nyob hauv lub vaj Edees. Muaj ib hnub dab Ntxwgnyoog tshwm los rau hauv tus nab (Tshwmsim 12:9) nrog Evas sib tham thiab siv lub sijhawm dag ntxias Evas, los ntawm qhov uas siv lus nug Evas “Vajtswv yeej txwv kom neb tsis txhob noj txhua yam txiv ntoo uas nyob hauv lub vaj no tiag los?” Evas tsab ua tus paub Vajtswv Txojlus thiab muab kho hais tias, Vajtswv pub noj txhua yam txiv ntoo tsuas txwv tsis pub noj ib tsob xwb! Yeej muaj qhov uas Vajtswv txwv tiag! “Nab” hais yog ib feem me nyob hauv! Evas thiaj mag dab Ntxwgnyoog lub vojhluas. Qhov uas Evas raug dag ntxias yog los ntawm nws ua xyem xyav thiab tsis ntseeg tas siab li Vajtswv hais thiab txhab Vajtswv tej lus, nws hais tias: “yog wb noj, wb yuav tuag” tiamsis ua ntej ntawd Vajtswv hais meej hais tias, “yog koj noj hnub twg, koj yuav tuag hnub ntawd” (Chivkeeb 2:17). Thaum “Nab” paub hais tias Evas mag nws lub vojhluas lawm, nws thiaj hais tias: “Tej lus ntawd tsis tseeb, neb yuav tsis tuag ib zaug li”. Nab lolus no yeej txawv Vajtswv tej lus hais, tiamsis Evas ho ntseeg! Evas qaug rau kev ntshaw ntawm qhovmuag pom lub txiv “zoo nkauj”, nqhis noj ntawm sab nqaij tawv uas “ntxim qab”, thiab nyiam txoj kev khavtheeb uas muaj “tswvyim” vim yuav ua rau yus zoo li Vajtswv (1Yauhas 2:16-17).
Tsis ntseeg Vajtswv tej lus thiab khavtheeb, xav ua kom yus luaj li Vajtswv thiaj ua hla cai tus Tswv tej lus samhwm. Qhov uas Evas poob kev txhaum vim yog nws cia rau Ntxwgnyoog muaj sijhawm dag ntxias nws. Niaj hnub nimno peb yeej paub hais tias, ntxwgnyoog yog “leejtxiv ntawm kev hais lus dag” (Yauhas 8:44), yog li ntawd yuavtsum tau khiav deb. Txawm yog Vajtswv pub rau nkawd tau zoo noj, tau zoo nyob los Evas cia li txhab Vajtswv tej lus thiab khavtheeb mloog raws li dab Ntxwgnyoog tej lus dag. Vajtswv yeej cia Evas thiab Adas ywjpheej xaiv saib nkawd yuav xaiv mloog Vajtswv lus lossis tsis mloog. Nkawd yeej xaiv mloog Vajtswv lus mus txog thaum uas nkawd cia kev dag ntxias los raug nkawd thiab ua rau nkawd kov tsis yeej.
Tswv Yexus qhia hais tias: “Nej yuav tsum ceevfaj thiab thov Vajtswv pab, kev sim siab thiaj yuav ntxias tsis tau nej. Lub siab mas kub lug, tiamsis lub cev qaug zog heev” (Malakaus 14:38). Peb txhua tus tsis txhob xav hais tias yus muaj txaus dag zog hla dhau kev sim siab thaum ntsib kev dag ntxias. Peb yeej xav ua ntau yam zoo tiamsis peb ua tsis tau vim peb lub cev qaug zog zis. Cia kom peb hla dhau kev dag ntxias peb yuavtsum muaj lub siab tsim dheev ceevfaj los zeem paub kev dag ntxias thiab vamkhom Vajtswv pab, vim peb tsis muaj zog txaus yuav kov yeej, yog li ntawd peb yuavtsum thov Vajtswv tsis tseg tsis tu, peb thiaj yuav hla dhau kev dag ntxias.
Thov Vajtwv:
Vaj Leej Txiv tus uas dawbhuv! Thov txhob cia nyuam yaus poob rau txoj kev dag ntxias, tiamsis thov pab nyuam yaus paub ceevfaj thiab thov Vajtswv Koj pab txhua lub sijhawm kom zeem paub txoj kev dag ntxias thiab qaij deb. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb pheej kov tsis yeej kev dag ntxias lossis kovyeej? Vim li cas?
Nyeem Vajluskub hauv peb lub xyoos: Teev Npe 23
Kênh Youtube BHKTHN:
