Klei Aê Diê Blŭ: Y‑Đaniel 2:46-49
Êlan kliăng: “Mtao lač kơ Y‑Daniel, ‘Sĭt nik Aê Diê ih jing Aê Diê kơ phung yang, Khua Yang kơ phung mtao, pô bi êdah klei hgăm, kyuadah ih dưi bi êdah leh klei hgăm anei.’ ” (Y‑Đaniel 2:47).
Klei êmuh ksiêm mĭn: Ya klei mtao Y‑Nebukatnetsar ngă, hlăk leh Y‑Đaniel mblang brei klei ñu êpei? Hŏng ya klei, Y‑Đaniel dơ̆ng mơ̆ng sa čô arăng dơ̆ng ba bi mdjiê mbliư̆ jing hĕ sa čô mtao mni leh anăn bi mđĭ anôk bruă? Si drei ngă čiăng bi knal Khua Yang msĕ si Y‑Đaniel?
Klei êpei mtao Y‑Nebukatnetsar dưm leh klei hdĭp jih jang phung knhâo thâo mĭn hlăm sang mtao čar Ƀaƀilôn kơ klei jhat kjham kjhuê̆. Jing sa čô đăo kkuh mpŭ kơ Aê Diê, Y‑Đaniel ăt mâo anăn mbĭt hŏng phung arăng dơ̆ng ba bi mdjiê mơh (êlan 12‑13). Ƀiădah lĕ, drei lŏ ƀuh ti knhal tuč jing hĕ mngač bhung bhang. Hrô kơ klei bi mdjiê, snăn mtao Y‑Nebukatnetsar lĕ “buôn kŭp ƀô̆ kkuh” leh anăn “myơr mnơ̆ng ngă yang” kơ Y‑Đaniel (êlan 46). Êdei kơnăn, mtao bi mđĭ Y‑Đaniel mbĭt hŏng tlâo čô mah jiăng mnuih Hêbrơ, brei jing khua kiă kriê bruă čar Ƀaƀilôn (êlan 48‑49). Tloh ênoh hĭn mơh, sa čô mtao đăo kơ yang mkăn anei, bi mni kơ Aê Diê “Aê Diê kơ phung yang, Khua Yang kơ phung mtao” (êlan 47).
Si ngă sa čô mnuih mâo anăn arăng bi mdjiê mbliư̆ jing mnuih arăng mpŭ, bi mđĭ anôk bruă leh bi mni msĕ snăn? Klei jing ti knhal tuč mngač đrah anăn amâo srăng truh ôh, tơdah Y‑Đaniel dôk kơŭ kyăm ƀuah ăl kơ mtao Y‑Nebukatnetsar ngă sa bruă čuăn mdê amâo tuôm mâo, jhat ƀai msĕ snăn. Klei bi mlih amâo srăng truh ôh, tơdah ñu amâo kgŭ nao mă tŭ bruă klam duah klei mblang brei kơ mtao, mơ̆ng Aê Diê. Klei yuôm bhăn amâo srăng truh ôh tơdah ñu amâo mâo wah lač leh amâo akâo ôh kơ pô mkăn đru wah lač mbĭt. Mtao ăt kăn srăng thâo kral leh anăn bi mni kơ Aê Diê rei, tơdah Y‑Đaniel knŏng mblang klei êpei, ƀiădah amâo lač ôh kơ Aê Diê, jing Pô bi êdah kơ ñu hlăm anôk hgăm.
Lu bliư̆ drei amâo dưi mâo ôh klei bi knal yuôm bhăn leh anăn mrâo msĕ si Y‑Đaniel, djŏ mơh hĕ kyuadah drei amâo hur har tŭ drông ôh bruă klam? Djŏ mơh hĕ kyuadah drei phưi lui klei truh bi kram drei, hrô kơ klei êbat ti dlông klei jhat truh, čiăng bi mlih klei truh jhat anăn jing klei myun, čiăng bi knal Khua Yang ƀrư̆ hruê lu hĭn êjai? Akâo Khua Yang brei drei kčưm dơ̆ng hŏng knhuah hur har tŭ drông jih ya mta klei Khua Yang brei truh, leh anăn hmiêt mkăp êyuh păl kngan klei pap Khua Yang hŏng kơŭt čuôn wah lač msĕ si klei bi hmô leh mơ̆ng Y‑Đaniel.
Si ngă drei čiăng mơ̆ bi knal klei yuôm bhăn Aê Diê ngă kơ klei hdĭp drei?
Wah lač: Ơ Khua Yang, Y‑Đaniel hdĭp hur har leh anăn đăo knang kơ Khua Yang wăt êjai dôk tlă anăp hŏng klei jhat truh. Akâo Ih đru kâo hriăm tui klei bi hmô mơ̆ng Y‑Đaniel, sĭt suôr, čang guôn leh anăn đăo knang kơ Ih čiăng kâo bi knal Ih grăp hruê lu hĭn êjai.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Y‑Samuel 2
Kênh Youtube BHKTHN:
